An Pinakadakulang Tawo na Nabuhay Kasuarin Pa Man

Kapitulo 6: An Ipinanugang Omboy

IMBES na bumalik sa Nazaret, si Jose asin Maria nagdanay sa Betlehem. Asin kan walong aldaw na si Jesus, sia ipinaturi ninda, siring sa ipinagboboot kan Pagboot nin Dios ki Moises. Malinaw na nakaugalean na man na ngaranan an omboy sa ikawalong aldaw. Kaya nginaranan ninda nin Jesus an saindang aki, siring sa ipinagboot kaidto kan anghel na si Gabriel.

Uminagi an labi sa sambulan, asin si Jesus 40 aldaw na. Saen sia ngonyan dinara kan saiyang mga magurang? Sa templo sa Jerusalem, na mga pira sanang milya hale sa iniistaran ninda. Sono sa Pagboot nin Dios ki Moises, 40 aldaw pakapangaki sa sarong aking lalaki, hinahagad sa ina na magdara sa templo nin dolot manongod sa paglinig.

Iyan an ginibo ni Maria. Bilang saiyang dolot, nagdara sia nin duwang sadit na gamgam. Naghahayag ini nin sarong bagay manongod sa kamugtakan sa buhay ni Jose asin Maria. An Pagboot ni Moises nagsasabi na sarong ogbon na lalaking karnero, na mas mahal kisa mga gamgam, an maninigong idolot. Pero kun dai iyan kayang bakalon kan ina, igo na an duwang agbaan o duwang salampati.

Sa templo may sarong gurang na lalaki na kinarga si Jesus. An saiyang ngaran Simeon. An Dios nagpahayag saiya na dai sia magagadan sagkod na maheling nguna nia an ipinanugang Cristo, o Mesiyas, ni Jehova. Pag-abot ni Simeon sa templo sa aldaw na ini, giniyahan sia kan banal na espiritu pasiring sa aki na dara ni Jose asin Maria.

Mantang karga ni Simeon si Jesus sia nagpapasalamat sa Dios, na nagsasabing: “Ngonyan, Soberanong Kagurangnan, pinahahale mong talingkas an saimong oripon sa katoninongan sono sa saimong kapahayagan; huli ta naheling kan sakong mga mata an saimong paagi nin pagligtas na saimong inandam sa atubangan nin gabos na banwaan, sarong liwanag sa paghale kan suklob sa mga nasyon asin sarong kamurawayan kan saimong banwaan na Israel.”

Napangalas si Jose asin Maria kan madangog ninda ini. Dangan si Simeon binendisyonan sinda asin sinabihan si Maria na an saiyang aki “ibinugtak para sa pagkapukan asin sa pagbangon giraray kan dakol sa Israel” asin na an kamondoan, siring sa matarom na minasbad, malagbas sa saiyang kalag.

Presente sa okasyon na ini an 84-anyos na propetisa na an ngaran Ana. An totoo, sia dai noarin man nagpapalta sa templo. Kan oras mismong idto ruminani sia asin nagpoon na magpasalamat sa Dios asin magsaysay manongod ki Jesus sa gabos na maghihinanyog.

Kanigoan an paggayagaya ni Jose asin Maria sa mga pangyayaring ini sa templo! Sierto nanggad, an gabos na ini nagpapatunay sainda na an aki iyo an Saro na Ipinanuga nin Dios. Lucas 2:​21-38; Levitico 12:​1-8.

▪ Malinaw na noarin nakaugalean nang ngaranan an sarong lalaking omboy na Israelita?

▪ Ano an hinahagad sa sarong inang Israelita kun an saiyang aki 40 aldaw na, asin paano an pag-otob sa kahagadan na ini naghayag kan kamugtakan sa buhay ni Maria?

▪ Siisay an nakabisto kun siisay si Jesus sa okasyon na ini, asin paano ninda ini ipinaheling?