Kapahayagan—An Mamuraway na Kulminasyon Kaiyan Harani Na

Kasumpay kan Kapitulo 30: “An Dakulang Babilonya Naholog Na!”

An Trigo Asin Doot

8, 9. (a) Ano an ipinarisa kan parabola ni Jesus manongod sa trigo asin mga doot? (b) Ano an nangyari “mantang natotorog an mga tawo”?

⁸ Sa parabola nia manongod sa trigo asin doot, si Jesus nagtaram manongod sa sarong lalaki na nagsabwag nin marahay na banhi sa sarong oma. Alagad ta “mantang natotorog an mga tawo,” nagdatong an kaiwal asin nagsabwag nin mga doot. Kaya, an trigo natahoban nin mga doot. Ipinaliwanag ni Jesus an saiyang parabola sa mga tataramon na ini: “An nagsabwag kan marahay na banhi iyo an Aki nin tawo; an oma iyo an kinaban; kun manongod sa marahay na banhi, an mga ini iyo an mga aki kan kahadean; alagad an mga doot iyo an mga aki kan maraot, asin an kaiwal na nagsabwag sa sainda iyo an Diablo.” Dangan ipinaliwanag nia na an trigo asin doot pababayaan na tumubong magkadungan sagkod sa “pagtatapos kan palakaw nin mga bagay,” kun ‘haleon’ na kan mga anghel an simbolikong mga doot.​—Mateo 13:​24-30, 36-43.

⁹ Nangyari an ipinatanid ni Jesus asin ni apostol Pablo saka Pedro. “Mantang natotorog an mga tawo,” magsalang pakatorog kan mga apostol sa kagadanan o kan an mga paraataman na Kristiano magtungka sa pagbantay sa aripompon nin Dios, an Babilonikong apostasiya tuminubo sa laog mismo kan kongregasyon. (Gibo 20:31) Dai nahaloy an mga doot nalabihan na gayo sa bilang an trigo asin tinahoban iyan. Sa nagkapirang siglo, tibaad garo baga an banhi kan babae biyong natahoban kan mahiwas na palda kan Dakulang Babilonya.

10. Ano an nangyari kan mga taon nin 1870, asin ano an reaksion digdi kan Dakulang Babilonya?

¹⁰ Kan mga taon nin 1870 an linahidan na mga Kristiano nagpoon na gumibo nin desididong mga paghihingoa na sumiblag sa mga pagpapatotot kan Dakulang Babilonya. Tinalikdan ninda an falsong mga doktrina na ilinaog kan Kakristianohan hale sa paganismo asin mapusong ginamit an Biblia sa paghuhulit na an mga panahon kan mga Hentil matatapos kan 1914. An pangenot na instrumento kan Dakulang Babilonya, an klero nin Kakristianohan, tinumang an mga pagpopoon na ini kan pagbabalik kan tunay na pagsamba. Kaidtong enot na guerra mundial, inaprobetsaran ninda an pagkabangkag sa guerra tanganing probaran na paraon an sadit na grupong idto nin maimbod na mga Kristiano. Kan 1918, kan haros biyo nang napogolan an saindang mga aktibidad, garo baga nagin mapanggana an Dakulang Babilonya. Garo baga nadaog nia sinda.

11. Ano an ibinunga kan pagkaholog kan suanoy na Babilonya?

¹¹ Arog kan nasambitan niato, an maabhaw na siudad nin Babilonya buminagsak sa kapangyarihan kan 539 B.C.E. Dangan nadangog an kurahaw: “Sia naholog na! An Babilonya naholog na!” An dakulang trono kan pankinaban na imperyo naholog sa mga hukbo nin Medo-Persia sa pangengenot ni Cirong Dakula. Minsan ngani an siudad mismo natada, an pagkaholog nia sa kapangyarihan tunay, asin iyan nagbunga kan pagkatalingkas kan saiyang mga bihag na Judio. Nagpuli sinda sa Jerusalem tanganing patindogon liwat duman an dalisay na pagsamba.​—Isaias 21:9; 2 Cronica 36:​22, 23; Jeremias 51:​7, 8.

12. (a) Sa satong siglo, paano masasabi na naholog na an Dakulang Babilonya? (b) Ano an nagpapatunay na biyo nang isinikwal ni Jehova an Kakristianohan?

¹² Sa satong siglo nadangog man an kurahaw na naholog na an Dakulang Babilonya! An temporaryong kapangganahan kan Babilonikong Kakristianohan kan 1918 biyong nabaliktad kan 1919 kan an natatada sa mga linahidan, an grupong Juan, ibalik paagi sa espirituwal na pagkabuhay liwat. An Dakulang Babilonya naholog na kun dapit sa pagkaigwa nin ano man na pamomogol sa banwaan nin Dios. Kapareho nin mga doron, an linahidan na mga tugang ni Cristo luminuwas hale sa bungaw, na andam sa paghiro. (Kapahayagan 9:​1-3; 11:​11, 12) Sinda an modernong “maimbod asin madonong na oripon,” asin ninombrahan sinda kan Kagurangnan na mamahala sa gabos niang rogaring digdi sa daga. (Mateo 24:​45-47) An paggamit sa sainda sa paaging ini nagpatunay na biyo nang isinikwal ni Jehova an Kakristianohan sa ibong kan paghihingako kaini na iyo an saiyang representante digdi sa daga. An dalisay na pagsamba naestablisar liwat, asin bukas na an dalan sa pagtapos kan pagtatak sa natatada sa 144,000​—an mga matatada sa banhi kan babae, an suanoy nang kaiwal kan Dakulang Babilonya. Ini gabos tanda nin biyong pagkadaog kan satanikong relihiyosong organisasyon na iyan.

Pagtagal Para sa mga Banal

13. (a) Ano an ipinaisi kan ikatolong anghel? (b) Ano an paghokom ni Jehova sa mga nag-ako kan tanda kan mabangis na hayop?

¹³ Ngonyan nagtaram an ikatolong anghel. Hinanyoga! “Asin an saro pang anghel, an ikatolo, nagsunod sa sainda, na nagsasabi sa makosog na tingog: ‘Kun an siisay man nagsasamba sa mabangis na hayop asin sa ladawan kaiyan, asin nag-aako nin tanda sa saiyang angog o sa saiyang kamot, sia man mainom sa arak kan kaanggotan nin Dios na ibububo nin daing kasalak sa kopa kan saiyang kabangisan.’ ” (Kapahayagan 14:​9, 10a) Sa Kapahayagan 13:​16, 17, ihinayag na sa aldaw kan Kagurangnan an mga dai nagsasamba sa ladawan kan mabangis na hayop masasakitan​—gagadanon pa ngani. Ngonyan nanonodan niato na katuyohan ni Jehova na hokoman an mga “igwa kan tanda, an ngaran kan mabangis na hayop o an bilang kan ngaran kaiyan.” Sinda mapipiritan na uminom sa mapait na ‘kopa nin kabangisan’ kan kaanggotan ni Jehova. Ano an magigin kahulogan kaini para sa sainda? Kan 607 B.C.E., kan piriton ni Jehova an Jerusalem na uminom kan “saiyang kopa nin kabangisan,” an siudad nag-agi nin “pananalakat asin pagkagaba, asin gutom patin minasbad” sa kamot kan mga Babilonyo. (Isaias 51:​17, 19) Siring man, kun an mga nagsasamba sa politikal na mga kapangyarihan sa daga asin sa saindang ladawan, an Naciones Unidas, uminom na sa kopa kan kabangisan ni Jehova, an magigin resulta kalamidad para sa sainda. (Jeremias 25:​17, 32, 33) Sinda biyong lalaglagon.

14. Bago pa man an paglaglag sa mga nagsasamba sa mabangis na hayop asin sa ladawan kaiyan, ano an kaipuhan na agihan kan mga ini, asin paano ini ilinaladawan ni Juan?

¹⁴ Alagad, bago pa man iyan mangyari, an mga may tanda kan hayop kaipuhan na umagi sa nagpapasakit na mga epekto kan dai pag-oyon ni Jehova. Sa pagtaram manongod sa nagsasamba sa mabangis na hayop asin sa ladawan kaiyan, sinabihan kan anghel si Juan: “Asin sia pasasakitan sa kalayo asin asupre sa atubang kan banal na mga anghel asin sa atubang kan Kordero. Asin an aso kan saindang kasakitan nag-iitaas sagkod lamang, asin aldaw-banggi dai sinda nin kapahingaloan, an mga nagsasamba sa mabangis na hayop asin sa ladawan kaiyan, asin an siisay man na nag-ako kan tanda kan ngaran kaiyan.”​—Kapahayagan 14:10b, 11.

15, 16. Ano an kahulogan kan mga tataramon na “kalayo asin asupre” sa Kapahayagan 14:10?

¹⁵ Ibinilang nin iba na an pagkasambit digdi sa kalayo asin asupre (“fire and brimstone,” King James Version) pruweba sa pag-eksister nin impiernong may kalayo. Pero an kadikit na pagsiyasat sa nakaaagid na hula nagpapaheling kan tunay na kahulogan kan mga tataramon na ini sa kontekstong ini. Kaidtong kaaldawan ni Isaias, pinatanidan ni Jehova an nasyon nin Edom na sinda padudusahan huli sa pakikiiwal ninda sa Israel. Sia nagsabi: “An saiyang mga salog magigin alkitran, asin an saiyang kabokabo magigin asupre; asin an saiyang daga magigin naglalaad na alkitran. Sa banggi o sa aldaw iyan dai mapaparong; sagkod sa panahon na daing katapusan an aso kaiyan dagos-dagos na mag-iitaas. Sa sunod-sunod na kapag-arakian sia magigin alang; sagkod lamang mayo nin siisay man na maagi sa saiya.”​—Isaias 34:​9, 10.

¹⁶ Iinapon daw an Edom sa mitikong impiernong may kalayo tanganing masolo sagkod lamang? Siyempre dai. Imbes, an nasyon biyong nawara sa kinaban na garo sia biyong nasolo nin kalayo asin asupre. An ultimong resulta kan padusa bakong daing katapusan na pasakit kundi “kadaihan nin laog . . . kagabaan . . . daing kamanungdanan.” (Isaias 34:​11, 12) An aso na ‘nag-iitaas sagkod sa panahon na daing katapusan’ buhay na nag-iilustrar kaini. Kun nasosolo an sarong harong, haloy-haloy na nag-aaso an mga abo pagkagadan kan laad, na nagtatao nin ebidensia sa mga miron na nagkaigwa nin mapanlaglag na pagkasolo. Minsan ngonyan an banwaan nin Dios nakakagirumdom sa leksion na dapat na manodan sa pagkalaglag kan Edom. Sa paaging ini ‘an aso kan saiyang pagkasolo’ nag-iitaas pa sagkod ngonyan sa simbolikong paagi.

17, 18. (a) Ano an resulta para sa mga nag-ako kan tanda kan mabangis na hayop? (b) Sa anong paagi na pinasasakitan an mga nagsasamba sa mabangis na hayop? (c) Paano na “an aso kan saindang kasakitan nag-iitaas sagkod lamang”?

¹⁷ An mga may tanda kan mabangis na hayop biyo man na lalaglagon, na garo sa kalayo. Arog kan ipinaheheling sa huri kan hula, an saindang bangkay dai ilolobong tanganing kakanon nin mga hayop asin gamgam. (Kapahayagan 19:​17, 18) Kaya malinaw na dai sinda literal na pinasasakitan sagkod lamang! Paano sinda “pasasakitan sa kalayo asin asupre”? Sa sentido na an pagbalangibog kan katotoohan nagbubuyagyag sa sainda asin nagpapatanid sa sainda manongod sa nagdadangadang na paghokom nin Dios. Kaya binabalobagi ninda an banwaan nin Dios asin, kun saen puwede, tuso nindang kinokombensir an politikal na mabangis na hayop na lamagon asin gadanon pa ngani an mga Saksi ni Jehova. Bilang kulminasyon, an mga paratumang na ini lalaglagon na garo sa kalayo asin asupre. Dangan “an aso kan saindang kasakitan nag-iitaas sagkod lamang” ta an paghokom sa sainda nin Dios magseserbing pamantayan kun halimbawa angaton liwat an may diretsong soberaniya ni Jehova. An isyung iyan napagdesisyonan na sagkod lamang.

¹⁸ Siisay an nagtatao kan nagpapasakit na mensahe ngonyan? Girumdoma, an simbolikong mga doron may kapangyarihan na pasakitan an mga tawo na mayo kan tatak nin Dios sa saindang angog. (Kapahayagan 9:5) Malinaw na an mga ini na ginigiyahan nin mga anghel iyo an mga parapasakit. Desididong marhay an simbolikong mga doron kaya “aldaw-banggi dai sinda nin kapahingaloan, an mga nagsasamba sa mabangis na hayop asin sa ladawan kaiyan, asin an siisay man na nag-ako kan tanda kan ngaran kaiyan.” Asin sa katapustapusi, pagkalaglag ninda, an dakulaon na ebidensia kan pagkabindikar na iyan kan soberaniya ni Jehova, “an aso kan saindang kasakitan,” mag-iitaas sagkod lamang. Makatagal logod an grupong Juan sagkod na matapos an bindikasyon na iyan! Arog kan konklusyon kan anghel: “Digdi nangangaipo nin pakatagal sa mga banal, an mga nag-ootob sa mga pagboot nin Dios asin sa pagtubod ni Jesus.”​—Kapahayagan 14:12.

19. Taano ta kaipuhan an pakatagal kan mga banal, asin ano an ibinabareta ni Juan na nagpapakosog sa sainda?

¹⁹ Iyo, an “pakatagal sa mga banal” nangangahulogan kan saindang pagsamba ki Jehova na may esklusibong debosyon paagi ki Jesu-Cristo. An saindang mensahe bakong popular. Iyan nagbubunga nin pagtumang, paglamag, pagkagadan pa ngani bilang martir. Pero sinda napakokosog kan sumunod na ibinabareta ni Juan: “Asin nakadangog ako nin tingog hale sa langit na nagsabi: ‘Isurat mo: Maogma an mga gadan na nagagadan na kasaro kan Kagurangnan poon sa panahon na ini padagos. Iyo, sabi kan espiritu, magpahingalo na sinda sa saindang mga pagpapagal, huli ta an mga bagay na saindang ginibo kaibanan ninda.’ ”​—Kapahayagan 14:13.

20. (a) Paano an panuga na ibinareta ni Juan kaoyon kan hula ni Pablo manongod sa presensia ni Jesus? (b) An mga kabilang sa linahidan na nagadan pakapahalea ki Satanas sa langit pinanugaan nin anong espesyal na pribilehiyo?

²⁰ An panugang ini kaoyon na gayo kan hula ni Pablo manongod sa presensia ni Jesus: “An mga nagadan na kasaro ni Cristo enot na maburuhat. Dangan kita na buhay pa na nawawalat [an mga kabilang sa mga linahidan na nabubuhay sagkod sa aldaw kan Kagurangnan], kaibanan ninda, aagawon sa mga panganoron tanganing sabaton an Kagurangnan sa doros.” (1 Tesalonica 4:​15-17) Pakapahalea ki Satanas sa langit, an mga gadan kasaro ni Cristo nabuhay nin enot. (Ikomparar an Kapahayagan 6:​9-11.) Dangan, an mga kabilang sa linahidan na nagagadan sa aldaw kan Kagurangnan pinanugaan nin espesyal na pribilehiyo. An pagkabuhay ninda liwat sa espiritung buhay sa langit bigla, “sa sarong pagpirok nin mata.” (1 Corinto 15:52) Ini makangangalas nanggad! Asin an saindang mga gibo nin katanosan nagpapadagos sa langit.

Pag-ani sa Daga

21. Ano an sinasabi sato ni Juan manongod sa “anihon kan daga”?

²¹ May iba man na makikinabang sa aldaw na ini nin paghokom, arog kan padagos na sinasabi sato ni Juan: “Asin ako nagheling, asin, uya! an sarong panganoron na maputi, asin sa ibabaw kan panganoron may sarong nagtutukaw na kaagid nin aki nin tawo, na may koronang bulawan sa saiyang payo asin matarom na kagot sa saiyang kamot. Asin an saro pang anghel [an ikaapat] nagluwas sa santuaryo kan templo, na nagkukurahaw sa makosog na tingog sa saro na nagtutukaw sa ibabaw kan panganoron: ‘Tigpasan an saimong kagot asin mag-ani ka, huli ta nagdatong na an oras na mag-ani, ta an anihon kan daga hinog na.’ Asin an saro na nagtutukaw sa ibabaw kan panganoron itinigpas an saiyang kagot sa daga, asin an daga naani.”​—Kapahayagan 14:​14-16.

22. (a) Siisay an may koronang bulawan asin nagtutukaw sa maputing panganoron? (b) Noarin mangyayari an kulminasyon kan pag-ani, asin paano?

²² Daing duda kun siisay an nagtutukaw sa maputing panganoron. Nagtutukaw sa maputing panganoron, kaagid nin aki nin tawo asin may koronang bulawan, malinaw na sia si Jesus, an Mesiyanikong Hade na naheling man ni Daniel sa bisyon. (Daniel 7:​13, 14; Marcos 14:​61, 62) Alagad ta ano an pag-ani na ihinula digdi? Kan nasa daga, ibinaing ni Jesus an paggibo nin mga disipulo sa pag-ani sa oma nin katawohan. (Mateo 9:​37, 38; Juan 4:​35, 36) An kulminasyon kan pag-aning ini minaabot sa aldaw kan Kagurangnan, kun si Jesus koronahan na bilang Hade asin maghokom para sa saiyang Ama. Kaya, an panahon nin saiyang paghade, poon kan 1914, iyo man an magayagayang panahon nin pag-ani.​—Ikomparar an Deuteronomio 16:​13-15.

23. (a) Kiisay naghale an instruksion na pumoon na sa pag-ani? (b) Anong pag-ani an nangyari poon 1919 sagkod ngonyan?

²³ Minsan ngani sia Hade asin Hokom, si Jesus naghahalat nin instruksion hale ki Jehova na saiyang Dios bago sia pumoon na mag-ani. An instruksion na iyan hale sa “santuaryo kan templo” paagi sa sarong anghel. Tolos-tolos, si Jesus nagkuyog. Enot, poon 1919, ipinatapos nia sa saiyang mga anghel an pag-ani sa 144,000. (Mateo 13:​39, 43) Sumunod, nangyari an pagtipon sa dakulang kadaklan nin ibang karnero. (Mateo 25:​31-33; Juan 10:16; Kapahayagan 7:9) Ipinaheheling kan kasaysayan na sa pag-oltanan nin 1931 asin 1935 an dakol sa ibang karnerong ini nagpoon na lumataw. Kan 1935 binukasan ni Jehova sa pagsabot kan grupong Juan kun siisay an tunay na dakulang kadaklan sa Kapahayagan 7:​9-17. Poon kaidto, dakulang pagdodoon an itinao sa pagtipon sa kadaklan na ini. Kan taon 1990, an kabilangan kaiyan luminabi sa apat na milyon, asin iyan nagdadakol pa. Tunay nanggad, an saro na kaagid nin aki nin tawo nagkaigwa nin abunda, magayagayang pag-ani sa panahon na ini kan katapusan.​—Ikomparar an Exodo 23:16; 34:22.

Pagbatay sa Poon nin Ubas kan Daga

24. Ano an nasa kamot kan ikalimang anghel, asin ano an ikinukurahaw kan ikaanom na anghel?

²⁴ Mantang tapos na an pag-ani sa kaligtasan, panahon na para sa saro pang pag-ani. Si Juan nagbabareta: “Asin may saro pang anghel [an ikalima] na nagluwas sa santuaryo kan templo na yaon sa langit, na sia man igwa nin matarom na kagot. Asin may saro pang anghel [an ikaanom] na nagluwas sa altar asin sia igwa nin kapangyarihan sa kalayo. Asin inapod nia sa makosog na tingog an saro na igwa kan matarom na kagot, na an sabi: ‘Tigpasan an saimong matarom na kagot asin gunoa an mga bagikoy kan poon nin ubas kan daga, ta hinog na an mga ubas kaiyan.’ ” (Kapahayagan 14:​17, 18) An mga hukbo nin anghel tinawan nin dakol na aanihon sa aldaw kan Kagurangnan, an pagsiblag kan mga marahay sa maraot!

25. (a) Ano an ipinaririsa kan bagay na an ikalimang anghel hale sa santuaryo kan templo? (b) Taano ta angay na an pagboot na pumoon sa pag-ani hale sa sarong anghel na “nagluwas sa altar”?

²⁵ An ikalimang anghel gikan sa presensia ni Jehova sa santuaryo kan templo; kaya, an ultimong pag-ani nangyayari man sono sa kabotan ni Jehova. An anghel pinagbotan na ponan an saiyang trabaho nin sarong mensahe na itinao paagi sa saro pang anghel na “nagluwas sa altar.” An bagay na ini makahulogan nanggad, ta an maimbod na mga kalag sa sirong kan altar naghapot: “Sagkod noarin, Soberanong Kagurangnan na banal asin totoo, na dai mo hohokoman asin sisingilon an samong dugo sa mga nag-eerok sa daga?” (Kapahayagan 6:​9, 10) Sa pag-ani kan poon nin ubas kan daga, mapaninigoan na an kurahaw na ini nin pamalos.

26. Ano an “poon nin ubas kan daga”?

²⁶ Alagad ta ano an “poon nin ubas kan daga”? Sa Hebreong Kasuratan, an Judiong nasyon inapod na poon nin ubas ni Jehova. (Isaias 5:7; Jeremias 2:21) Siring man, si Jesu-Cristo asin an mga maglilingkod kaiba nia sa Kahadean nin Dios inaapod na poon nin ubas. (Juan 15:​1-8) Sa kamugtakan na ini, an mahalagang karakteristiko nin poon nin ubas iyo na iyan namumunga, asin an tunay na Kristianong poon nin ubas namunga nin abunda sa ikaoomaw ni Jehova. (Mateo 21:43) Kun siring, an “poon nin ubas kan daga” seguradong, bakong an tunay na poon nin ubas na ini, kundi an palsipikasyon dian ni Satanas, an saiyang maraot na naheheling na palakaw nin gobyerno sa katawohan, na may laen-laen na “bagikoy” nin bunga kan mga demonyo sa nag-aging mga siglo. An Dakulang Babilonya, na dian prominenteng marhay an apostatang Kristianismo, may dakulang impluwensia sa mararang poon nin ubas na ini.​—Ikomparar an Deuteronomio 32:​32-35.

27. (a) Ano an nangyayari kun an anghel na may kagot tiponon na an poon nin ubas kan daga? (b) Anong mga hula sa Hebreong Kasuratan an nagpaparisa kun gurano kahiwas an pag-ani?

²⁷ Dapat na gibohon an paghokom! “Asin itinigpas kan anghel an saiyang kagot sa daga asin ginuno an poon nin ubas kan daga, asin ihinolog nia idto sa dakulang ligisan kan kaanggotan nin Dios. Asin an ligisan binatayan sa luwas kan siudad, asin may nagluwas na dugo sa ligisan sagkod sa mga busal kan mga kabayo, sa rayo na sarong ribo anom na gatos na estadio.” (Kapahayagan 14:​19, 20) An kaanggotan ni Jehova sa poon nin ubas na ini haloy nang ipinaisi. (Sofonias 3:8) An hula sa librong Isaias sinisierto na bilog na mga nasyon an lalaglagon kun batayan na an ligisan. (Isaias 63:​3-6) Si Joel naghula man na an darakulang “kadaklan,” bilog na mga nasyon, babatayan sa kalaglagan sa “ligisan,” sa “kababan kan desisyon.” (Joel 3:​12-14) Tunay nanggad, ini dakulaon na pag-ani na dai na noarin man mapapantayan! Sono sa bisyon ni Juan, bako sana na aanihon an mga ubas kundi an bilog na simbolikong poon nin ubas papalodon asin iaapon sa ligisan tanganing batayan. Kaya an poon nin ubas kan daga paparaon asin dai na noarin man matubo liwat.

28. Siisay an nagbabatay sa poon nin ubas kan daga, asin ano an boot sabihon na an ligisan “binatayan sa luwas kan siudad”?

²⁸ An pagbatay sa bisyon ginigibo nin mga kabayo, ta an dugo na napupuga sa poon nin ubas nakaaabot sa “mga busal kan mga kabayo.” Mantang an terminong “kabayo” parateng may koneksion sa guerra, segurado na ini panahon nin guerra. An mga hukbo kan kalangitan na nagsusunod ki Jesus sa ultimong pakikilaban tumang sa palakaw nin mga bagay ni Satanas sinasabing nagbabatay sa “ligisan kan kaanggotan kan kabangisan nin Dios na Makakamhan sa gabos.” (Kapahayagan 19:​11-16) Malinaw na ini an mga nagbabatay sa poon nin ubas kan daga. An ligisan “binatayan sa luwas kan siudad,” an boot sabihon, sa luwas kan langitnon na Sion. Tunay nanggad, angay sana na an poon nin ubas kan daga batayan digdi sa daga. Pero iyan man ‘babatayan sa luwas kan siudad’ ta dai maaano an natatada sa banhi kan babae, na nagrerepresentar sa langitnon na Sion digdi sa daga. Sinda kaiba an dakulang kadaklan ligtas na itatago sa laog kan daganon na organisasyonal na areglo ni Jehova.​—Isaias 26:​20, 21.

29. Gurano kararom kan dugo hale sa ligisan, gurano karayo an naaabot kaiyan, asin ano an ipinaririsa kaini gabos?

²⁹ An buhay na marhay na bisyon na ini may katimbang sa pagronot kan gapo kan Kahadean sa mga kahadean kan daga na sinasabi sa Daniel 2:​34, 44. Magkakaigwa nin pagpara. An salog nin dugo hale sa ligisan hararomon, sagkod sa mga busal kan mga kabayo, asin iyan sagkod sa rayong 1,600 na estadio.a An dakulaon na numerong ini, na resulta kan pagmultiplikar kan kuwatro por kuwatro asin dies por dies (4 x 4 x 10 x 10), may pagdodoon na nagpapahayag kan mensahe na an ebidensia sa panlaglag mapapalabot an bilog na daga. (Isaias 66:​15, 16) An panlaglag magigin kompleto asin dai na marerebokar. Nungka, nungka pang magkakagamot an poon nin ubas sa daga ni Satanas!​—Salmo 83:​17, 18.

30. Ano an mga bunga kan poon nin ubas ni Satanas, asin ano an maninigong magin determinasyon niato?

³⁰ Mantang kita nabubuhay na sa poro kan panahon kan katapusan, an bisyon sa duwang pag-aning ini makahulogan nanggad. Kaipuhan sana kitang mangalagkalag tanganing maheling an bunga kan poon nin ubas ni Satanas. Mga aborsion asin iba pang porma nin paggadan; homoseksuwalidad, pagsambay, asin iba pang klase nin inmoralidad; pandadaya asin kadaihan nin natural na pagkamoot​—an gabos na bagay na siring ginigibong makababalde an kinaban na ini sa mga mata ni Jehova. An poon nin ubas ni Satanas nagpapaluwas kan “bunga nin nakaiilong poon asin ajenjo.” An mapanlaglag, idolatrosong gibo kaiyan nakararaot sa dangog kan Dakulang Kaglalang nin katawohan. (Deuteronomio 29:18; 32:5; Isaias 42:​5, 8) Kanigoan kadakulang pribilehiyo na aktibong makaasosyar kan grupong Juan sa pag-ani nin marahay na mga bunga na pinaluluwas ni Jesus sa ikaoomaw ni Jehova! (Lucas 10:2) Kita logod gabos magin determinado na noarin man dai kita madigtaan kan poon nin ubas kan kinaban na ini, asin sa siring makalikay kitang batayan kaiba kan poon nin ubas kan daga kun gibohon na an pagsilot ni Jehova.

[Nota sa Ibaba]