An Pinakadakulang Tawo na Nabuhay Kasuarin Pa Man

Kapitulo 3: Namundag an Paraandam kan Dalan

SI Elizabet haros andam na sa pangangaki. Kaining nakaaging tolong bulan, si Maria nag-istar sa kaibanan nia. Pero ngonyan panahon nang magpaaram si Maria asin magbiyahe nin halawig papuli sa Nazaret. Mga anom na bulan pa sia man magkakaaki na.

Dai nahaloy paghale ni Maria, si Elizabet nangaki. Kanigoan an kaogmahan kan an pangangaki nagin mapanggana asin si Elizabet patin an omboy marahay an salud! Kan ipaheling ni Elizabet an sadit na aki sa saiyang kataraed asin mga paryentes, sinda gabos nakiogma sa saiya.

Sa ikawalong aldaw kan saiyang pagkamundag, sono sa Pagboot nin Dios, an omboy na lalaki sa Israel kaipuhan na turion. Para sa okasyon na ini an mga katood asin paryentes duminalaw. Sinda nagsarabi na an omboy maninigong ingaran sa saiyang ama, si Zacarias. Pero nagtaram si Elizabet. “Bako nanggad!” an sabi nia, “kundi aapodon siang Juan.” Girumdomon na iyan an ngaran na sabi kan anghel na si Gabriel maninigong itao sa aki.

Alagad, an saindang mga katood nagsarayuma: “Dai nin siisay man sa saimong mga paryentes na inaapod sa ngaran na ini.” Dangan, naggamit nin mga senyas sa pagtaram, hinapot ninda an saiyang ama kun ano an boot na ingaran sa omboy. Naghagad nin masusuratan, si Zacarias, sa pagngalas kan gabos, nagsurat: “Juan an ngaran kaini.”

Sa pangyayaring iyan, milagrosong naulian an pagtaram ni Zacarias. Magigirumdoman nindo na nawara nia an saiyang kakayahan sa pagtaram kan dai nia tinubod an paisi kan anghel na si Elizabet magkakaaki. Bueno, kan si Zacarias magtaram, an gabos sa pagtaraed napangalas asin nagsarabi sa sainda man sana: “Ano daw talaga an madadatngan kan omboy na ini?”

Si Zacarias ngonyan pano kan banal na espiritu, asin sia naoogma: “Pag-omawon logod si Jehova na Dios nin Israel, huli ta itinao nia an saiyang atension asin guminibo nin pagliligtas sa saiyang banwaan. Asin nagpatindog sia nin sarong sungay nin kaligtasan para sa sato sa harong ni David na saiyang oripon.” An “sungay nin kaligtasan” na ini, sabihon pa, iyo an Kagurangnan na Jesus, na imumundag pa sana. Paagi sa saiya, an sabi ni Zacarias, an Dios ‘itatao sa sato, pakaligtasan sa sato sa kamot kan mga kaiwal, an pribilehiyo na daing takot na magtao nin banal na paglilingkod sa saiya na may kaimbodan asin katanosan sa atubangan nia sa satong bilog na pagkabuhay.’

Dangan si Zacarias naghula manongod sa saiyang aki, si Juan: “Alagad kun manongod sa saimo, omboy, ika aapodon na propeta kan Kaharohalangkawe, huli ta maeenot ka sa atubangan ni Jehova sa pag-andam kan saiyang mga dalan, sa pagtao nin kaaraman manongod sa kaligtasan sa saiyang banwaan paagi sa kapatawadan kan saindang mga kasalan, huli kan mamomoton na pagkaherak kan satong Dios. Paagi kan pagkaherak na ini an liwanag nin kaagahon hale sa kaitaasan dadalawon kita, sa pagtao nin liwanag sa mga nagtutukaw sa kadikloman asin limpoy nin kagadanan, sa mapangganang paggiya kan satong mga bitis sa dalan nin katoninongan.”

Sa panahon na ini si Maria, na minalataw na daraga pa, nakapuli na sa harong sa Nazaret. Ano an mangyayari sa saiya kun marisa na na sia bados? Lucas 1:​56-80; Levitico 12:​2, 3.

▪ Gurano an kamatuahan ni Juan ki Jesus?

◼ Ano an mga nangyari kan si Juan walong aldaw an edad?

◼ Paano an Dios nagtao kan saiyang atension sa saiyang banwaan?

◼ Anong gibo an ihinulang gigibohon ni Juan?

(Ipagpapadagos sa masunod na luwas.)