Sarong Liyabe sa Papangganang Buhay Pampamilya

“NAGLULUYA an satong pamilya,” sabi nin sarong kandidato sa pagkapresidente sa E.U. kan nakaaging taon. Tunay na nakakukubhan an pagluya kan pamilya. “Mapapanganga kita sa pagngalas,” an bareta kan magasin na Fortune, “kun magkakaigwa nin siring kadakulang mga pagkaliwat sa ekonomiya o industriya sa kaparehong lawig nin panahon.”

Minsan an mga pamilyang naghihingoang kumuyog sa mga prinsipyo kan Biblia sa parate apektado man sa makamomondong paagi. Kaidtong mga pirang taon na an nakaagi, an sarong ama nin anom na magtitin-edyer pa sana sinabihan nin may marahay na intension na kapwa Kristiano: “Malalaoman mo na mapasakinaban an apat sa mga aki mo.” Pero dai naniwala an amang ini na ini kaipuhan na mangyari minsan sa saro sa saiyang mga aki. Ipinaliwanag nia kun taano.

“An mga aki mi bako talagang samo,” sabi nia. “Sinda ipinaniwala samo mag-agom ni Jehova Dios, sarong ‘pamana,’ o balaog, hale sa saiya. Asin sinabi nia na kun sinda totokdoan mi sa tamang paagi, ‘dai sinda masiko dian.’ Kaya permi ming hiningoa na atamanon sinda na garo sinda rogaring ni Jehova.”​—Salmo 127:​3; Talinhaga 22:6.

Isinabi digdi kan ama an sarong liyabe sa mapangganang buhay pampamilya​—maninigong atamanon nin mga magurang an saindang mga aki na garo sinda nag-aataman sa rogaring nin Dios. Minsan ngani ini dai nangangahulogan na sa gabos na panahon makuyog an mga aki sa saindong marahay na paggiya, nasa saindo an paninimbagan na atamanon an mga aki na ipinaniwala sa saindo nin Dios.

Sarong Magabat na Paninimbagan

Itinatao nindo nin tama an pag-ataman na ini na may paggalang asin hararom na pagmakolog, bakong daing pagmamaan o indiperente. Naghihingoa kamo dian sa pakaaram na maninimbag kamo sa Dios para sa saiyang pamana, o balaog, sa saindo. Dai kaipuhan na mag-eksperimento sa laen-laen na paagi nin pagpadakula sa aki. An kaipuhan sana nin mga magurang mga instruksion nin Dios na itinao sa saiyang Tataramon, an Biblia, asin maingat ining sunodon.

Ini an instruksion ni Jehova Dios: “Dapat na idoon mo an [sakong mga tataramon] sa saimong [mga] aki asin sabihon iyan kun ika nagtutukaw sa saimong harong asin kun ika naglalakaw sa dalan asin kun ika naghihigda asin kun ika minabangon. Asin ibugkos mo iyan bilang tanda sa saimong kamot, asin iyan kaipuhan na magin garo banda sa saimong angog; asin isurat mo iyan sa mga harigi kan saimong harong asin sa saimong mga tata.” Nagsasadol man an Biblia: “Kamo, mga ama, . . . padagos na padakulaon [an saindong mga aki] sa disiplina asin pagtatanos nin isip ni Jehova.”​—Deuteronomio 6:​7-9; Efeso 6:4.

Kaya an pag-ataman sa mga aki nagkakaipo nin atension sa aroaldaw; iyo, iyan nangangahulogan nin daing kakuripotan na pagtao sainda kan saindong panahon asin nangorogna kan saindong pagkamoot asin hararom na pagmakolog. An mga magurang na tinatawan an saindang mga aki kan pundamental na mga pangangaipong ini ginigibo an sinasabi nin Dios na kaipuhan tanganing magkaigwa nin mapangganang buhay pampamilya.

Sa paghona daw nindo sobra man an hinahagad kaini? An dakol na magurang ipinaririsa na iyan an saboot ninda paagi sa saindang mga hiro. Alagad ta an mga balaog na ini hale sa Dios​—an saindong mga aki—​talagang maninigong tawan nin espesyal nanggad na atension.

Kun Paano Sinda Aatamanon

Madonong na konsideraron an halimbawa kan mga nagin mapanggana sa pagpadakula sa mga aki. An sarong magasin, sa estorya na nasa tutob na “Amazing Families,” may sinabing apat na bagay na importante sa mapangganang pagpadakula sa mga aki: “[1] Erestoryahan mientras na nagkakakan na nakapupukaw sa isip, [2] pakikiasosyar sa magagayon na libro, [3] inspirasyon nin mapag-imbentong mga arogan, [4] pakaaram na may tradisyon kan pamilya na dapat na papagdanayon.”​—U.S.News & World Report, Disyembre 12, 1988.

Mapadapit sa “erestoryahan mientras na nagkakakan,” girumdoma na an mga magurang pinagbobotan nin Dios na tokdoan an saindang mga aki kun nagtutukaw sinda sa harong. An saindo daw na pamilya dayaday na nagtutukaw sa palibot nin lamesa sa pagkakan, sa siring nagtatao nin pan-aroaldaw na mga oportunidad sa pag-iribaiba asin nakapupukaw na erestoryahan? An siring na mga panahon kaipuhan asin dai nalilingawan nin mga aki, na nagtatao sainda kan pakamate nin kasarigan asin katiwasayan. An sarong sais anyos nagsabi na gusto nia an mga oras nin pagkakan “ta dai ka nahahadit manongod sa kada saro,” mantang magkairiba an gabos.

Kumusta man an kuwalidad kan saindong erestoryahan mientras na nagkakakan? Iyan daw parateng nakasentro sa mga laog nin “magagayon na libro,” kaiba an Biblia asin mga babasahon na basado sa Biblia na nagpapaliwanag kan satong paglilingkod sa Dios o kan mga bagay na may koneksion sa mga linalang nin Dios? Apuwera sa arog kaining erestoryahan mientras na nagkakakan, paagi sa regular na programa sa pag-adal, kaipuhan na pataluboon nin mga magurang sa saindang mga aki an pagkamoot ki Jehova asin sa saiyang matanos na mga pagboot.

“Daing problema sa regular na pag-iriba sa pagkakan,” an paliwanag kan ama nin anom na nasambitan sa enotan. “Ini automatiko na, asin iyan nakabogkos sa samo. Pero masakit an pagkakaigwa nin regular na programa nin pag-adal sa Biblia.” Huli sa makuring kapagalan pakalihis nin sarong aldaw nin magabat na trabaho, kun beses napapatorog sia sa oras kan pag-adal. Pero, nungka na ipinondo nia an pangengenot sa regular na pag-adal sa Biblia kaiba kan saiyang mga aki, asin sia dayaday na nakikipag-olay sa kada saro sa sainda asin naghihinanyog sa sainda nin haloy.

Apuwera sa pangengenot sa makahulogan na erestoryahan mientras na nagkakakan asin pagtao kan pakikiasosyar nin magagayon na libro, sinisierto daw nindo na an saindong mga aki mag-ako kan “inspirasyon nin mapag-imbentong mga arogan”? An totoo, an pag-areglo na an saindong mga aki regular na makiasosyar sa mga nag-aarog sa kadarudakulaing tawong nabuhay, si Jesu-Cristo, kaipuhan tangani na sinda magin mapangganang mga adulto.

Ultimo, kumusta man an “pakaaram na may tradisyon kan pamilya na dapat na papagdanayon”? Kaipuhan na masabotan kan saindong mga aki na may mga pamantayan an pamilya na linalaoman na suportaran ninda​—na may mga gawe, pagtaram, gubing, ugale, asin iba pa, na dai puwede asin naglalapas sa tradisyon kan pamilya. Kaipuhan na marealisar ninda na magabat na bagay an paglapas sa tradisyon kan pamilya​—na kamo makokolgan nin makuri, arog kan suanoy na patriarkang si Jacob, na an mga aki ginibo siang “magin mabata sa mga nag-eerok sa daga” huli sa saindang makasosopog na gawe.​—Genesis 34:30.

An ama nin anom na ibinilang na rogaring nin Dios an saiyang mga aki idinoon nangorogna an “tradisyon kan pamilya.” Danay siang nakipagrasonan sa saiyang mga aki sa kun paano an pamantayan kan pamilya sa gubing, pag-alinyar, asin pagigin siblag sa mga ugale kan kinaban kaoyon sa espiritu asin paggiya kan Kaglalang, si Jehova Dios. Bilang resulta kan dakol na panahon, pagkamoot, asin hararom na pagmakolog na itinao sa sainda​—na tinokdoan sa dalan na maninigo nindang lakawan—​an gabos sa anom na aki naghimate paagi sa ‘dai pagsiko sa dalan para sa sainda.’​—Talinhaga 22:6.

Sa bilog na kinaban, rinibo an siring na marigon na mga pamilya. An mga ini dakulang kaomawan sa saindang Kaglalang, asin dakulang balos sinda sa bakong paslo, mamomoton na mga magurang! Sa pag-agi nin mga taon, an siring na mga magurang orog na inaapresyar nin mga aki na nakinabang sa saindang mga paghihingoa. Tabi sumunod na horophoropon an estorya nin sarong babae na pinadakula nin diosnon na mga magurang, asin mangnoha an mahahalagang leksion na manonodan dian.