An Pinakadakulang Tawo na Nabuhay Kasuarin Pa Man

Kapitulo 5: An Pagkamundag ni Jesus​—Saen Asin Kasuarin?

AN EMPERADOR sa Imperyo nin Roma, si Augusto Cesar, nagboot na an gabos kaipuhan na bumalik sa siudad na namundagan ninda tanganing magparehistro. Kaya si Jose nagbiyahe pasiring sa lugar na namundagan nia, an siudad nin Betlehem.

Kadakol kan tawo sa Betlehem para magparehistro, asin mayong ibang nakuang madadagosan si Jose asin Maria kundi sarong kuwadra. Dian, kun saen linalaom an mga asno asin iba pang hayop, si Jesus namundag. Pinatos sia ni Maria nin mga lampin asin ihinigda sia sa sarong bahogan, an binubugtakan nin pagkakan nin mga hayop.

Siertong nasa pagdirehir nin Dios kaya ginibo ni Augusto Cesar an saiyang ley sa pagparehistro. Pinangyari kaining mamundag si Jesus sa Betlehem, an siudad na haloy nang ihinula kan Kasuratan na mamumundagan kan ipinanugang hade.

Kanigoan kahalagang banggi idto! Duman sa kaomahan may maliwanagon na ilaw na nagliwanag sa sarong grupo nin mga pastor. Iyan an kamurawayan ni Jehova! Asin an anghel ni Jehova sinabihan sinda: “Dai kamo matakot, huli ta, uya! ipinapahayag ko saindo an maogmang bareta nin dakulang kagayagayahan na kakamtan nin gabos na tawo, huli ta namundag sa saindo ngonyan an sarong Paraligtas, na iyo si Cristo na Kagurangnan, sa siudad ni David. Asin ini an tanda para sa saindo: makakakua kamo nin omboy na napapatos nin mga lampin asin naghihigda sa bahogan.” Sa panale dakol pang anghel an nagturunga asin nag-arawit: “Kamurawayan sa Dios sa kaitaasan, asin sa daga katoninongan sa mga tawo na igwa nin marahay na boot.”

Kan magharale na an mga anghel, an mga pastor nagsarabi sa lambang saro: “Magduman na kita sa Betlehem asin helingon niato an bagay na ini na nangyari, na ipinaaram sa sato ni Jehova.” Naghidale sinda asin nakua si Jesus sa lugar na mismong sinabi kan anghel na mahehelingan ninda. Kan isaysay kan mga pastor an isinabi sainda kan anghel, an gabos na nakadangog dapit kaiyan nagngaralas. An gabos na kasabihan na ini rinimpos ni Maria asin pinaghorophorop iyan sa saiyang puso.

An dakol na tawo ngonyan naniniwala na si Jesus namundag kan Disyembre 25. Alagad an Disyembre maoran, malipot na panahon sa Betlehem. An mga pastor dai puwedeng yaon duman sa kaomahan magdamlag kaiba kan saindang mga aripompon sa panahon na iyan kan taon. Siring man, an Romanong Cesar dai posibleng magboot sa sarong banwaan na gusto nang magrebelde tumang saiya na magbiyahe sa pinakamalipot na panahon kan tiglipot tanganing magparehistro. Malinaw na si Jesus namundag sa pagpopoon nin tigholog kan taon. Lucas 2:​1-20; Miqueas 5:2.

▪ Taano si Jose asin Maria ta nagbiyahe pasiring sa Betlehem?

▪ Ano an makangangalas na nangyari kan bangging namundag si Jesus?

▪ Paano niato naaaraman na si Jesus dai namundag kan Disyembre 25?