Idagdag sa Saindong Pakatagal an Diosnon na Debosyon
“Idagdag sa saindong pagtubod . . . an pakatagal, sa saindong pakatagal an diosnon na debosyon.”—2 PEDRO 1:5, 6.
1, 2. (a) Poon kan mga taon nin 1930, ano an nangyari sa mga Saksi ni Jehova sa kadagaan na sakop nin Nazi, asin taano? (b) Kumusta an mga Saksi sa irarom kan maisog na tratamientong ini?
MADIKLOM na panahon idto sa kasaysayan kan ika-20 siglo. Poon kan mga taon nin 1930, an rinibong Saksi ni Jehova sa kadagaan na sakop nin Nazi daing hustisyang inarestar asin iinapon sa mga kampo de konsentrasyon. Taano? Huli ta makosog an boot na sinda nagdanay na neutral asin nagsayumang mag-omaw ki Hitler. Paano sinda trinatar? “Mayo nin ibang grupo nin mga preso . . . na nag-agi sa sadismo kan mga soldados na SS na arog kan inagihan kan mga Estudyante sa Biblia [mga Saksi ni Jehova]. Idto sadismo na daing katapusan an sunod-sunod na mga pasakit sa hawak asin isip, na dai ikakasaysay nin minsan anong lenguahe sa kinaban.”—Karl Wittig, dating opisyal sa gobyernong Aleman.
2 Kumusta an mga Saksi? Sa saiyang librong The Nazi State and the New Religions: Five Case Studies in Non-Conformity, sinabi ni Dr. Christine E. King: “Solamente tumang sa mga Saksi [bakong arog nin ibang relihiyosong grupo] na daing nagibo an gobyerno.” Iyo, an mga Saksi ni Jehova sa kabilogan nanindogan, dawa para sa ginatos sa sainda, ini nangahulogan nin pagtagal sagkod sa kagadanan.
3. Ano an nagpangyari sa mga Saksi ni Jehova na matagalan an masakit na mga pagbalo?
3 Ano an nagpangyari sa mga Saksi ni Jehova na matagalan an siring na mga pagbalo bako sanang sa Nazi Alemania kundi sa bilog na kinaban? Tinabangan sinda kan saindang langitnon na Ama na makatagal huli sa saindang diosnon na debosyon. “Si Jehova tataong magligtas sa mga tawong may diosnon na debosyon hale sa pagbalo,” an paliwanag ni apostol Pedro. (2 Pedro 2:9) Sa enotan kan surat na ini, hinatolan ni Pedro an mga Kristiano: “Idagdag sa saindong pagtubod . . . an pakatagal, sa saindong pakatagal an diosnon na debosyon.” (2 Pedro 1:5, 6) Kaya konektadong marhay an pakatagal sa diosnon na debosyon. An totoo, tanganing makatagal sagkod sa katapusan, kaipuhan na satuyang ‘sunodon an diosnon na debosyon’ asin ipaheling iyan. (1 Timoteo 6:11) Alagad ta ano man nanggad an diosnon na debosyon?
Kun Ano an Diosnon na Debosyon
4, 5. Ano an diosnon na debosyon?
4 An nombreng Griego para sa “diosnon na debosyon” (eu·seʹbei·a) puwedeng tradusiron sa literal na “marahay na pagtaong onra.”a (2 Pedro 1:6, Kingdom Interlinear) Iyan nagpaparisa nin mainit na odok sa pusong saboot para sa Dios. Sono ki W. E. Vine, an adhetibong eu·se·besʹ, na sa literal nangangahulogan “marahay na mapagtao nin onra,” nangangahulogan kan “kosog na, ginigiyahan nin banal na paghanga sa Dios, nahahayag sa debotadong paggibo.”—2 Pedro 2:9, Int.
5 Kun siring, an ekspresyon na “diosnon na debosyon” nanonongod sa pagtaong onra o debosyon ki Jehova na nagpapahiro sato na gibohon an ikinaoogma nia. Ini ginigibo dawa sa atubangan nin masakit na mga pagbalo huli ta namomotan niato an Dios gikan sa puso. Iyan maimbod, personal na pagkadayupot ki Jehova na nahahayag sa satong pamumuhay. An tunay na mga Kristiano sinasadol na mamibi na sinda logod “makapamuhay nin tiwasay asin toninong na may lubos na diosnon na debosyon.” (1 Timoteo 2:1, 2) Sono sa mga leksikograpong si J. P. Louw asin E. A. Nida, “sa nagkapirang lenguahe [an eu·seʹbei·a] sa 1 Tim 2.2 puwedeng tradusiron nin tama na ‘mamuhay sono sa gusto nin Dios na magin pamumuhay niato’ o ‘mamuhay sono sa sinabi nin Dios na maninigong magin pamumuhay niato.’”
6. Ano an koneksion kan pakatagal asin kan diosnon na debosyon?
6 Ngonyan orog na niatong masasabotan an koneksion kan pakatagal asin kan diosnon na debosyon. Huli ta kita namumuhay sono sa gusto nin Dios na magin pamumuhay niato—na may diosnon na debosyon—ikinaoongis kita kan kinaban, na siyempre nagtatao nin mga pagbalo sa pagtubod. (2 Timoteo 3:12) Pero dai nanggad kita mapahihirong tagalan an siring na mga pagbalo kun bakong huli sa satong personal na pagkadayupot sa satong langitnon na Ama. Dugang pa, napahihiro an boot ni Jehova kan siring na odok sa pusong debosyon. Imahinara na sana kun ano an namamatean nia na dumungaw hale sa kalangitan asin masdan an mga, huli sa saindang debosyon sa saiya, naghihingoang mapaogma sia sa ibong nin gabos na klaseng pagtumang. Bakong makangangalas na sia boot na “magligtas sa mga tawong may diosnon na debosyon hale sa pagbalo”!
7. Taano ta kaipuhan na pataluboon an diosnon na debosyon?
7 Minsan siring, bako niatong katambay sa pagkamundag an diosnon na debosyon, ni automatiko man niatong nakukua iyan sa diosnon na mga magurang. (Genesis 8:21) Imbes, iyan kaipuhan na pataluboon. (1 Timoteo 4:7, 10) Kaipuhan na kita maghingoa na idagdag sa satong pakatagal asin sa satong pagtubod an diosnon na debosyon. Ini, sabi ni Pedro, nagkakaipo nin “odok na paghihingoa.” (2 Pedro 1:5) Kun siring, paano daw kita magkakaigwa nin diosnon na debosyon?
Paano Kita Nagkakaigwa nin Diosnon na Debosyon?
8. Sono ki apostol Pedro, ano an liyabe sa pagkaigwa nin diosnon na debosyon?
8 Ipinaliwanag ni apostol Pedro an liyabe sa pagkaigwa nin diosnon na debosyon. Sia nagsabi: “Padakolon logod sa saindo an dai na kutana maninigong pagkaherak asin katoninongan paagi sa tamang kaaraman sa Dios asin ki Jesus na satong Kagurangnan, mantang an saiyang banal na kapangyarihan nagtao sa sato nin daing bayad kan gabos na bagay na mapadapit sa buhay asin diosnon na debosyon, paagi sa tamang kaaraman kan saro na nag-apod sa sato paagi sa kamurawayan asin karahayan.” (2 Pedro 1:2, 3) Kaya tanganing ikadagdag an diosnon na debosyon sa satong pagtubod asin pakatagal, kaipuhan na kita tumalubo sa tama, an boot sabihon, lubos, o kompleto, na kaaraman manongod ki Jehova Dios asin ki Jesu-Cristo.
9. Paano ikaiilustrar na an kalabot sa pagkaigwa nin tamang kaaraman sa Dios asin ki Cristo bako sanang pakamidbid kun sairisay sinda?
9 Ano an boot sabihon kan pagkaigwa nin tamang kaaraman manongod sa Dios asin ki Cristo? Malinaw na an kalabot dian bako sanang pakaaram kun siisay sinda. Bilang ilustrasyon: Tibaad midbid nindo kun siisay an kataed nindo sa harong asin tibaad tinataratara pa ngani nindo sia sa ngaran. Pero pauutangon daw sia nindo nin dakulang halaga nin kuwarta? Dai kun dai talaga nindo midbid kun anong klase siang tawo. (Ikomparar an Talinhaga 11:15.) Sa kaagid na paagi, an pakamidbid ki Jehova asin ki Jesus nin tama, o lubos, nangangahulogan bako sanang nin pagtubod na sinda nabubuhay asin nin pakaaram kan saindang ngaran. Tanganing magin andam na tagalan an mga pagbalo para sa sainda sagkod sa kagadanan, kaipuhan na talagang mamidbid niato sinda nin dayupot. (Juan 17:3) Ano an kalabot digdi?
10. Kalabot sa pagkaigwa nin tamang kaaraman ki Jehova asin ki Jesus an anong duwang bagay, asin taano?
10 Kalabot sa pagkaigwa nin tama, o kompleto, na kaaraman ki Jehova asin ki Jesus an duwang bagay: (1) pagkamidbid sa sainda bilang mga persona—an saindang mga kuwalidad, saboot, asin dalan—asin (2) pag-arog sa saindang halimbawa. Kalabot sa diosnon na debosyon an odok sa puso, personal na pagkadayupot ki Jehova asin ipinahahayag iyan kan satong pamumuhay. Kun siring, tanganing magkaigwa kaiyan kaipuhan na mamidbid niato nin personal si Jehova asin lubos niatong maaraman an saiyang kabotan asin mga dalan sagkod na ini mahihimo niato bilang tawo. Tanganing tunay na mamidbid si Jehova, na sa saiyang ladawan kita linalang, kaipuhan na gamiton niato an siring na kaaraman asin maghingoa na makaarog sa saiya. (Genesis 1:26-28; Colosas 3:10) Asin mantang si Jesus sangkap na nag-arog ki Jehova sa saiyang isinabi asin ginibo, an pakamidbid nin tama ki Jesus mahalagang pantabang sa pagpatalubo nin diosnon na debosyon.—Hebreo 1:3.
11. (a) Paano daw kita magkakamit nin tamang kaaraman sa Dios asin ki Cristo? (b) Taano ta mahalaga na horophoropon an satong binabasa?
11 Minsan siring, paano daw kita magkakamit nin siring na tamang kaaraman sa Dios asin ki Cristo? Paagi sa maigot na pag-adal sa Biblia asin sa mga publikasyon na basado sa Biblia.b Minsan siring, tanganing magbunga kan pagkaigwa niato nin diosnon na debosyon an satong personal na pag-adal sa Biblia, kaipuhan na tawan niato nin panahon an paghorophorop, an boot sabihon, pagpensar, o pagturotimbang, sa satong binabasa. (Ikomparar an Josue 1:8.) Taano ta mahalaga ini? Girumdoma na an diosnon na debosyon mainit, odok sa pusong saboot para sa Dios. Sa Kasuratan, an paghorophorop paorootrong iinaasosyar sa piguratibong puso—an panlaog na persona. (Salmo 19:14; 49:3; Talinhaga 15:28) Kun may pag-apresyar niatong pinipensar an satong binabasa, iyan nakatataros sa panlaog na persona, sa siring pinupukaw an satong mga saboot, pinahihiro an satong emosyon, asin iniimpluwensiahan an satong isip. Sa panahon sanang iyan na an pag-adal makakaparigon sa satong personal na pagkadayupot ki Jehova asin makakapahiro sato na mamuhay sa paaging ikinaoogma nin Dios dawa sa atubang nin mapan-angat na mga kamugtakan o masakit na mga pagbalo.
Paggibo nin Diosnon na Debosyon sa Harong
12. (a) Sono ki Pablo, paano magigibo nin Kristiano an diosnon na debosyon sa harong? (b) Taano ta inaataman nin tunay na mga Kristiano an gurang nang mga magurang?
12 An diosnon na debosyon maninigong enot na gibohon sa harong. Sabi ni apostol Pablo: “Kun an siisay man na balo igwa nin mga aki o makoapo, pabayaan nguna an mga ini na makanood na maggibo nin diosnon na debosyon sa saindang sadiring pamilya asin padagos na magbalos sa saindang mga magurang asin apoon, huli ta ini an marahay sa pagheling nin Dios.” (1 Timoteo 5:4) An pag-ataman sa gurang nang mga magurang, arog kan sabi ni Pablo, kapahayagan nin diosnon na debosyon. Itinatao nin tunay na mga Kristiano an siring na pag-ataman bako sanang huli sa obligasyon kundi huli sa pagkamoot sa saindang mga magurang. Alagad orog pa kaiyan, minimidbid ninda an pagpapahalaga ni Jehova sa pag-ataman sa sadiring pamilya. Aram nanggad ninda na an pagtalikod sa saindang mga magurang sa panahon nin pangangaipo magigin katimbang nin ‘pagpainda kan Kristianong pagtubod.’—1 Timoteo 5:8.
13. Taano ta puwedeng magin dakulang angat an paggibo nin diosnon na debosyon sa harong, pero anong satispaksion an ibinubunga kan pag-ataman sa mga magurang?
13 Totoo, bakong perming pasil na gibohon an diosnon na debosyon sa harong. An mga miembro nin pamilya tibaad separado nin hararayong distansia. An darakula nang aki tibaad may binubuhay naman na sadiring mga pamilya asin tibaad nasasakitan sa pagbuhay. An klase o sokol kan pag-ataman na kaipuhan nin magurang tibaad makapaluya sa pisikal, mental, asin emosyonal na salud kan mga nag-aataman. Minsan siring, puwedeng kamtan an tunay na satispaksion sa pakaaram na an pag-ataman sa mga magurang bako sanang bale ‘balos’ kundi ikinaoogma man kan Saro “na pinagkakautangan nin ngaran kan lambang pamilya sa langit asin sa daga.”—Efeso 3:14, 15.
14, 15. Isaysay an sarong halimbawa nin diosnon na pag-ataman nin mga aki sa sarong magurang.
14 Horophoropa an nakapupukaw nanggad sa boot na halimbawa. Si Ellis asin an lima niang tugang na lalaki asin babae napapaatubang sa sarong dakulang angat sa pag-ataman sa saindang ama sa harong. “Kan 1986 inatake sa puso an sakong ama, na dahelan na sia biyong naparalisado,” an paliwanag ni Ellis. An anom na aki nagtatarabang sa pag-asikaso sa mga pangangaipo kan saindang ama, poon sa pagkarigos sa saiya sagkod sa pagsierto na dayaday na liniliwat an posisyon nia sa paghigda tanganing dai sia magkalugad. “Samuya siang binabasahan, kinakaolay, pinatotogtogan nin musika. Dai mi segurado kun aram nia an nangyayari sa palibot nia, pero an pagtrato mi saiya garo aram nia an gabos.”
15 Taano ta inaataman kan mga aki an saindang ama nin arog kan ginigibo ninda? An pagpapadagos ni Ellis: “Pagkagadan kan samong ina kan 1964, pinadakula kami ni Tatay nin solo. Kaidto, an edad mi poon 5 sagkod 14. Yaon sia kaidto para sa samo; yaon man kami ngonyan para sa saiya.” Malinaw na bakong pasil an pagtao nin siring na pag-ataman, asin kun beses nanluluya an boot kan mga aki. “Pero aram mi na temporaryo sanang problema an kamugtakan kan samong ama,” sabi ni Ellis. “Hinahalat mi an panahon na an samong ama ibabalik sa mabagsik na salud asin makakaibanan mi giraray an samong ina.” (Isaias 33:24; Juan 5:28, 29) Segurado na an siring kadebotadong pag-ataman sa magurang nakapaoogma sa puso kan Saro na nagboboot sa mga aki na igalang an saindang mga magurang!c—Efeso 6:1, 2.
Diosnon na Debosyon Asin an Ministeryo
16. Ano an maninigong magin pangenot na dahelan sa satong ginigibo sa ministeryo?
16 Pagkaako niato sa pangagda ni Jesus na ‘padagos na magsunod sa saiya,’ napapairarom kita sa sugo nin Dios na ihulit an maogmang bareta kan Kahadean asin gumibo nin mga disipulo. (Mateo 16:24; 24:14; 28:19, 20) Malinaw na an pakikikabtang sa ministeryo Kristianong obligasyon sa “huring mga aldaw” na ini. (2 Timoteo 3:1) Minsan siring, an motibo niato sa paghuhulit asin pagtotokdo dapat na bako sanang pakamate nin katongdan o obligasyon. An hararom na pagkamoot ki Jehova dapat na iyo an pangenot na dahelan sa satong ginigibo asin sa kun gurano an ginigibo niato sa ministeryo. “Gikan sa kapanoan kan puso nagtataram an ngoso,” sabi ni Jesus. (Mateo 12:34) Iyo, kun an satong puso nagsusulwak sa pagkamoot ki Jehova, kita napahihirong magpatotoo sa iba manongod sa saiya. Kun an motibo niato pagkamoot sa Dios, an satong ministeryo makahulogan na kapahayagan kan satong diosnon na debosyon.
17. Paano daw niato mapatatalubo an tamang motibo sa ministeryo?
17 Paano daw niato mapatatalubo an tamang motibo sa satong ministeryo? May pag-apresyar na pensaron an tolong dahelan na itinao sa sato ni Jehova na kamotan sia. (1) Namomotan niato si Jehova huli sa ginibo na nia para sa sato. Dai nin maorog sa pagkamoot na ipinaheling nia sa pagtao kan pantubos. (Mateo 20:28; Juan 15:13) (2) Namomotan niato si Jehova huli sa ginigibo nia ngonyan para sa sato. Kita may katalingkasan sa pagtaram ki Jehova, na sinisimbag an satong mga pamibi. (Salmo 65:2; Hebreo 4:14-16) Mantang inienot niato an intereses kan Kahadean, nakakamtan niato an mga pangangaipo sa buhay. (Mateo 6:25-33) Nag-aako kita nin daing pondong suplay nin espirituwal na kakanon na nakatatabang sato na makaya an mga problemang inaatubang niato. (Mateo 24:45) Asin nasa sato an bendisyon na magin kabtang nin pankinaban na Kristianong asosasyon nin magturugang na talagang ilinalaen kita sa kinaban. (1 Pedro 2:17) (3) Namomotan man niato si Jehova huli sa gigibohon pa nia para sa sato. Huli sa saiyang pagkamoot, kita may ‘marigon na pangapot sa tunay na buhay’—buhay na daing katapusan sa ngapit. (1 Timoteo 6:12, 19) Kun hohorophoropon niato an pagkamoot ni Jehova para sa sato, tunay na pahihiroon kita kan satong puso na magkaigwa nin debotadong pakikikabtang sa pagsabi sa iba manongod sa saiya asin sa saiyang mahahalagang katuyohan! Dai na kita kaipuhan na sabihan nin iba kun ano an dapat na gibohon o kun gurano an dapat na gibohon sa ministeryo. Pahihiroon kita kan satong puso na gibohon an satong makakaya.
18, 19. Anong kaolangan an pinangganahan nin sarong tugang na babae tanganing makapakikabtang sa ministeryo?
18 Minsan sa atubang nin mapan-angat na mga kamugtakan, an pusong napukaw nin diosnon na debosyon mapahihirong magtaram. (Ikomparar an Jeremias 20:9.) Ipinaheheling ini kan nangyari ki Stella, sarong sobra kamasosopgon na Kristiana. Kan enot siang pumoon na mag-adal kan Biblia, an paghona nia, ‘Noarin man dai ko kayang magharongharong!’ An paliwanag nia: “Poon pa kaidto ako daing girong. Dai ako noarin man nakadodolok sa iba tanganing ponan an pakipag-olay.” Mantang nagpapadagos sia sa pag-adal, nagtalubo an saiyang pagkamoot ki Jehova, asin nagkaigwa sia nin naglalaad na kamawotan na makipag-olay sa iba manongod sa saiya. “Nagigirumdoman kong sinabihan ko an nagtotokdo sako sa Biblia, ‘Gustong-gusto kong magtaram, pero dai ko talaga kaya, asin ikinariribok iyan kan sakong isip.’ Nungka kong malilingawan an sinabi nia sako: ‘Stella, magpasalamat ka na gusto mong magtaram.’”
19 Dai nahaloy, nanompongan ni Stella an saiyang sadiri na nagpapatotoo sa saiyang kataed. Dangan ginibo nia an para sa saiya dakulaon na bagay—nakikabtang sia sa ministeryo sa harong-harong sa enot na pangyayari. (Gibo 20:20, 21) Nagigirumdoman nia: “Isinurat ko an sakong pag-aatubang. Alagad ta grabe an takot ko na dawa iyan nasa atubangan ko, nininerbiyos akong marhay tanganing helingon an sakong nota!” Ngonyan, pakalihis nin labing 35 taon, si Stella masosopgon pa man giraray. Pero namomotan nia an ministeryo sa langtad asin sia nagpapadagos na magkaigwa nin makahulogan na pakikikabtang dian.
20. Anong halimbawa an nagpapaheling na minsan paglamag o pagkabilanggo dai kayang pintoan an ngoso nin debotadong mga Saksi ni Jehova?
20 Minsan paglamag o pagkabilanggo dai kayang pintoan an ngoso nin debotadong mga Saksi ni Jehova. Helinga an halimbawa ni Ernst asin Hildegard Seliger na taga-Alemania. Huli sa saindang pagtubod, kun susumahon naglabing 40 anyos sinda sa mga kampo de konsentrasyon na Nazi asin mga bilanggoan na Komunista. Minsan nasa bilanggoan, nagpadagos sinda sa pagpatotoo sa ibang preso. An paggirumdom ni Hildegard: “Ibinilang ako nin mga opisyal sa bilanggoan na nangorognang peligroso, ta, arog kan sabi nin sarong guwardiang babae, nagtataram ako manongod sa Biblia sa bilog na aldaw. Kaya ibinugtak ako sa selda na nasa sirong.” Pakatawe kan saindang katalingkasan sa katapustapusi, idinusay ni Brother asin Sister Seliger an saindang bilog na panahon sa Kristianong ministeryo. Pareho sinda maimbod na naglingkod sagkod na sinda magadan, si Brother Seliger kan 1985 asin an saiyang agom kan 1992.
21. Ano an kaipuhan niatong gibohon tanganing ikadagdag an diosnon na debosyon sa satong pakatagal?
21 Paagi sa maigot na pag-adal sa Tataramon nin Dios asin pagtao nin panahon na may pag-apresyar na horophoropon an satuyang nanonodan, matalubo kita sa tamang kaaraman ki Jehova Dios asin ki Jesu-Cristo. Ini man magbubunga kan pagkaigwa niato nin dugang pa kan mahalagang kuwalidad na iyan—an diosnon na debosyon. Kun mayo nin diosnon na debosyon dai niato matatagalan an laen-laen na pagbalo na minaabot sa sato bilang mga Kristiano. Kaya kuyogon niato an hatol ni apostol Pedro, na ipinadadagos na ‘idagdag sa satong pagtubod an pakatagal asin sa satong pakatagal an diosnon na debosyon.’—2 Pedro 1:5, 6.
[Mga Nota sa Ibaba]
a Mapadapit sa eu·seʹbei·a, si William Barclay nagsasabi: “Iyan an parteng seb- [pinakagamot] kan termino na nangangahulogan pagtaong onra o pagsamba. An eu iyo an termino sa Griego para sa marahay; kun siring, an eusebeia pagsamba, pagtaong onra na itinatao nin marahay asin tama.”—New Testament Words.
b Para sa paliwanag sa kun paano mag-aadal tanganing mapararom an satong kaaraman sa Tataramon nin Dios, helingon an Torrengbantayan kan Agosto 15, 1993, pahina 12-17.
c Para sa kompletong paliwanag sa kun paano gigibohon an diosnon na debosyon sa gurang nang mga magurang, helingon an Torrengbantayan kan Hunyo 1, 1987, pahina 13-18.
Ano an Simbag Nindo?
◻ Ano an diosnon na debosyon?
◻ Ano an koneksion kan pakatagal asin kan diosnon na debosyon?
◻ Ano an liyabe sa pagkaigwa nin diosnon na debosyon?
◻ Paano magigibo nin Kristiano an diosnon na debosyon sa harong?
◻ Ano an dapat na magin pangenot na dahelan sa satong ginigibo sa ministeryo?
[Ritrato sa pahina 18]
An pakatagal asin diosnon na debosyon ipinaheling kan mga Saksi ni Jehova na nabilanggo sa kampo de konsentrasyon nin Nazi sa Ravensbrück