An Tubig nin Buhay

“AN SIISAY man na makadangog magsabi: ‘Madia!’ Asin an siisay man na napapaha dumolok; an siisay man na boot kumua kan tubig nin buhay na daing bayad.” (Kapahayagan 22:17) “Tubig nin buhay”​—iyan nangangahulogan kan gabos na probisyon nin Dios para sa satong kaligtasan basado sa pantubos na atang ni Jesu-Cristo. Makukua an mga probisyon na ini, asin iyan daing bayad. Makangangalas nanggad na pagkamatinao kan satong Dios! Alagad, taano ta sinisimbolisaran iyan kan tubig?

Bueno, an literal na tubig ginigibong posible an pagtalubo nin mga tinanom sa daga, asin ginigibo kaiyan na posible an buhay nin tawo. Kun mayo nin tubig, an buhay nin tinanom, asin kun siring an buhay nin tawo, dai puwedeng mag-eksister. Dugang pa, an saindong hawak 65 porsientong tubig. An ibang espesyalista sa salud nagrerekomendar na papagdanayon an proporsion na iyan paagi sa pag-inom nin mga 2.4 litros nin tubig kada aldaw. An gabos nindong panlaog na proseso nin buhay​—poon sa pagtunaw nin kakanon sagkod sa pagpaluwas nin ati—​nagkakaipo nin tubig. Kun kamo dai mainom nin tubig sa laog nin sarong semana, magagadan kamo.

Sa kaagid na paagi, an “tubig nin buhay” ginigibong posible asin pinakokosog an espirituwal na buhay. Kun sinasayumahan niato an tubig nin buhay, mayo kita nin daing sagkod na ngapit. (Juan 3:36) Kun inaako niato iyan, magkakamit kita nin buhay na daing katapusan. Bakong makangangalas na interesadong nagsimbag an Samaritana kan si Jesus magsabi saiya: “An siisay man na uminom sa tubig na itatao ko sa saiya dai na nanggayod mapapaha, kundi an tubig na itatao ko sa saiya magigin burabod nin tubig na nagbuburokbusok tanganing magtao nin buhay na daing katapusan”! (Juan 4:14) Magmaigot logod kita na may pagkagalaga asin kumua kan tubig nin buhay na daing bayad.

[Picture Credit Line sa pahina 32]

Garo Nalbandian