Kapahayagan—An Mamuraway na Kulminasyon Kaiyan Harani Na
Kapitulo 30: “An Dakulang Babilonya Naholog Na!”
1. Ano an ipinaiisi kan ikaduwang anghel, asin siisay an Dakulang Babilonya?
Oras na para sa paghokom nin Dios! Hinanyoga, kun siring, an banal na mensahe: “Asin an saro pa, an ikaduwang anghel, nagsunod, na nagsasabi: ‘Sia naholog na! An Dakulang Babilonya naholog na, sia na nagpainom sa gabos na nasyon kan arak kan kaanggotan nin saiyang pakikisaro!’” (Kapahayagan 14:8) Sa enot na pangyayari, pero bakong sa ultimo, an Kapahayagan nagtotorohok kan atension sa Dakulang Babilonya. Sa huri, ilaladawan sia kan kapitulo 17 na maluhong patotot. Siisay sia? Arog kan maheheling niato, sia panglobong imperyo, sia relihiyosa, asin sia an palsipikadong palakaw ni Satanas na saiyang ginagamit sa pakikilaban tumang sa banhi kan babae nin Dios. (Kapahayagan 12:17) An Dakulang Babilonya iyo an bilog na pankinaban na imperyo nin falsong relihiyon. Kaiba nia an gabos na relihiyon na nagpapadanay sa relihiyosong mga katokdoan asin gibo kan suanoy na Babilonya asin nagpapaheling kan saiyang espiritu.
2. (a) Paano na nakalakop sa bilog na daga an Babilonikong relihiyon? (b) Ano an pinakaprominenteng kabtang kan Dakulang Babilonya, asin kasuarin iyan naglataw bilang makapangyarihan na organisasyon?
2 Sa Babilonya, kaidtong labi nang 4,000 na taon an nakaagi, na rinibaraw ni Jehova an mga tataramon kan nagpaplanong mga magtogdok kan Torre ni Babel. An laen-laen na grupo nin mga tataramon nagkawararak sagkod sa kaporoporohi kan daga, na dara an apostatang mga paniniwala asin gibo na iyo an pasisikadan kan kadaklan na relihiyon sagkod ngonyan. (Genesis 11:1-9) An Dakulang Babilonya iyo an relihiyosong kabtang kan organisasyon ni Satanas. (Ikomparar an Juan 8:43-47.) An pinakaprominente niang kabtang ngonyan iyo an apostatang Kakristianohan, na naglataw bilang makapangyarihan, tampalasan na organisasyon kan ikaapat na siglo pakalihis ni Cristo, na an mga kredo asin pormalismo kinua, bakong sa Biblia, kundi sa kadaklan sa Babilonikong relihiyon.—2 Tesalonica 2:3-12.
3. Paano masasabi na an Dakulang Babilonya naholog na?
3 Tibaad ihapot nindo, ‘Mantang an relihiyon sagkod ngonyan may makosog na impluwensia sa daga, taano ta ipinaiisi kan anghel na naholog na an Dakulang Babilonya?’ Bueno, ano an nangyari kan 539 B.C.E. kan maholog an suanoy na Babilonya? Tara, an Israel nagin talingkas na magpuli sa sadiring daga kaiyan asin ibalik duman an tunay na pagsamba! Kaya an pakabalik kan espirituwal na Israel kan 1919 sa maaliwalas na espirituwal na prosperidad, na nagpapadagos asin naghihiwas sagkod ngonyan, ebidensia na an Dakulang Babilonya naholog kan taon na idto. Mayo na sia nin kapangyarihan na pogolan an banwaan nin Dios. Dugang pa, sia nagkaigwa nin grabeng problema sa laog nia mismo. Poon kan 1919 an saiyang karatan, pandadaya, asin inmoralidad nabuyagyag na gayo. Sa kadaklan na lugar sa Europa, pipira na sana an nagsisimba, asin sa dakol na sosyalistikong nasyon, an relihiyon ibinibilang na “opyo kan banwaan.” Napasopog sa mata nin gabos na namomoot sa Tataramon nin katotoohan nin Dios, an Dakulang Babilonya garo baga naghahalat ngonyan sa lugar nin mga sentensiadong magadan, para sa paggibo sa saiya kan matanos na paghokom ni Jehova.
An Makasosopog na Pagkaholog kan Babilonya
4-6. Paano na “an Dakulang Babilonya . . . nagpainom sa gabos na nasyon kan arak kan kaanggotan nin saiyang pakikisaro”?
4 Mas detalyado niatong siyasaton an mga pangyayaring nakapalibot sa makasosopog na pagkaholog kan Dakulang Babilonya. Sinasabi sa sato digdi kan anghel na “an Dakulang Babilonya . . . nagpainom sa gabos na nasyon kan arak kan kaanggotan nin saiyang pakikisaro.” Ano an boot sabihon kaini? Iyan may koneksion sa pagkadaog. Halimbawa, sinabihan ni Jehova si Jeremias: “Kuana sa sakong kamot an kopang ini kan arak nin kabangisan, asin painomon mo dian an gabos na nasyon na sobolan ko sa saimo. Asin sinda mairinom asin pagtatarakigan patin mahiro siring sa mga rungaw na tawo huli sa minasbad na ipadadara ko sa tahaw ninda.” (Jeremias 25:15, 16) Kan ikaanom asin ikapitong siglo B.C.E., ginamit ni Jehova an suanoy na Babilonya tanganing ibubo an simbolikong kopa nin kahorasaan na iinomon nin dakol na nasyon, kaiba an apostatang Juda, kaya ngani pati an sadiri niang banwaan nadistiyero. Dangan, naholog man an Babilonya huli ta an saiyang hade ilinangkaw an sadiri tumang ki Jehova, “an Kagurangnan kan kalangitan.”—Daniel 5:23.
5 An Dakulang Babilonya nandaog man, pero sa kadaklan, ini mas tuso. Saiyang ‘pinainom an gabos na nasyon’ paagi sa paggamit sa mga pakana nin sarong patotot, na naggigibo nin relihiyosong pakikisaro sa sainda. Inakit nia an politikal na mga namomoon na makipag-alyansa asin makikatood sa saiya. Paagi sa relihiyosong mga pan-akit, nagpakana sia nin politikal, komersial, asin ekonomikong pan-aapi. Nagsutsut sia nin relihiyosong paglamag asin relihiyosong mga guerra asin krusada, saka nasyonal na mga guerra, huli sana sa politikal asin komersial na mga dahelan. Asin pinakangbanal nia an mga guerrang ini sa pagsabi na iyan kabotan nin Dios.
6 An pangugunlabot nin relihiyon sa mga guerra asin politika kan ika-20 siglong ini aram nin gabos—arog kan sa Shintong Hapon, Hindung India, Budhistang Vietnam, “Kristianong” Northern Ireland asin Latin Amerika, saka sa iba pa—na dai linilingawan an kabtang kan kapelyan nin hukbo sa man-ibong-ibong na lado kan duwang guerra mundial sa pagsadol sa mga hobenes na maggaradanan. An tipikong halimbawa kan pakiiiba minsan kiisay kan Dakulang Babilonya iyo an kabtang nia sa Guerra Sibil nin España kan 1936-39, na duman kisuerra 600,000 an nagadan. An pagpabolos nin dugong ini sa sutsut kan mga parasuportar sa klerong Katoliko asin sa mga kaalyado ninda, na an sarong dahelan an kayamanan asin posisyon kan iglesya inuuma kan legal na gobyerno nin España.
7. Siisay an mayor na punteriya kan Dakulang Babilonya, asin anong mga paagi an ginamit nia tumang sa punteriyang ini?
7 Mantang an Dakulang Babilonya iyo an relihiyosong kabtang kan banhi ni Satanas, poon pa kaidto ginibo na niang mayor na punteriya an “babae” ni Jehova, an “Jerusalem sa itaas.” Kan enot na siglo, an kongregasyon nin linahidan na mga Kristiano malinaw na iyo an banhi kan babae. (Genesis 3:15; Galacia 3:29; 4:26) Pinagmaigotan kan Dakulang Babilonya na daogon an mabining kongregasyon na iyan paagi sa pagtentar dian na gumibo nin relihiyosong pakikisaro. Si apostol Pablo asin Pedro nagpatanid na dakol an madadara asin dakulang apostasiya an ibubunga. (Gibo 20:29, 30; 2 Pedro 2:1-3) An mga mensahe ni Jesus sa pitong kongregasyon nagparisa na sa paghinanapos kan buhay ni Juan, an Dakulang Babilonya may nagigibo nang pag-oswag sa saiyang mga paghihingoang manraot. (Kapahayagan 2:6, 14, 15, 20-23) Pero ipinaliwanag na ni Jesus kun gurano an itotogot na gibohon nia.
(Ipagpapadagos sa masunod na luwas.)