Bareta kan mga Parabalangibog kan Kahadean
An Sarong Soltero na Apisyonado sa Tren Nanodan an Katotoohan
KUN an puso nin saro may inklinasyon sa katanosan, dangan si Jehova Dios, na ginagamit si Cristo Jesus asin an langitnon na mga anghel, sisiertohon na an siring na arog-karnerong tawo sa katapustapusi mapaabotan kan maogmang bareta nin Kahadean. Pag-abot nin panahon an tawong iyan tibaad makaabot sa toong lado nin pag-oyon ni Jesus. (Mateo 25:31-33) Ini nagin totoo sa sarong hoben na apisyonado sa tren sa Austria na namidbid an katotoohan sa pambihirang paagi.
An pinakamaogmang kabtang nin apisyon kan solterong ini iyo an paglunad sa kotse nin mga tren, na may permiso kan namamahala kan tren. Irinirekord nia an kada biyahe sa saiyang video kamera tanganing dalanon nia giraray iyan sa saiyang harong. Sa pagbiyahe nia hale sa Vienna pasiring sa Salzburg, an makinista nin tren saro sa mga Saksi ni Jehova. Ginagamit nia an oportunidad na magtaram dapit sa Kahadean sa apisyonado sa tren. Kan primero napangalas an soltero na madangog an makinista na nagtataram dapit sa Dios asin sa Biblia, pero durante kan biyahe, mas nagkonsentrar sia sa tanawon kisa sa sinasabi sa saiya kan makinista.
Pakapuli giraray, an apisyonadong soltero na ini dinalan an saiyang irinekord sa video bako sanang saro kundi sampulong beses, huli ta interesado siang gayo sa biyaheng ini. Mantang irinekord man nia an tanog, paorootro niang nadangog an sinabi saiya kan Saksi. Mientras na dinadalan nia an video, orog siang nagin pamilyar manongod sa sinabi saiya. Nagpoon na sia ngonyan na mag-isip dapit dian, asin sa katapustapusi nagin siang entusiastiko manongod sa makangangalas na impormasyon na itinao hale sa Biblia. Gusto niang makanood nin dakol pa.
Nagirumdoman nia an ngaran kan makinista asin aram nia na sia nag-iistar sa saro sa mga lugar sa Vienna. Kaya nagduman sia sa opisina kan koreo asin nagpoon na apodan saro-saro sa telepono an numero na nakalista sa irarom kan ngaran na iyan sa direktoryo. An saiyang hapot sa nakasisimbag kan telepono iyo ini: “Makinista kamo nin tren?” Kun an simbag dai, maapod sia sa saro pang numero. Sa katapustapusi, nakua nia an makinista. Isinaysay nia saiya an saiyang estorya asin na sia interesado sa mensahe kan Biblia na saiyang nadangog sa video.
Guminibo nin mga areglo an Saksi paagi sa sangang opisina para sa pagdalaw na gigibohon nin saro na nag-iistar na harani sa soltero. Nangyari na sa kongregasyon duman, igwa pang sarong Saksi na makinista man nin tren. Dinalaw kan ikaduwang makinistang ini an apisyonado sa tren, asin naponan an pag-adal sa Biblia. Kan tig-init nin 1991, an soltero binautismohan.
Si Jehova, na nagsisiyasat sa gabos na puso, siertong naheling na an tawong ini igwa nin odok sa boot na pagkamoot sa katanosan. Kaya, dinara nia sia sa pakanompong sa katotoohan kan Biblia—minsan ngani sa pambihirang paagi.—1 Cronica 28:9; Juan 10:27.
[Picture Credit Line sa pahina 9]
Sa karahayan nin boot kan Austrian Railways