An Pinakadakulang Tawo na Nabuhay Kasuarin Pa Man
Kapitulo 68: Dugang Pang Pagtotokdo sa Ikapitong Aldaw
AN ULTIMONG aldaw kan Kapiyestahan nin mga Tabernakulo, an ikapitong aldaw, nagpapadagos pa. Si Jesus nagtotokdo sa kabtang kan templo na nginaranan na “kaha nin kayamanan.” Malinaw na ini an lugar na inaapod na Korte nin mga Babae kun saen igwa nin mga lalagan na duman idinideposito kan mga tawo an saindang mga kontribusyon.
Barubanggi durante kan kapiyestahan, igwa nin pinapalaad na espesyal na ilaw sa lugar na ini kan templo. Apat na darakulaon na kandelero an nakabugtak digdi, na an kada saro igwa nin apat na darakulang palanggana na pano nin lana. An liwanag hale sa mga lamparang ini, na nagpapalaad sa lanang gikan sa 16 na palanggana, igo nang marhay tanganing ilawan an palibot sagkod sa harayong distansia kun banggi. An sinabi ngonyan ni Jesus puwedeng magpagirumdom sa mga naghihinanyog saiya mapadapit kan liwanag na ini. “Ako iyo an liwanag kan kinaban,” an ipinahayag ni Jesus. “An minasunod sako dai nanggad maglalakaw sa kadikloman, kundi magkakaigwa kan liwanag nin buhay.”
Kuminontra an mga Fariseo: “Ika nagpapatotoo manongod sa saimo man sana; an saimong patotoo bakong totoo.”
Sa pagsimbag nagsabi si Jesus: “Dawa kun ako nagpapatotoo manongod sa sako man sana, totoo an sakong patotoo, huli ta aram ko kun saen ako hale asin kun saen ako paduman. Alagad dai nindo aram kun saen ako hale asin kun saen ako paduman.” Idinagdag nia: “Ako saro na nagpapatotoo dapit sa sakong sadiri, asin an Ama na nagsugo sako nagpapatotoo dapit sa sako.”
“Haen an saimong Ama?” an boot maaraman kan mga Fariseo.
“Dai nindo ako midbid ni an sakong Ama,” an simbag ni Jesus. “Kun talagang namidbid nindo ako, midbid man kutana nindo an sakong Ama.” Minsan ngani boot pa kan mga Fariseo na arestohon si Jesus, mayo nin siisay man na nagdotdot saiya.
“Ako mahale,” an sinabi liwat ni Jesus. “Kun saen ako maduman dai kamo makakaduman.”
Huli kaini an mga Fariseo nagpoon na magngalas: “Dai nia gagadanon an saiyang sadiri, bako daw? Huli ta sia nagsasabi, ‘Kun saen ako maduman dai kamo makakaduman.’”
“Kamo mga tagaibaba,” an paliwanag ni Jesus. “Ako tagaitaas. Kamo mga tagadigdi sa kinaban na ini; ako bakong tagadigdi sa kinaban na ini.” Dangan idinagdag nia: “Kun dai kamo nagtutubod na ako iyo sia, kamo magagadan sa saindong mga kasalan.”
Siyempre, an boot sabihon ni Jesus iyo an saiyang pag-eksister bago nagin tawo asin an saiyang pagigin an ipinanugang Mesiyas, o Cristo. Minsan siring, sinda naghapot, na mayong dudang igwa nin dakulang pagduhagi: “Siisay ka?”
Sa atubang kan saindang pagsikwal, si Jesus suminimbag: “Tadaw ta nakikipag-olay pa ako saindo?” Pero nagpadagos sia sa pagsabi: “Sia na nagsugo sako totoo, asin an mismong mga bagay na nadangog ko saiya itinataram ko sa kinaban.” Nagpadagos si Jesus: “Kun ikinaitaas na nindo an Aki nin tawo, dangan maaaraman nindo na ako iyo sia, asin na dai ako naggigibo nin ano man sa sakong sadiring kabotan; kundi siring sa pagkatokdo sa sako kan Ama itinataram ko an mga bagay na ini. Asin sia na nagsugo sa sako nasa sako; dai nia ako pinabayaan, huli ta danay kong ginigibo an mga bagay na nakapaoogma sa saiya.”
Kan sabihon ni Jesus an mga bagay na ini, dakol an nagtubod saiya. Sa mga ini sia nagsabi: “Kun kamo magdanay sa sakong tataramon, kamo tunay na sakong mga disipulo, asin mamimidbid nindo an katotoohan, asin bubutasan kamo kan katotoohan.”
“Kami banhi ni Abraham,” an simbag kan mga nagtutumang sa saiya, “asin dai pa kami noarin man naoripon nin siisay man. Tadaw ta nagsasabi ka, ‘Kamo bubutasan’?”
Minsan ngani an mga Judio parateng napairarom kaidto sa pagdominar nin ibang nasyon, dai ninda minimibid na kagurangnan an siisay man na nan-aapi. Nagsasayuma sindang apodon na mga oripon. Pero idinoon ni Jesus na sinda talagang mga oripon. Sa anong paagi? “Sa katotoohan ako nagsasabi sa saindo,” sabi ni Jesus, “an lambang naggigibo nin kasalan oripon nin kasalan.”
An pagsayumang akoon an saindang pagkaoripon sa kasalan nagsasapeligro sa mga Judio. “An oripon dai nagdadanay sa harong sagkod lamang,” an paliwanag ni Jesus. “An aki nagdadanay sagkod lamang.” Mantang an oripon mayo nin diretso sa mga mana, namemeligro siang mapahale ano man na oras. Solamenteng an aki na aktuwal na ipinangaki o inataman na magin kaiba kan pamilya an nagdadanay “sagkod lamang,” an boot sabihon, sagkod na sia nabubuhay.
“Kaya kun butasan kamo kan Aki,” an pagpadagos ni Jesus, “kamo magigin tunay na butas.” Kun siring, an katotoohan na minabutas sa mga tawo iyo an katotoohan manongod sa Aki, si Jesu-Cristo. Solamenteng paagi sa pag-atang kan saiyang sangkap na buhay bilang tawo na an siisay man puwedeng makabutas sa nakagagadan na kasalan. Juan 8:12-36.
▪ Saen nagtokdo si Jesus kan ikapitong aldaw? Ano an nangyayari duman kun banggi, asin paano ini konektado sa pagtotokdo ni Jesus?
▪ Ano an sabi ni Jesus manongod sa saiyang pinaghalean, asin ano an maninigong ihayag kaini manongod sa kun siisay sia?
▪ Sa anong paagi oripon an mga Judio, pero anong katotoohan an mabutas sa sainda?