An Pinakadakulang Tawo na Nabuhay Kasuarin Pa Man

Kapitulo 1: Mga Mensahe Hale sa Langit

AN BILOG na Biblia garo man sana mensahe hale sa langit, na itinao kan satong langitnon na Ama para sa pagtotokdo sa sato. Alagad, duwang espesyal na mensahe an ipinaabot haros 2,000 na taon na an nakaagi nin sarong anghel na “nagtitindog harani sa atubangan nin Dios.” An saiyang ngaran Gabriel. Satong siyasaton an mga kamugtakan sa duwang mahalagang pagsongko na ini sa daga.

An taon 3 B.C.E. Sa kabubulodan nin Judea, posibleng bakong gayong harayo sa Jerusalem, nag-iistar an sarong saserdote ni Jehova na an ngaran Zacarias. Gurang na sia, pati man an saiyang agom, si Elizabet. Asin mayo sindang aki. Turno naman ni Zacarias sa paglilingkod bilang saserdote sa templo nin Dios sa Jerusalem. Bigla na sanang nagpaheling si Gabriel sa toong kampi kan altar nin insenso.

Si Zacarias natakot na marhay. Pero pinakalma ni Gabriel an saiyang pagkatakot, na nagsasabi: “Dai ka matakot, Zacarias, huli ta an saimong mga pagngayongayo dinangog na may pag-oyon, asin an saimong agom na si Elizabet mangangaki saimo nin sarong aking lalaki, asin ta aapodon mo an saiyang ngaran na Juan.” Si Gabriel nagpadagos sa pagpahayag na si Juan “manini dakula sa pagheling ni Jehova” asin na saiyang ‘aandamon para ki Jehova an sarong andam na banwaan.’

Minsan siring, si Zacarias dai makapaniwala kaiyan. Garo baga kaimposible na sinda ni Elizabet magkakaaki pa sa saindang edad. Kaya sinabihan sia ni Gabriel: “Ika mapupula asin dai makakataram sagkod sa aldaw na an mga bagay na ini mangyari, huli ta dai mo tinubod an sakong mga tataramon.”

Bueno, mientras tanto, an mga tawo sa luwas nagngangalas kun taano si Zacarias ta kahaloyhaloy na sa templo. Kan sa katapustapusi magluwas sia, sia dai makataram kundi nakakapagsenyas sana paagi sa saiyang kamot, asin narealisar ninda na sia nakaheling nin sarong bagay na makangangalas.

Kan matapos ni Zacarias an saiyang peryodo nin paglilingkod sa templo, sia nagpuli sa harong. Asin dai nahaloy idto talagang nangyari​—si Elizabet nangidam! Mantang hinahalat niang mamundag an saiyang aki, si Elizabet nagpermi sa harong na harayo sa mga tawo sa laog nin limang bulan.

Kan huri nagpaheling giraray si Gabriel. Asin kiisay sia nakikipag-olay? Sa sarong hoben na daraga na an ngaran Maria na hale sa banwaan nin Nazaret. Anong mensahe an ipinaaabot nia ngonyan? Hinanyoga! “Nagkamit ka nin ugay sa Dios,” an sabi ni Gabriel ki Maria. “Uya! ika mangingidam sa saimong matris asin mangangaki nin sarong aking lalaki, asin aapodon mo an saiyang ngaran na Jesus.” Dagdag pa ni Gabriel: “An sarong ini magigin dakula asin aapodon Aki kan Kaharohalangkawe; . . . asin sia magsasakop bilang hade sa harong ni Jacob sagkod lamang, asin dai magkakaigwa nin katapusan an saiyang kahadean.”

Makasisierto kita na si Gabriel nakamate nin dakulang pribilehiyo na ipaabot an mga mensaheng ini. Asin mantang orog pa kitang nagbabasa manongod ki Juan asin Jesus, mas malinaw niatong masasabotan kun taano man nanggad ta orog kahalaga an mga mensaheng ini. 2 Timoteo 3:16; Lucas 1:​5-33.

▪ Anong duwang mahalagang mensahe an ipinaabot hale sa langit?

▪ Siisay an nagdara kan mga mensahe, asin kairisay an mga iyan ipinaabot?

▪ Taano an mga mensahe ta masakiton na tubodon?