Kapahayagan—An Mamuraway na Kulminasyon Kaiyan Harani Na

Kasumpay kan Kapitulo 32: An Kaanggotan nin Dios Tinapos

“Nangyari Na!”

34. Sa ano iinula kan ikapitong anghel an saiyang mangko, asin anong proklamasyon an “nagluwas sa santuaryo hale sa trono”?

³⁴ “Asin an ikapito iinula an saiyang mangko sa doros. Dangan an sarong makosog na tingog nagluwas sa santuaryo hale sa trono, na nagsasabi: ‘Nangyari na!’”​—Kapahayagan 16:17.

35. (a) Ano an “doros” sa Kapahayagan 16:17? (b) Sa pag-ula kan saiyang mangko sa doros, ano an ipinahahayag kan ikapitong anghel?

³⁵ An “doros” iyo an ultimong pansustenir sa buhay na dadamaton. Pero ini bakong an literal na doros. Mayong makukuang dahelan sa literal na doros na iyan maninigong silotan ni Jehova, siring na an literal na daga, dagat, mga burabod nin tubig, o aldaw dai maninigong silotan ni Jehova. Imbes, ini an “doros” na sinasabi ni Pablo kan apodon nia si Satanas na “poon kan autoridad kan doros.” (Efeso 2:2) Iyan an satanikong “doros” na hinahangos kan kinaban ngonyan, an espiritu, o pankagabsan na inklinasyon nin isip, na lakop sa saiyang bilog na maraot na palakaw nin mga bagay, an satanikong kaisipan na lakop sa gabos na kabtang nin buhay sa luwas kan organisasyon ni Jehova. Kaya sa pag-ula kan saiyang mangko sa doros, ipinahahayag kan ikapitong anghel an kaanggotan nin Dios tumang ki Satanas, sa saiyang organisasyon, asin sa gabos na nagmomotibar sa katawohan na suportaran si Satanas sa paglaban sa soberaniya ni Jehova.

36. (a) Ano an pitong damat? (b) Ano an ipinaririsa kan proklamasyon ni Jehova na: “Nangyari na!”?

³⁶ Ini asin an naenot na anom na damat iyo an kabilogan kan mga paghokom ni Jehova tumang ki Satanas asin sa saiyang palakaw. Iyan kapahayagan nin kapahamakan para ki Satanas asin sa saiyang banhi. Kun iula na an ultimong mangkong ini, si Jehova mismo nagpapahayag: “Nangyari na!” Mayo na nin ibang masasabi. Kun an mga laog kan mga mangko kan kaanggotan nin Dios ikinabalangibog na sagkod sa punto na kontento na si Jehova, dai maaatraso an paggibo nia kan mga paghokom na ibinalangibog kan mga mensaheng ini.

37. Paano ilinaladawan ni Juan an mangyayari pakaulaan kan ikapitong mangko kan kaanggotan nin Dios?

³⁷ Si Juan nagpapadagos: “Asin nagkaigwa nin mga kikilat asin tingog patin dagoldol, asin nangyari an makosog na linog na dai pang kaagid na nangyari poon kan magkaigwa nin mga tawo sa daga, mahiwason na linog, makosogon. Asin nagkatolo an dakulang siudad, asin naholog an mga siudad kan mga nasyon; asin nagirumdoman an Dakulang Babilonya sa atubang nin Dios, tanganing tawan sia kan kopa nin arak kan kabangisan kan saiyang kaanggotan. Siring man, an gabos na isla nagdurulag, asin an mga bukid dai na nagkakurua. Asin an makosog na oran nin graniso na an lambang gapo mga sarong talento an gabat naholog hale sa langit sa mga tawo, asin an mga tawo nagralanghad sa Dios huli sa damat na graniso, ta an damat na iyan makosogon nanggad.”​—Kapahayagan 16:​18-21.

38. Ano an isinisimbolo (a) kan “makosog na linog”? (b) kan bagay na “an dakulang siudad,” an Dakulang Babilonya, “nagkatolo”? (c) kan bagay na “an gabos na isla nagdurulag, asin an mga bukid dai na nagkakurua”? (d) kan “damat na graniso”?

³⁸ Liwat, si Jehova dai mamamaluan na mahiro dapit sa katawohan, na ipinaiisi ini nin “mga kikilat asin tingog patin dagoldol.” (Ikomparar an Kapahayagan 4:5; 8:5.) An katawohan matatanyog sa paagi na noarin man dai pa nangyari, na garo nin mapanlaglag na linog. (Ikomparar an Isaias 13:13; Joel 3:16.) An madahas na pagkunogkunog na ini makababaak sa “dakulang siudad,” an Dakulang Babilonya, kaya iyan “nagkatolo”​—na simboliko kan pagbagsak kaiyan sa dai na mahihirahay na pagkagaba. Saro pa, “an mga siudad kan mga nasyon” mahoholog. “An gabos na isla” asin “mga bukid”​—mga institusyon asin organisasyon na garo baga permanente sa palakaw na ini—​mawawara. An “makosog na oran nin graniso,” na mas makosog nanggad kisa kan nagpasakit sa Egipto durante kan ikapitong damat, na mga sarong talento an gabat kan kada gapo, bubugbugon nin makologon an katawohan.a (Exodo 9:​22-26) An makologon na pag-oran na ini nin tuminagas na tubig posibleng naglaladawan sa pambihira sa gabat na berbal na mga kapahayagan kan mga paghokom ni Jehova, na nagtatanda na an katapusan kan palakaw na ini nin mga bagay sa katapustapusi nagdatong na! Puwede man na gamiton ni Jehova an literal na graniso sa saiyang panlaglag.​—Job 38:​22, 23.

39. Sa ibong kan pag-ula kan pitong damat, ano an gigibohon kan kadaklan sa katawohan?

³⁹ Kaya, an kinaban ni Satanas aabotan kan matanos na paghokom ni Jehova. Sagkod sa katapusan, an kadaklan na tawo padagos na lalabanan asin lalanghadan an Dios. Kapareho ni Faraon kan suanoy, an saindang puso dai mapalolomoy kan paorootrong mga damat o kan ultimong nakagagadan na kulminasyon kan mga damat na iyan. (Exodo 11:​9, 10) Dai magkakaigwa nin ultima ora, lagduan na pagbakle nin puso. Sagkod sa ultimo nindang ginhawa, sinda magrereklamo tumang sa Dios na nagsasabi: “Makakaaram sinda na ako si Jehova.” (Ezequiel 38:23) Minsan siring, mabibindikar an soberaniya ni Jehova Dios na Makakamhan sa gabos.

[Nota sa Ibaba]