An Pinakadakulang Tawo na Nabuhay Kasuarin Pa Man
Kapitulo 8: Pagdulag sa Sarong Maisog na Hade
PINUKAW ni Jose si Maria tanganing sabihon saiya an sarong apretadong bareta. An anghel ni Jehova kapapaheling pa sana saiya, na an sabi: “Bangon, daraha an omboy asin an saiyang ina asin dulag kamo sa Egipto, asin umontok ka duman sagkod na sabihan taka; huli ta hahanapon ni Herodes an omboy tanganing sia gadanon.”
Tolos-tolos, sindang tolo duminulag. Asin tamang-tama huling naaraman na ni Herodes na an mga astrologo linoko sia asin nagharale na sa daga. Girumdomon, dapat kutana sindang bumalik saiya kun nanompongan na ninda si Jesus. Anggoton si Herodes. Kaya sa paghihingoang gadanon si Jesus, ipinagboot niang gadanon an gabos na aking lalaki sa Betlehem asin sa mga distrito kaiyan na dos anyos an edad asin pababa. Ibinasar nia an karkulasyon na ini sa edad sa impormasyon na enot na niang nakua sa mga astrologo na nagdatong hale sa Sirangan.
An pangadan sa gabos na sadit na aking lalaki sarong bagay na makatatakot nanggad paghelingon! An mga soldados ni Herodes surunodsunod na rinalaog an mga harong. Asin kun may maheling sindang sadit na aking lalaki, ginagabring ninda iyan sa saiyang ina. Mayo kitang ideya kun pirang omboy an saindang ginaradan, pero an grabeng panangis asin inagrangay kan mga ina nakaotob sa sarong hula sa Biblia kan propeta nin Dios na si Jeremias.
Mientras tanto, si Jose asin an saiyang pamilya ligtas na nakadulag pasiring sa Egipto, asin duman na sinda ngonyan nag-eerok. Pero sarong banggi an anghel ni Jehova nagpaheling na naman ki Jose sa sarong pangatorogan. “Magbangon ka, darahon mo an sadit na aki asin an saiyang ina,” an sabi kan anghel, “asin paduman ka sa daga nin Israel, huli ta idtong naghaharanap sa kalag kan sadit na aki garadan na.” Kaya bilang kaotoban nin saro pang hula sa Biblia na nagsasabing an Aki nin Dios aapodon hale sa Egipto, an pamilya nagbalik sa saindang sadiring daga.
Malinaw na gusto kutanang mag-istar ni Jose sa Judea, kun saen nag-eerok sinda sa banwaan nin Betlehem bago sinda nagdulag pasiring sa Egipto. Alagad naisihan nia na an maraot na aki ni Herodes na si Arquelao an hade ngonyan sa Judea, asin sa saro pang pangatorogan pinatanidan sia ni Jehova kan peligro. Kaya si Jose asin an saiyang pamilya nagbiyahe paamihanan asin nag-istar sa banwaan nin Nazaret sa Galilea. Digdi sa komunidad na ini, na harayo sa sentro nin relihiyosong buhay kan mga Judio, si Jesus nagdakula. Mateo 2:13-23; Jeremias 31:15; Oseas 11:1.
▪ Kan dai bumalik an mga astrologo, ano an makatatakot na ginibo ni Hadeng Herodes, pero paano naingatan si Jesus?
▪ Pagbalik hale sa Egipto, taano si Jose ta dai nag-istar giraray sa Betlehem?
▪ Anong mga hula sa Biblia an naotob durante kan peryodong ini nin panahon?