An Pinakadakulang Tawo na Nabuhay Kasuarin Pa Man

Kapitulo 9: An Buhay-Pamilya ni Jesus sa Saiyang Pagkabarobata

KAN nagdadakula na si Jesus sa Nazaret, iyan medyo sadit, bakong importanteng siudad. Yaon iyan sa mabolod na daga nin sarong lugar na inaapod na Galilea, bakong harayo sa magayon na Kababan nin Jezreel.

Kan si Jesus, na posibleng dos anyos na, darahon digdi ni Jose asin Maria hale sa Egipto, malinaw na sia pa sana an aki ni Maria. Pero dai man naghaloy. Pag-abot nin panahon, si Santiago, Jose, Simon, asin Judas namundag, asin si Maria asin Jose nagin mga magurang man nin mga aking babae. Sa katapustapusi si Jesus nagkaigwa nin, kisuerra, anom na ngohod na tugang na lalaki asin babae.

Si Jesus may iba pa man na mga paryentes. Naaraman na niato an manongod sa saiyang matuang pinsan na si Juan, na nag-eerok dakol na milya an rayo sa Judea. Pero an nag-eerok sa may harani sa Galilea si Salome, na malinaw na tugang ni Maria. Si Salome agom ni Zebedeo, kaya an saindang duwang aking lalaki, si Santiago asin Juan, mga pinsan ni Jesus. Dai niato aram kun baga, mientras na nagdadakula, haloy na nakaibaiba ni Jesus an mga aking lalaking ini, pero kan huri sinda nagin dayupot na magkairiba.

Si Jose kaipuhan na magtrabaho nin husto tanganing masuportaran an saiyang nagdadakulang pamilya. Saro siang panday. Pinadakula ni Jose si Jesus bilang sadiri niang aki, kaya si Jesus inaapod na “an aki kan panday.” Si Jesus tinokdoan man ni Jose na magin panday, asin nakanood siang marhay. Iyan an dahelan na kan huri an mga tawo nagsarabi manongod ki Jesus, “Ini an panday.”

An buhay kan pamilya ni Jose nakasentro sa pagsamba ki Jehova Dios. Bilang pag-otob sa Pagboot nin Dios, si Jose asin Maria nagtao sa saindang mga aki nin espirituwal na pagtotokdo ‘kun sinda nagtutukaw sa saindang harong, kun sinda naglalakaw sa dalan, kun sinda naghihigda, asin kun sinda minabangon.’ Igwa nin sinagoga sa Nazaret, asin makasisierto kita na si Jose regular man na ipinag-iiba an saiyang pamilya sa pagsamba duman. Alagad mayong duwa-duwa na nanompongan ninda an saindang pinakadakulang kaogmahan sa regular na mga pagbiyahe pasiring sa templo ni Jehova sa Jerusalem. Mateo 13:​55, 56; 27:56; Marcos 15:40; 6:3; Deuteronomio 6:​6-9.

▪ Kisuerra pira an ngohod na tugang na lalaki asin babae ni Jesus, asin ano an mga ngaran kan nagkapira sa sainda?

▪ Sairisay an tolong midbid na marhay na pinsan ni Jesus?

▪ Ano an nagin sekular na trabaho ni Jesus pag-abot nin panahon, asin taano?

▪ Anong mahalagang pagtotokdo an itinao ni Jose sa saiyang pamilya?