Kapahayagan—An Mamuraway na Kulminasyon Kaiyan Harani Na

Kasumpay kan Kapitulo 41: An Aldaw nin Paghokom nin Dios—An Magayagayang Resulta Kaiyan!

An Sangribong Taon na Aldaw nin Paghokom

5. Pakatapos na an daan na daga asin an daan na langit nagdulag, sairisay pa an hohokoman?

⁵ Sairisay pa an hohokoman pakatapos magdulag an daan na daga asin an daan na langit? Bakong an linahidan na natada kan 144,000, huli ta sinda nahokoman asin natatakan na. An mga buhay pa sa daga pakatapos kan Armagedon kaipuhan na sa dai mahaloy magadan asin mag-ako kan saindang langitnon na balos paagi sa pagkabuhay liwat. (1 Pedro 4:17; Kapahayagan 7:​2-4) Alagad, an minilyon sa dakulang kadaklan na nagruluwas na ngonyan sa dakulang kahorasaan risang gayong nagtitindog “sa atubangan kan trono.” Sinda ibinilang nang matanos para sa kaligtasan huli sa saindang pagtubod sa pinabolos na dugo ni Jesus, alagad an paghokom sa sainda kaipuhan na magpadagos sa laog kan sangribong taon mantang si Jesus padagos na ginigiyahan sinda “sa mga burabod kan tubig nin buhay.” Dangan, pakatapos na ibalik sa pagkasangkap bilang tawo asin dangan baloon, sinda ipahahayag na matanos sa pinakalubos na sentido. (Kapahayagan 7:​9, 10, 14, 17) An mga aking makaliligtas sa dakulang kahorasaan asin an arin man na aking mamundag sa dakulang kadaklan durante kan Milenyo mangangaipo man na hokoman durante kan sangribong taon.​—Ikomparar an Genesis 1:​28; 9:7; 1 Corinto 7:14.

6. (a) Anong kadaklan an naheling ni Juan, asin ano an ipinaririsa kan mga tataramon na “an darakula asin saradit”? (b) Paano an dai mabilang na minilyon sa memorya nin Dios daing duwa-duwang paluluwason?

⁶ Alagad, nakaheling si Juan nin kadaklan na labi pa kadakol kisa sa nakaligtas na dakulang kadaklan. Iyan may bilang na rinibong milyon! “Asin naheling ko an mga gadan, an darakula asin saradit, na nagtitindog sa atubangan kan trono, asin an mga balumbon biniriklad.” (Kapahayagan 20:12a) “An darakula asin saradit” binibilog kan mga prominente siring man kan bakong prominenteng mga tawo na nabuhay asin nagadan digdi sa daga durante kan nakaaging 6,000 na taon. Sa Ebanghelyo na isinurat ni apostol Juan dai nahaloy pakatapos kan Kapahayagan, sinabi ni Jesus manongod sa Ama: “Tinawan nia sia [si Jesus] nin kapangyarihan na maghokom, huli ta sia Aki nin tawo. Dai kamo magngalas kaini, huli ta an oras maabot na an gabos na nasa mga lolobngan nin girumdoman makadadangog kan saiyang tingog asin maruluwas.” (Juan 5:​27-29) Kanigoan kadakulang proyekto​—an paghale kan epekto kan mga kagadanan asin paglobong sa bilog na kasaysayan! Mayong duwa-duwa na an dai mabilang na minilyon sa memorya nin Dios luway-luway na paluluwason tanganing an dakulang kadaklan​—na kadikiton kun ikokomparar—​makaya an mga problema na puwedeng lumataw huli ta an mga binuhay liwat tibaad sa enot may tendensia na sunodon an saindang dating estilo nin buhay, kairiba an makalaman na kaluyahan asin kaisipan kaiyan.

Sairisay an Ibabangon Asin Hohokoman?

7, 8. (a) Anong balumbon an binuksan, asin ano an nangyari pakatapos? (b) Para kiisay dai nang pagkabuhay liwat?

⁷ Idinugang ni Juan: “Alagad saro pang balumbon an biniklad; iyan an balumbon nin buhay. Asin hinokoman an mga gadan sono sa mga bagay na nasusurat sa mga balumbon oyon sa saindang mga gibo. Asin itinao kan dagat an mga gadan na yaon dian, asin itinao kan kagadanan asin kan Hades an mga gadan na yaon dian, asin an lambang saro hinokoman oyon sa saindang mga gibo.” (Kapahayagan 20:12b, 13) Kanigoan kapambihirang pangyayari nanggad! ‘An dagat, kagadanan, asin Hades’ may kabtang kada saro, alagad mangnohon na an mga terminong ini bakong may kanya-kanyang kahulogan.a Si Jonas, kan nasa tulak nin sira asin kun siring nasa tahaw kan kadagatan, nagsabi na sia nasa Sheol, o Hades. (Jonas 2:2) Kun an sarong tawo napopogolan kan Adanikong kagadanan, kun siring posible na sia man nasa Hades. An makahulang mga tataramon na ini nagtatao nin marigon na kasegurohan na dai nin siisay man na malilingawan.

⁸ Siyempre, igwa nin dai aram an bilang na dai bubuhayon liwat. Kabilang sa mga ini an dai nagsolsol na mga eskriba asin Fariseo na nagsikwal ki Jesus asin sa mga apostol, an relihiyosong “tawo nin katampalasanan,” asin an linahidan na mga Kristiano na “nangaholog.” (2 Tesalonica 2:3; Hebreo 6:​4-6; Mateo 23:​29-33) Nagtaram man si Jesus manongod sa arog-kanding na mga tawo sa katapusan kan kinaban na mapasiring sa “daing katapusan na kalayo na inandam para sa Diablo asin sa saiyang mga anghel,” arin na baga, an “pagkaparang daing katapusan.” (Mateo 25:​41, 46) Mayong pagkabuhay liwat para sa mga ini!

9. Paano ipinarisa ni apostol Pablo na an iba pahehelingan nin espesyal na pabor sa pagkabuhay liwat, asin sairisay an kabilang digdi?

⁹ Sa ibong na lado, an iba pahehelingan nin espesyal na pabor sa pagkabuhay liwat. Ini ipinarisa ni apostol Pablo kan sabihon nia: “May paglaom ako sa Dios . . . na magkakaigwa nin pagkabuhay liwat an mga matanos asin an mga bakong matanos.” (Gibo 24:15) Manongod sa daganon na pagkabuhay liwat, makakabilang sa “mga matanos” an maimbod na mga lalaki asin babae kan suanoy​—si Abraham, Rahab, asin kadakol pang iba—​na ipinahayag na matanos kun manongod sa pakikatood sa Dios. (Santiago 2:​21, 23, 25) Kabilang man sa grupong ini an mga matanos na ibang karnero na nagadan na maimbod ki Jehova sa modernong panahon. Posible, an gabos na nagdanay na iyan sa integridad bubuhayon liwat nin amay sa Milenyal na Paghade ni Jesus. (Job 14:​13-15; 27:5; Daniel 12:13; Hebreo 11:​35, 39, 40) Mayong duwa-duwa na an dakol sa binuhay liwat na mga matanos na ini iaasignar sa espesyal na mga pribilehiyo sa pangangataman sa dakulaon na trabaho na pagtogdok liwat sa Paraiso.​—Salmo 45:16; ikomparar an Isaias 32:​1, 16-18; 61:5; 65:​21-23.

10. Sa mga bubuhayon liwat, sairisay an “mga bakong matanos”?

¹⁰ Alagad, sairisay an “mga bakong matanos” na sinambit sa Gibo 24:15? Kabilang sa mga ini an dakulang masa nin katawohan na nagadan sa bilog na kasaysayan, partikularmente idtong mga nabuhay sa ‘mga panahon nin kamangmangan.’ (Gibo 17:30) An mga ini, huli sa lugar na namundagan ninda o sa panahon na nabuhay sinda, dai nagkaigwa nin oportunidad na manodan an pagkuyog sa kabotan ni Jehova. Saro pa, tibaad may iba na nakadangog kan mensahe nin kaligtasan alagad dai naghimate nin lubos kan panahon na iyan o nagadan bago sinda nag-oswag pasiring sa pagdusay asin pagpabautismo. Sa pagkabuhay liwat an mga siring kaipuhan na gumibo nin orog pang pagbago sa saindang pag-iisip asin paagi nin buhay kun boot nindang makinabang sa oportunidad na ini para sa pag-ako nin buhay na daing katapusan.

An Balumbon nin Buhay

11. (a) Ano an “balumbon nin buhay,” asin kiisay na mga ngaran an nasusurat sa balumbon na ini? (b) Taano an balumbon nin buhay ta bubuksan durante kan Sangribong Taon na Paghade?

¹¹ Nagtataram si Juan manongod sa “balumbon nin buhay.” Ini an rekord kan mga nakalinyang mag-ako nin buhay na daing katapusan hale ki Jehova. An mga ngaran kan linahidan na mga tugang ni Jesus, kan dakulang kadaklan, asin kan maimbod na mga tawo kan suanoy, siring baga ki Moises, nakarekord na sa balumbon na ini. (Exodo 32:​32, 33; Daniel 12:1; Kapahayagan 3:5) Sa ngonyan, mayo pa sa mga kabilang sa “bakong matanos” na binuhay liwat na nasusurat an ngaran sa balumbon nin buhay. Kaya an balumbon nin buhay bubuksan durante kan Sangribong Taon na Paghade tanganing mapangyari an pagsurat kan ngaran nin iba pa na magigin kuwalipikado. Idtong dai nasurat an saindang ngaran sa balumbon, o libro, nin buhay “iaapon sa danaw nin kalayo.”​—Kapahayagan 20:15; ikomparar an Hebreo 3:19.

12. Ano an magdedeterminar kun baga an sarong tawo masusurat an saiyang ngaran sa binuksan na balumbon nin buhay, asin paano an ninombrahan na Hokom ni Jehova nagtao kan halimbawa?

¹² Kun siring, ano an magdedeterminar kun baga an sarong tawo masusurat an saiyang ngaran sa nakabukas na balumbon nin buhay sa panahon na iyan? An pangenot na elemento magigin kaagid kan mga kaaldawan ni Adan asin ni Eva: pagkuyog ki Jehova. Siring kan isinurat ni apostol Juan sa saiyang namomotan na mga kapwa Kristiano: “An kinaban maagi sana asin an horot kaiyan, alagad an naggigibo kan kabotan nin Dios magdadanay sagkod lamang.” (1 Juan 2:​4-7, 17) Sa pagkuyog, an Hokom na ninombrahan ni Jehova nagtao kan halimbawa: “Minsan ngani sia [si Jesus] Aki, sia nakanood nin pagkuyog hale sa mga bagay na saiyang tinios; asin pakatapos na sia ginibong sangkap nagtao sia nin daing sagkod na kaligtasan sa gabos na nagkukuyog sa saiya.”​—Hebreo 5:​8, 9.

Pagbukas sa Iba Pang Balumbon

13. Paano an mga binuhay liwat kaipuhan na magpaheling kan saindang pagkuyog, asin anong mga prinsipyo an kaipuhan nindang sunodon?

¹³ Paano kaipuhan na ipaheling kan mga binuhay liwat na ini an saindang pagkuyog? Itinokdo mismo ni Jesus an duwang dakulang pagboot, na sinasabi: “An enot, ‘Dangoga, O Israel, si Jehova na satong Dios sarong Jehova, asin mamotan mo si Jehova na saimong Dios sa bilog mong puso asin sa bilog mong kalag asin sa bilog mong isip patin sa bilog mong kosog.’ An ikaduwa iyo ini, ‘Mamotan mo an saimong kataed siring sa saimo man sana.’” (Marcos 12:​29-31) Yaon man an establisado nang mga prinsipyo ni Jehova na kaipuhan nindang kuyogon, siring baga kan pagsikwal sa paghabon, pagputik, paggadan, asin inmoralidad.​—1 Timoteo 1:​8-11; Kapahayagan 21:8.

14. Ano pang ibang balumbon an binuksan, asin ano an laog kan mga iyan?

¹⁴ Alagad, nasambitan pa sana ni Juan an ibang balumbon na bubuksan durante kan Milenyal na Paghade. (Kapahayagan 20:12) Ano an mga ini? Kun minsan, nagtatao si Jehova nin espisipikong mga instruksion para sa partikular na mga situwasyon. Halimbawa, kan panahon ni Moises nagtao sia nin detalyadong serye nin mga pagboot na nangahulogan nin buhay para sa mga Israelita kun sinda magkuyog. (Deuteronomio 4:40; 32:​45-47) Kan enot na siglo, itinao an bagong mga instruksion tanganing tabangan an mga maimbod na kuyogon an mga prinsipyo ni Jehova sa irarom kan Kristianong palakaw nin mga bagay. (Mateo 28:​19, 20; Juan 13:34; 15:​9, 10) Ngonyan ibinabareta ni Juan na an mga gadan ‘hohokoman sono sa mga bagay na nasusurat sa mga balumbon oyon sa saindang mga gibo.’ Kun siring, maliwanag na an pagbukas kan mga balumbon na ini magpupublikar kan detalyadong mga kahagadan ni Jehova para sa katawohan durante kan sangribong taon. Paagi sa pag-aplikar sa saindang buhay kan mga regulasyon asin pagboot sa mga balumbon na iyan, an makinuyog na mga tawo mahihimong palawigon an saindang mga aldaw, na sa katapustapusi mag-ako nin buhay na daing katapusan.

15. Anong klaseng edukasyonal na kampanya an kakaipuhanon durante kan pagbuhay liwat, asin paano an pagbuhay liwat posibleng magpapadagos?

¹⁵ Kanigoan kahiwas na kampanya nin teokratikong edukasyon an kinakaipuhan! Kan 1990 an mga Saksi ni Jehova sa bilog na kinaban nangenot, sa promedyo, sa labing 3,600,000 na pag-adal sa Biblia sa manlaenlaen na lugar. Alagad durante kan pagbuhay liwat, dai mabilang na minilyon na pag-adal, basado sa Biblia asin sa bagong mga balumbon, an daing duwa-duwang pangengenotan! An bilog na banwaan ni Jehova mangangaipong magin mga paratokdo asin maghingoa. An mga binuhay liwat, mantang sinda nag-ooswag, daing duwa-duwa na makikikabtang sa dakulang programang ini nin pagtotokdo. Posible, an pagbuhay liwat magpapadagos sa paaging an mga nabubuhay puwedeng magkaigwa nin kagayagayahan sa pagsabat asin pagtotokdo sa dating mga miembro kan pamilya asin mga katood na masabat asin magtotokdo man sa iba. (Ikomparar an 1 Corinto 15:​19-28, 58.) An labing apat na milyon na mga saksi ni Jehova na aktibong nagpapalakop kan katotoohan ngonyan nagbubugtak nin marahay na pundasyon para sa mga pribilehiyo na linalaoman nindang akoon sa pagbuhay liwat.​—Isaias 50:4; 54:13.

16. (a) Kiisay na ngaran an dai isusurat sa balumbon, o libro, nin buhay? (b) Sairisay idtong an pagkabuhay liwat magigin “sa buhay”?

¹⁶ Kun manongod sa daganon na pagkabuhay liwat, sinabi ni Jesus na ‘idtong naggiribo nin marahay maruluwas sa pagkabuhay liwat sa buhay, idtong naggiribo nin maraot sa pagkabuhay liwat sa paghokom.’ Digdi an “buhay” asin “paghokom” kabaliktaran kan kada saro, na nagpapaheling na an mga binuhay liwat na “naggiribo nin maraot” pakatapos na matokdoan kan ipinasabong na Kasuratan asin kan mga balumbon hohokoman na bakong angay sa buhay. An saindang ngaran dai isusurat sa balumbon, o libro, nin buhay. (Juan 5:29) Ini magigin totoo man para sa siisay man na kan enot nagsunod sa maimbod na pamumuhay alagad, huli sa dai aram na dahelan, nagsiko durante kan Sangribong Taon na Paghade. An mga ngaran puwedeng paraon. (Exodo 32:​32, 33) Sa ibong na lado, idtong mga makinuyog na nagsunod sa mga bagay na nasusurat sa mga balumbon pagdadanayon an saindang ngaran sa nasusurat na rekord, an balumbon nin buhay, asin padagos na mabubuhay. Para sainda, an pagkabuhay liwat magigin saro na “sa buhay.”

An Katapusan kan Kagadanan Asin Hades

17. (a) Anong pambihirang aksion an ilinadawan ni Juan? (b) Noarin mawawaran nin laog an Hades? (c) Noarin an Adanikong kagadanan “iaapon sa danaw nin kalayo”?

¹⁷ Sumunod, ilinadawan ni Juan an sarong bagay na tunay na pambihira! “Asin an kagadanan asin Hades iinapon sa danaw nin kalayo. Ini iyo an ikaduwang kagadanan, an danaw nin kalayo. Siring man, an siisay man na dai nasusurat sa libro nin buhay iinapon sa danaw nin kalayo.” (Kapahayagan 20:​14, 15) Sa katapusan kan milenyal na Aldaw nin Paghokom, “an kagadanan asin Hades” lubos nang hinale. Taano ta nagkakaipo ini nin sangribong taon? An Hades, an pankagabsan na lolobngan nin katawohan, mahahalean nin laog kun an kahurihurihi na nasa memorya nin Dios binuhay na liwat. Alagad sagkod na an siisay man na tawo may digta pa kan minanang kasalan, an Adanikong kagadanan padagos pa man giraray na nasa sainda. An gabos na binuhay liwat sa daga, siring man an dakulang kadaklan na makaliligtas sa Armagedon, mangangaipong kuyogon an nasusurat sa mga balumbon sagkod na an merito kan pantubos ni Jesus ikaaplikar na sa lubos na paghale sa helang, paggurang, asin iba pang minanang diperensia. Dangan an Adanikong kagadanan, kaiba an Hades, “iaapon sa danaw nin kalayo.” Iyan mawawara na sagkod lamang!

18. (a) Paano ilinadawan ni apostol Pablo an kapangganahan kan pamamahala ni Jesus bilang Hade? (b) Ano an gigibohon ni Jesus sa sangkap nang pamilya nin tawo? (c) Ano pang ibang bagay an mangyayari sa katapusan kan sangribong taon?

¹⁸ Kaya, an programa na ilinadawan ni apostol Pablo sa saiyang surat sa mga taga-Corinto makokompleto: “Huli ta [si Jesus] kaipuhan na maghade sagkod na ikinabugtak na nin Dios an gabos na kaiwal sa irarom kan saiyang mga bitis. Bilang an ultimong kaiwal, an [Adanikong] kagadanan paparaon.” Ano an masunod na mangyayari? “Kun an gabos na bagay ikinapasakop na sa saiya, dangan an Aki mismo mapasakop man sa Saro na nagpasakop sa saiya kan gabos na bagay.” Sa ibang pagtaram, si Jesus “itatao an kahadean sa saiyang Dios asin Ama.” (1 Corinto 15:​24-28) Iyo, si Jesus, huling nadaog na an Adanikong kagadanan paagi sa merito kan saiyang pantubos na atang, iiintrega an sangkap nang pamilya nin tawo sa saiyang Ama, si Jehova. Maliwanag na sa puntong ini, sa katapusan kan sangribong taon, na si Satanas bubutasan asin mangyayari an huring pagbalo tanganing madeterminaran kun kiisay na ngaran an magdadanay na nakatala nin permanente sa balumbon nin buhay. “Maghingoa kamo nin maigot” tanganing an saindong ngaran makabilang sainda!​—Lucas 13:24; Kapahayagan 20:5.

[Nota sa Ibaba]