Garo Sana mga Lukton
KAMO daw nakapaglakawlakaw na sa sarong kaawagan sa tig-init asin nakaheling nin dai mabilang na lukton na nagrurulumpat sa agihan nindo? Garo baga yaon sinda dawa saen, minsan ngani tibaad dai nindong gayo iyan iniintindi. Total, garo dai man sinda nangongolog asin daing halaga.
Minsan siring, an garo kadaihan nin halaga nin mga lukton nagpapangyari sainda na magin angay na simbolo nin katawohan. Minsan ngani an ibang prominenteng tawo tibaad ibinibilang an saindang sadiri na labi kaimportante, kabaliktaran an iniisip kan satong Kaglalang. An propeta niang si Isaias nagsabi: “Igwa nin Saro na nag-eerok sa ibabaw kan katalidongan kan daga, na an mga nag-eerok dian garo mga lukton.”—Isaias 40:22.
An kadakulaan, kakosogan, asin kadonongan ni Jehova ilinalangkaw siang marhay sa rona nin mga tawo, siring man sana na an tawo orog kahalangkaw sa lukton sa kadonongan asin kosog. Alagad, an pinakanangongorog na kuwalidad nin Dios iyo an pagkamoot. Asin an saiyang daing kaagid na pagkamoot nagpapahiro saiya na masdan kita, tabangan kita, asin iligtas kita—kun namomotan asin kinukuyog niato sia. Mamomoton kitang tinatratar ni Jehova, minsan ngani kita garo daing halagang mga lukton. An salmista nagsabi: “Siisay an siring ki Jehova na satuyang Dios, sia na pinahalangkaw an saiyang erokan? Sia nagpapakumbaba na helingon an langit asin daga, na binabangon an mapakumbaba sa kabokabo.”—Salmo 113:5-7.
Siring sa ipinaliliwanag kan salmong ini, mamomoton na pinaaabot ni Jehova an tabang sa mapakumbaba. Iyo, Sia nagtatabang sa mga mapakumbabang ‘hinahanap an Dios ta tibaad pa talagang makua ninda sia.’ (Gibo 17:27) Idtong mga nakanonompong sa Dios—asin pinaglilingkodan sia—nagigin pa ngani mahal sa saiyang mga mata. (Ikomparar an Isaias 43:4, 10.) Kaya an mapakumbabang lukton nagseserbi na pagirumdomon kita kan sato mismong kadaihan nin halaga asin kan pagkamoot kan satong makakamhan sa gabos na Kaglalang, na itinatao an saiyang pakipagkatood asin dai na kutana maninigong kabootan sa makinuyog na mga tawo. Kamo daw nagpapaheling nin apresasyon sa pagkamoot nin Dios?