An Pinakadakulang Tawo na Nabuhay Kasuarin Pa Man

Kapitulo 2: Tinawan Na nin Onra Bago Pa Sia Namundag

PAKATAPOS na an anghel na si Gabriel sabihan an hoben na daragang si Maria na ini mangangaki nin sarong aking lalaki na magigin hadeng daing katapusan, si Maria naghapot: “Paano ini mangyayari, mantang dai ako nakikidorog sa lalaki?”

“An banal na espiritu madatong sa saimo,” an paliwanag ni Gabriel, “asin an kapangyarihan kan Kaharohalangkawe malindong sa saimo. Kaya man an ipangangaki aapodon na banal, Aki nin Dios.”

Tanganing tabangan si Maria na tubodon an saiyang mensahe, si Gabriel nagpadagos: “Asin, uya! si Elizabet na paryente mo nangidam man nin sarong aking lalaki, sa saiyang kagurangan, asin ini iyo an ikaanom na bulan nia, an inaapod na babaeng bawas; huli ta sa Dios mayo nin tataramon na imposible.”

Inako ni Maria an tataramon ni Gabriel. Asin ano an saiyang simbag? “Uya! an oripon na babae ni Jehova!” an kagsing nia. “Mangyari logod sa sakuya an siring sa saimong tataramon.”

Pakahale tolos ni Gabriel, si Maria nag-andam asin dinalaw si Elizabet, na kasaro kan saiyang agom, si Zacarias, sa mabukid na lugar nin Judea. Hale sa harong ni Maria sa Nazaret, ini halawig na biyahe na tibaad tolo o apat na aldaw.

Kan sa katapustapusi umabot si Maria sa harong ni Zacarias, nagdagos sia asin nagtao nin pataratara. Huli kaiyan, si Elizabet napano kan banal na espiritu, asin sia nagsabi ki Maria: “Paladan ka sa mga babae, asin paladan an bunga kan saimong matris! Kaya tadaw ta sako an pribilehiyong ini, na an ina kan sakong Kagurangnan pumadigdi sako? Huli ta, uya! kan an tanog kan saimong pataratara dumatong sa sakong mga talinga, an aki sa matris ko luminukso na may dakulang kaogmahan.”

Kan madangog ini, si Maria nagsimbag na may odok sa pusong pasasalamat: “An sakong kalag nag-oomaw ki Jehova, asin an sakong espiritu dai makapogol na maglipwas an kagayagayahan huli sa Dios na sakuyang Paraligtas; huli ta hineling nia an hababang kamugtakan kan saiyang oripon na babae. Huli ta, uya! poon ngonyan an gabos na kapag-arakian aapodon akong maogma; huli ta an makapangyarihan na Saro guminibo nin darakulang gibo para sa sako.” Minsan siring, sa ibong kan ugay na ipinaheling sa saiya, itinao ni Maria sa Dios an gabos na onra. “Banal an saiyang ngaran,” an sabi nia, “asin sa surunodsunod na kapag-arakian an saiyang pagkaherak nasa mga natatakot sa saiya.”

Si Maria padagos sa pag-omaw sa Dios sa ipinasabong na makahulang awit, na nagpapahayag: “Sia makapangyarihan na naggibo paagi kan saiyang takyag, saiyang iwinagas an mga mapaabaw-abaw an intension kan saindang puso. Saiyang ibinaba sa mga trono an mga tawong makapangyarihan asin ilinangkaw an mga mapakumbaba; saiyang lubos na binasog an mga nagugutom nin mararahay na bagay asin saiyang isinobol na gutom an mga igwa nin kayamanan. Nagdatong sia sa pagtabang ki Israel na saiyang oripon, tanganing girumdomon an pagkaherak, siring man sana kan saiyang sinabi sa satong mga apoon, ki Abraham asin sa saiyang banhi, sagkod lamang.”

Si Maria nag-istar sa kaibanan ni Elizabet sa laog nin mga tolong bulan, asin daing duwa-duwa na nakatabang sia nin dakula durante kan huring mga semanang ini nin pagbabados ni Elizabet. Tunay nanggad na marahay na an duwang maimbod na babaeng ini, na pareho nagbabados sa tabang nin Dios, nagkaibaiba sa binendisyonan na panahon na ini sa saindang buhay!

Narisa daw nindo an onra na itinao ki Jesus bago pa man sia namundag? Si Elizabet inapod siang “sakong Kagurangnan,” asin an saiyang dai pa namumundag na aki luminukso sa kaogmahan kan enot na magtunga si Maria. Sa ibong na kampi, an iba kan huri daing gayo iginalang si Maria asin an saiyang mamumundag pa sanang aki, arog kan satong maheheling. Lucas 1:​26-56.

▪ Ano an sinabi ni Gabriel tanganing tabangan si Maria na masabotan kun paano sia mangingidam?

▪ Paano si Jesus tinawan nin onra bago pa sia namundag?

▪ Ano an sinabi ni Maria sa makahulang awit bilang pag-omaw sa Dios?

▪ Gurano kahaloy na si Maria nag-istar kaiba ni Elizabet, asin taano ta angay na ibanan ni Maria si Elizabet durante kan panahon na ini?