Maogmang Bareta Hale sa Malawi!
KAN Nobyembre 15, 1993, an Watch Tower Bible and Tract Society of Pennsylvania opisyal na irinehistro sa timog-sirangan na nasyon sa Aprika na Malawi. Tatawan kaini an mga Saksi ni Jehova nin legal na pagmidbid asin katalingkasan na ihulit an mga katotoohan kan Biblia sa mga tawo sa Malawi.
Kan taon 1948, inestablisar an sangang opisina kan Watch Tower Society sa Malawi sa pagkoordinar kan gibohon kan mga Saksi ni Jehova sa nasyon na iyan. Kan Enero 8, 1957, irinehistro duman sa kaenot-enote an Watch Tower Society. Sa laog nin nagkapirang taon nagkamit nin marikas na pag-oswag an mga Saksi ni Jehova. Alagad luminataw an madahas na paglamag kan 1964. Taano?
Bilang pagkuyog sa Dios, pinapagdanay kan mga Saksi ni Jehova an estriktong neutralidad sa politika. (Juan 17:16) Malinaw nanggad, an iba dai lubos na nasabotan an Makakasuratan na paninindogan na ini asin minisrepresentar an mga Saksi bilang sarong radikal na relihiyon asin mga bandido. Kaya an iba nakamateng may katanosan sa paglamag sa mga Kristianong ini na mamomoton sa katoninongan. Kadakol na Saksi an sinisante sa saindang trabaho, kinolgan, asin sinopog sa iba pang paagi. An iba puwersadong ibinulag sa saindang mga aki.
Kan 1972 labing 30,000 na Saksi asin mga nag-aadal sa Biblia kaiba ninda an kinaipuhan na humale sa nasyon huli sa pagkatakot na mawaran kan saindang buhay. Rinibo an nag-istar sa mga kampo nin dulag sa kataed na Mozambique. Pero kan 1975 an mga dulag na ini pinapuli sa Malawi, kun saen kaipuhan nindang umatubang nin orog pang paglamag. Dakol an ibinugtak sa mga kampo de konsentrasyon. Sa tahaw kan gabos na kariribokan na ini, an Watch Tower Society hinale sa opisyal na lista nin legal na mga organisasyon sa Malawi. Poon kaidto an mga Saksi ni Jehova asin an saindang legal na mga organisasyon ipinangalad sa nasyon na iyan.
Sa ibong kan gabos na pangyayaring ini, dai buminalos an mga Saksi. Nungka sindang nagmukna nin mga pagsururog o nagparibok sa pagprotesta tumang sa gobyerno. Imbes, mapagngayongayo nindang pinagdanay an saindang Kristianong obligasyon na magpaheling nin tamang onra asin paggalang para sa “haralangkaw na kapangyarihan” kan gobyerno. (Roma 13:1-7; 1 Timoteo 2:1, 2) Pinangangaptan man kan mga Saksi an halangkaw na mga pamantayan nin Kristianong pamumuhay na sinasabi sa Biblia asin kun siring nagtao nin ekselenteng halimbawa sa paggawe.
Paagi sa saindang bago pa sanang makamtan na katalingkasan, an mga Saksi ni Jehova sa Malawi determinadong magpadagos sa paghuhulit kan mga katotoohan kan Biblia na may pagkasibot, “sa marahay na panahon.”—2 Timoteo 4:2.
[Ritrato sa pahina 31]
Si M. G. Henschel kaiba kan pamilyang Bethel sa Malawi kan mga taon nin 1960