“Prinotehiran Ako kan mga Saksi ni Jehova!”

DURANTE kan huring mga aldaw na ini, dakol an nagin “maringis, mayong pagkamoot sa karahayan.” (2 Timoteo 3:​1, 3) Si Isaac, boluntaryong ministro sa sangang opisina kan Watch Tower Society sa Solnopan na Aprika, nanompongan ining totoo. Nagsasaysay sia:

“Kan Enero 1992, nagbiyahe ako sa sarong abandonadong tinampo sakay sa sarong komunal na taksi kaiba an lima pang pasahero. Nakipag-olay ako sa daragang kataed ko, asin maogma niang inako hale sako an brochure na basado sa Biblia.

“Bigla na sana, mga alas kuwatro nin hapon, sarong bagong kotse na mayong plaka nin rehistro an huminipa sa atubangan niamo, asin an samong kotse suminagitsit sa pagpondo. Tolong dakulang lalaki, na kada saro may darang riple, an tuminagbang paluwas sa kotse asin puwersadong binuruksan an samong pinto. ‘Luwas, kamo gabos,’ an silyak kan saro sainda.

“An saro pang lalaki inagaw an sakong bag nin libro. Kan maheling nia na an laog sana kaiyan literatura sa Biblia, iinapon nia an bag sa harayo. ‘Ano pa an yaon saimo?’ an hapot nia, na nakapunteriya an badil nia sa sako. Tolos-tolos kong itinao saiya an kuwarta na nasa pitaka ko. ‘Iyo sana ini?’ an hapot nia. Sinabi ko saiya na saro ako sa mga Saksi ni Jehova asin na an mga Saksi dai nagpuputik. Inagaw nia sako an pitaka ko, naheling an sakong Watch Tower identification card dangan nagsabi, ‘Sige, Watchtower. Maghalat ka digdi.’

“Sunod, inatubang nia an daragang nakaolay ko sa taksi. Tolos-tolos niang tinangkas an saiyang kuwintas asin itinao sa lalaki an kuwarta sa pitaka nia. Kan marisa kan parahipa an brochure sa nagtatakig niang kamot, paghona nia magkaibanan kami, kaya nagmustra sia sa daraga na magdanay kaiba ko.

“Mientras tanto, an iba pang armadong bandido maringis na sinalakay an samong kapwa mga pasahero. Kinolgan asin hinabonan ninda an drayber asin an saro pang lalaki na nagbiyahe kaiba niamo. Inagaw kan sarong parahabon an kuwintas kan ikaduwang babae. Kan lumaban sia, maringis sia nindang pinakol nin mga polo kan riple sa payo asin daghan sagkod na sia magadan. Binutong ninda an ikatolong babae paluwas sa sasakyan asin binadil sa daghan. Makamomondo, nagadan man sia. Ako sana asin an daragang kaiba ko an binayaan na biyong dai nakolgan.

“Kan palunadon kami dai nahaloy kan sarong minaaging motorista, an natakot na gayong babae paorootrong sinasabi, ‘Prinotehiran ako kan mga Saksi ni Jehova!’”