Kapahayagan—An Mamuraway na Kulminasyon Kaiyan Harani Na
Kapitulo 44: An Kapahayagan Asin Kamo
1. (a) Anong kasegurohan an itinao kan anghel ki Juan manongod sa gabos na makangangalas na panuga sa Kapahayagan? (b) Siisay an nagsasabing, “Ako madatong sa madali,” asin noarin an ‘pagdatong’ na ini?
Sa pagbasa kan magayagayang pagkaladawan sa Bagong Jerusalem, tibaad mapahiro kamong maghapot: ‘Puwede daw talagang mangyari an siring kamakangangalas na bagay?’ Sinisimbag ni Juan an hapot na iyan paagi sa pagbareta kan kasunod na mga tataramon kan anghel: “Asin sia nagsabi sako: ‘An mga tataramon na ini maimbod asin totoo; iyo, isinugo ni Jehova na Dios kan ipinasabong na mga tataramon kan mga propeta an saiyang anghel tanganing ipaheling sa saiyang mga oripon an mga bagay na kaipuhan na mangyari sa madali. Asin, uya! ako madatong sa madali. Maogma an siisay man na nag-ootob kan mga tataramon nin hula kan balumbon na ini.’” (Kapahayagan 22:6, 7) An gabos na makangangalas na panuga kan Kapahayagan tunay na maootob! Sa pagtaram sa ngaran ni Jesus, ipinahayag kan anghel na si Jesus madatong sa dai mahahaloy, “sa madali.” Siertong ini an pagdatong ni Jesus “siring sa parahabon” tanganing laglagon an mga kaiwal ni Jehova asin pangyarihon an mamuraway asin maogmang kulminasyon kan Kapahayagan. (Kapahayagan 16:15, 16) Kaya, maninigo niatong ioyon an satong buhay sa mga tataramon kan “balumbon na ini,” an Kapahayagan, tanganing ipahayag kitang maogma sa panahon na iyan.
2. (a) Ano an nagin reaksion ni Juan sa mayaman na kapahayagan, asin ano an sinabi kan anghel saiya? (b) Ano an manonodan niato sa mga tataramon kan anghel na “Mag-ingat ka!” asin, “Sambahon mo an Dios”?
2 Pakatapos kan siring kayaman na Kapahayagan, natural sana na si Juan garo dai mapogolan an saiyang pagmate: “Bueno, ako si Juan an nakadangog asin nakaheling kan mga bagay na ini. Asin kan ako makadangog asin makaheling, ako naglaob sa pagsamba sa pamitisan kan anghel na nagpaheling sako kan mga bagay na ini. Alagad sia nagsabi sako: ‘Mag-ingat ka! Dai mo iyan paggibohon! Ako kapwa oripon mo asin kan saimong mga tugang na propeta asin kan mga nag-ootob kan tataramon kan balumbon na ini. Sambahon mo an Dios.’” (Kapahayagan 22:8, 9; ikomparar an Kapahayagan 19:10.) An makaduwang sinambit na patanid na ini na dai pagsambahon an mga anghel napapanahon kan kaaldawan ni Juan, kan an iba malinaw na nagpadagos kan siring na pagsamba o naghingako nin espesyal na kapahayagan hale sa mga anghel. (1 Corinto 13:1; Galacia 1:8; Colosas 2:18) Ngonyan, iyan nagtatampok kan katotoohan na an Dios sana an maninigo niatong sambahon. (Mateo 4:10) Maninigo na dai niato pag-atian an dalisay na pagsamba nin pagsamba sa kiisay man o sa ano man.—Isaias 42:5, 8.
3, 4. Ano an padagos na isinabi kan anghel ki Juan, asin paano kinuyog kan linahidan na natatada an saiyang mga tataramon?
3 Nagpadagos si Juan: “Sia nagsabi man sako: ‘Dai mo pagtatakan an mga tataramon kan hula sa balumbon na ini, huli ta harani na an itinalaan na panahon. An naggigibo nin kabikoan, maggibo pa sia nin kabikoan; asin an maramog magin pang maramog; alagad an matanos maggibo pa nin katanosan, asin an banal magin pang banal.’”—Kapahayagan 22:10, 11.
4 An linahidan na natatada ngonyan nagkuyog sa mga tataramon kan anghel. Dai ninda tinatakan an mga tataramon kan hula. Tara, an kaenot-enoteng luwas kan Zion’s Watch Tower and Herald of Christ’s Presence (Hulyo 1879) may mga komento sa dakol na bersikulo kan Kapahayagan. Siring kan nasambitan niato sa satong pambukas na kapitulo, sa nakaaging mga taon an Watch Tower Society nagpublikar nin iba pang nagpapaliwanag na libro manongod sa Kapahayagan. Ngonyan dinadara ta liwat an atension kan gabos na mamomoton sa katotoohan sa mapuwersang mga hula kan Kapahayagan asin sa kaotoban kaiyan.
5. (a) Ano kun gusto kan mga tawo na ignorohon an mga patanid asin sadol sa Kapahayagan? (b) Ano an maninigong magin reaksion kan mga mahoyo asin matanos?
5 Kun gusto kan mga tawong ignorohon an mga patanid asin sadol sa Kapahayagan, bueno, pabayae sindang gibohon an siring! “An naggigibo nin kabikoan, maggibo pa sia nin kabikoan.” Kun iyan an pinili ninda, an mga naglalabog sa karamogan kan konsintidor na panahon na ini magagadan sa karamogan na iyan. Dai mahahaloy, an mga paghokom ni Jehova lubos na gigibohon, magpoon sa paglaglag sa Dakulang Babilonya. An mga mahoyo magin mahigos na kuyogon an mga tataramon kan propeta: “Hanapa nindo si Jehova . . . Hanapa nindo an katanosan, hanapa nindo an kahoyoan. Tibaad kamo matago sa aldaw kan kaanggotan ni Jehova.” (Sofonias 2:3) Para sa mga nagdusay na ki Jehova, “an matanos maggibo pa nin katanosan, asin an banal magin pang banal.” An madonong nakaaaram na daing temporaryong pakinabang gikan sa kasalan an makakokomparar sa nagdadanay na mga bendisyon na kakamtan kan mga nagsusunod sa katanosan asin kabanalan. An Biblia nagsasabi: “Padagos na baloon kun baga kamo nasa pagtubod, padagos na patunayan kun ano man nanggad kamo.” (2 Corinto 13:5) Basado sa dalan na saindong pinili asin na dian kamo nagdadanay, aakoon nindo an saindong balos.—Salmo 19:9-11; 58:10, 11.
6. Ano an sinabi ni Jehova mantang kinakaolay nia an mga parabasa kan Kapahayagan sa kahurihurihing pangyayari sa hula?
6 Si Jehova, an Hadeng daing sagkod, kinakaolay ngonyan an mga parabasa kan Kapahayagan sa kahurihurihing pangyayari sa hula, na sinasabing: “Uya! ako madatong sa madali, asin dara ko an balos na sakong itatao, tanganing balosan an lambang saro oyon sa saiyang gibo. Ako an Alfa asin an Omega, an enot asin an huri, an kapinonan asin an katapusan. Maogma idtong mga naghuhugas sa saindang gubing, tanganing mapasainda an autoridad na dumolok sa mga kahoy nin buhay asin tanganing sinda makalaog sa siudad paagi sa mga tata kaiyan. Sa luwas an mga ayam asin an mga naggigibo nin espiritismo asin an mga parapakisaro asin an mga paragadan asin an mga parasamba sa ladawan patin an gabos na namomoot asin naggigibo nin kaputikan.”—Kapahayagan 22:12-15.
7. (a) Huli sa ano “madatong sa madali” si Jehova? (b) Taano an klero kan Kakristianohan ta dai magkakaigwa nin kabtang sa Bagong Jerusalem?
7 Liwat, idinodoon ni Jehova Dios an saiyang daing sagkod na soberaniya asin an katotoohan na an saiyang enot na katuyohan sa katapustapusi saiyang gigibohon. Sia “madatong sa madali” tanganing gibohon an paghokom asin babalosan an mga maigot na naghahanap sa saiya. (Hebreo 11:6) An saiyang mga pamantayan an magdedeterminar kun sairisay an babalosan asin sairisay an isisikwal. An klero kan Kakristianohan naghirong siring sa “mga pulang ayam,” na nagbubutabutahan sa mga bisyo na ilinadawan digdi ni Jehova. (Isaias 56:10-12; helingon man an Deuteronomio 23:18, New World Translation Reference Bible, nota sa ibaba.) Tunay nanggad, sinda ‘namoot asin naggibo’ nin nagpuputik na mga doktrina asin katokdoan asin biyo nanggad na dai inintindi an sadol ni Jesus sa pitong kongregasyon. Kaya, dai sindang kabtang sa Bagong Jerusalem.
8. (a) Sairisay sana an ‘madolok sa mga kahoy nin buhay,’ asin ano an kahulogan kaini? (b) Paano an dakulang kadaklan ‘naghugas sa saindang gubing,’ asin paano ninda pinapagdanay an malinig na kamugtakan?
8 Solamente an linahidan na mga Kristiano na tunay na “naghuhugas kan saindang gubing” tanganing magin malinig sa mga mata ni Jehova an may pribilehiyo na “dumolok sa mga kahoy nin buhay.” An boot sabihon, aakoon ninda an diretso asin titulo sa inmortal na buhay sa saindang langitnon na kamugtakan. (Ikomparar an Genesis 3:22-24; Kapahayagan 2:7; 3:4, 5.) Pagkagadan ninda bilang mga tawo, makalalaog sinda sa Bagong Jerusalem paagi sa pagkabuhay liwat. Palalaogon sinda kan 12 anghel, mantang dai pinalalaog an mga naggigibo nin kaputikan o karigsokan maski ngani naghihingakong may langitnon na paglaom. Siring man, an dakulang kadaklan sa daga ‘naghugas kan saindang mga gubing asin pinaputi iyan sa dugo kan Kordero’ asin kaipuhan na magdanay sa saindang malinig na kamugtakan. Magigibo ninda ini paagi sa paglikay sa mga bisyo na ipinatatanid digdi ni Jehova, siring man sa pagsapuso kan hatol ni Jesus sa saiyang pitong mensahe sa mga kongregasyon.—Kapahayagan 7:14; kapitulo 2 asin 3.
9. Anong mga tataramon an itinaram ni Jesus, asin kiisay pangenot na ipinanonongod an saiyang mensahe asin an bilog na Kapahayagan?
9 Pakatapos ni Jehova, nagtaram si Jesus. Nagpaabot sia nin mga tataramon na pampakosog sa mga matanos an puso na nagbabasa kan Kapahayagan, na sinasabi: “Ako, si Jesus, nagsugo kan sakong anghel tanganing magpatotoo saindo dapit sa mga bagay na ini para sa mga kongregasyon. Ako iyo an gamot asin an gikan ni David, asin an maliwanag na bitoon sa makaaaga.” (Kapahayagan 22:16) Iyo, an mga tataramon na ini nangorogna “para sa mga kongregasyon.” Ini sarong mensahe, enot sa gabos, sa kongregasyon nin linahidan na mga Kristiano sa daga. An gabos sa Kapahayagan pangenot na ipinaaabot sa linahidan na mga Kristiano, na mag-eerok sa Bagong Jerusalem. Paagi sa kongregasyon na iyan, an dakulang kadaklan may pribilehiyo man na masabotan an mahalagang makahulang mga katotoohan na ini.—Juan 17:18-21.
10. Taano ta inapod ni Jesus an saiyang sadiri na (a) “an gamot asin an gikan ni David”? (b) “an maliwanag na bitoon sa makaaaga”?
10 Si Jesu-Cristo pinaniwalaan sa pagpaabot kan Kapahayagan ki Juan asin paagi saiya sa kongregasyon. Si Jesus kapwa “an gamot asin an gikan ni David.” Naggikan sia ki David sono sa laman asin sa siring kuwalipikadong magin Hade sa Kahadean ni Jehova. Sia man magigin “Amang Daing Katapusan” ni David, asin sa siring an “gamot” ni David. (Isaias 9:6; 11:1, 10) Sia an permanente, inmortal na Hade sa linya ni David, na inootob an tipan ni Jehova ki David, asin “an maliwanag na bitoon sa makaaaga” na ihinula kan panahon ni Moises. (Bilang 24:17; Salmo 89:34-37) Sia an “bitoon nin makaaaga” na minasirang, na nagpapangyaring lumiwanag an aldaw. (2 Pedro 1:19) An gabos na pakana kan dakulang kaiwal na Dakulang Babilonya dai nakaolang sa mamuraway na pagsirang na ini.
Magsabi: “Madia!”
11. Anong bukas na imbitasyon an iinaatubang ngonyan ni Juan, asin sairisay an puwedeng maghimate dian?
11 Ngonyan oportunidad na ni Juan na magtaram. Hale sa pusong nagsosopay sa apresasyon para sa gabos na naheling asin nadangog nia, nagkagsing sia: “Asin an espiritu asin an nobya padagos na nagsasabi: ‘Madia!’ Asin an siisay man na makadangog magsabi: ‘Madia!’ Asin an siisay man na napapaha dumolok; an siisay man na boot kumua kan tubig nin buhay na daing bayad.” (Kapahayagan 22:17) An mga pakinabang sa pantubos na atang ni Jesus bakong limitado sa 144,000, huli ta uya an sarong bukas na imbitasyon. An nagpapahirong espiritu ni Jehova naghihiro paagi sa grupong nobya, tanganing an mensahe padagos na ikabalangibog nin lubos kalinaw: “Kumua kan tubig nin buhay na daing bayad.” (Helingon man an Isaias 55:1; 59:21.) An siisay man na napapaha sa katanosan iniimbitaran na “dumolok” asin akoon an abundansia ni Jehova. (Mateo 5:3, 6) Kanigoan nanggad kadakula kan pribilehiyo kan gabos na may paglaom na magin daganon na grupo na naghimate sa imbitasyon na ini kan linahidan na grupong Juan!
12. Paano naghimate an dakulang kadaklan sa imbitasyon sa Kapahayagan 22:17?
12 Magpoon kan amay na mga taon nin 1930, an nagdadakol na bilang kan dakulang kadaklan “nakadadangog”—nagtataong atension sa imbitasyon. Siring kan saindang linahidan na mga kapwa oripon, nag-ako sinda nin malinig na kamugtakan sa atubangan ni Jehova. Naglalaom sinda sa panahon na an Bagong Jerusalem mahilig hale sa langit tanganing ipaabot an mga bendisyon sa katawohan. Sa pakadangog sa nakapupukaw nin boot na mensahe kan Kapahayagan, an dakulang kadaklan bako sanang nagsasabing “Madia!” kundi aktibong tinitipon an iba sa organisasyon ni Jehova, na sinasanay man an mga ini na magbalangibog: “An siisay man na napapaha dumolok.” Kaya an bilang kan dakulang kadaklan nagpapadagos na umoswag, mantang an labing 4,000,000 sainda sa labing 200 na kadagaan sa bilog na daga nakikiiba sa kulang nang 9,000 kan linahidan na grupong nobya sa pagpaabot kan imbitasyon na “kumua kan tubig nin buhay na daing bayad.”
13. Anong patanid an itinao ni Jesus?
13 Sunod, si Jesus nagtaram liwat, na sinasabi: “Ako nagpapatotoo sa gabos na nakakadangog kan mga tataramon kan hula sa balumbon na ini: Kun an siisay man magdugang sa mga bagay na ini, dudugangan sia nin Dios kan mga damat na nasusurat sa balumbon na ini; asin kun an siisay man mag-ina sa mga tataramon kan balumbon kan hulang ini, hahaleon nin Dios an saiyang kabtang sa mga kahoy nin buhay asin sa banal na siudad, mga bagay na nasusurat sa balumbon na ini.”—Kapahayagan 22:18, 19.
14. Paano minansay kan grupong Juan an “hula” kan Kapahayagan?
14 An mga kabilang sa grupong Juan maninigong mag-apod nin atension sa “hula” kan Kapahayagan. Dapat na dai ninda iyan itago o dugangan. An mensahe kaiyan maninigong ihulit nin hayag, “sa mga atop.” (Mateo 10:27) An Kapahayagan ipinasabong nin Dios. Siisay an mangangahas na liwaton an sarong tataramon na itinaram asin ipinaabot mismo nin Dios paagi sa namamahala na ngonyan na Hade, si Jesu-Cristo? Sierto nanggad, an siring na tawo angay na mawaran sa paghanap sa buhay asin magtios kan mga damat na siertong mangyayari sa Dakulang Babilonya asin sa bilog na kinaban.
15. Ano an kahalagahan kan mga tataramon ni Jesus na sia “nagpapatotoo sa mga bagay na ini” asin “ako madatong sa madali”?
15 Idinugang ngonyan ni Jesus an pangultimong tataramon na pampakosog: “An nagpapatotoo sa mga bagay na ini nagsasabi: ‘Iyo; ako madatong sa madali.’” (Kapahayagan 22:20a) Si Jesus an “maimbod asin tunay na saksi.” (Kapahayagan 3:14) Kun nagpapatotoo sia sa mga bisyon kan Kapahayagan, siertong iyan totoo. Kapwa sia asin si Jehova Dios mismo paorootrong nagdodoon kan katunayan na sinda madatong “sa madali,” o dai mahahaloy, na digdi sinasabi iyan ni Jesus sa ikalimang beses. (Kapahayagan 2:16; 3:11; 22:7, 12, 20) An ‘pagdatong’ tanganing gibohon an paghokom sa dakulang patotot, sa politikal na “mga hade” asin sa gabos pang iba na nagtutumang sa “kahadean kan satong Kagurangnan [na si Jehova] asin kan saiyang Cristo.”—Kapahayagan 11:15; 16:14, 16; 17:1, 12-14.
16. Sa pakaaram na si Jehova Dios asin si Jesus madatong sa madali, anong desididong paghiro an maninigo nindong gibohon?
16 An saindong pakaaram na si Jehova Dios asin si Jesus madatong sa madali maninigong magpakosog saindo na magpadagos na “naggigirumdom sa presensia kan aldaw ni Jehova.” (2 Pedro 3:12) An ano man na garo karigonan sa daga kan sistema nin mga bagay ni Satanas ilusyon sana. An ano man na garo kapangganahan na tibaad nagibo kan langit nin kinabanon na mga namamahala sa irarom ni Satanas temporaryo. An mga bagay na ini maagi sana. (Kapahayagan 21:1) An solamenteng pagkapermanente manonompongan ki Jehova, sa saiyang Kahadean sa irarom ni Jesu-Cristo, asin sa saiyang ipinanugang bagong kinaban. Dai nanggad paglingawan iyan!—1 Juan 2:15-17.
17. Paano an saindong apresasyon sa kabanalan ni Jehova maninigong makaapektar saindo?
17 Kaya, logod togotan nindo na an saindong nanodan sa saindong pag-adal kan Kapahayagan magkaigwa nin hararom na impluwensia sa saindong buhay. Bako daw na an pakaheling nindo sa langitnon na presensia ni Jehova nagtudok sa boot nindo kan daing kabaing na kamurawayan asin kabanalan kan satong Kaglalang? (Kapahayagan 4:1–5:14) Dakulaon nanggad na pribilehiyo na paglingkodan an siring na Dios! Logod an saindong apresasyon sa saiyang kabanalan pahiroon kamo na isaboot an sadol ni Jesus sa pitong kongregasyon asin likayan an mga bagay na siring sa materyalismo, idolatriya, inmoralidad, pagigin gabinhod, apostatang sektaryanismo, o ano man na puwedeng magpangyaring dai akoon ni Jehova an saindong paglilingkod. (Kapahayagan 2:1–3:22) An mga tataramon ni apostol Pedro sa grupong Juan sa pundamental aplikado man sa dakulang kadaklan: “Kaoyon sa Banal na Saro na nag-apod sa saindo, magin man kamong mga banal sa gabos nindong gawe.”—1 Pedro 1:15, 16.
18. Sa ano kamo maninigong magkaigwa kan pinakalubos na kabtang na mahihimo, asin taano an gibohon na ini ta may kasibotan ngonyan?
18 Saro pa, logod na pahiroon kamo sa orog pang kaigotan mantang ibinabalangibog nindo an “taon nin marahay na boot ni Jehova asin [an] aldaw nin pamalos kan satong Dios.” (Isaias 35:4; 61:2) Kamo man kabilang sa sadangoton na aripompon o sa dakulang kadaklan, logod na magkaigwa kamo kan pinakalubos na pakikikabtang na mahihimo sa paghayag kan pagbubo kan pitong mangko kan kaanggotan ni Jehova, na ipinahahayag an mga paghokom nin Dios sa kinaban ni Satanas. Kadungan kaiyan, idugang an saindong tingog sa magayagayang pagbalangibog kan daing katapusan na maogmang bareta manongod sa pinatindog nang Kahadean ni Jehova asin kan saiyang Cristo. (Kapahayagan 11:15; 14:6, 7) Magdanay sa gibohon na ini na may pagkasibot. Asin logod an pakarealisar na kita nasa aldaw nin Kagurangnan magpahiro sa dakol na dai pa naglilingkod ki Jehova na makiiba sa gibohon na pagbalangibog kan maogmang bareta. Logod sinda umoswag man pasiring sa pagdusay kan saindang buhay sa Dios tanganing makapabautismo. Girumdomon, “harani na an itinalaan na panahon”!—Kapahayagan 1:3.
19. Ano an pantapos na mga tataramon kan gurang nang apostol na si Juan, asin ano an saindong simbag dian?
19 Kaya, kaiba ni Juan, odok sa boot niatong ipinamimibi: “Amen! Madia, Kagurangnan na Jesus.” Asin si Juan, an gurang nang apostol, nagdudugang: “An dai na kutana maninigong kabootan kan Kagurangnan na si Jesu-Cristo logod mapasa mga banal.” (Kapahayagan 22:20b, 21) Logod iyan mapasaindo man gabos na nagbabasa kan publikasyon na ini. Logod magkaigwa kamo nin pagtubod na an mamuraway na kulminasyon kan Kapahayagan harani na, tanganing kamo man makairiba niamo sa sarong odok sa boot na “Amen!”