An Pinakadakulang Tawo na Nabuhay Kasuarin Pa Man

Kapitulo 69: An Hapot Dapit sa Pagkaama

DURANTE kan kapiyestahan, an pakikipag-olay ni Jesus sa mga namomoon na Judio orog na nag-init. “Aram ko na kamo banhi ni Abraham,” an pag-ako ni Jesus, “alagad minamawot nindong gadanon ako, huli ta an sakong tataramon dai nagtatalubo dian sa saindo. Itinataram ko an mga bagay na naheling ko sa sakong Ama; asin kamo, kun siring, naggigibo kan mga bagay na nadangog nindo sa saindong ama.”

Minsan ngani dai ipinamimidbid an saindang ama, lininaw ni Jesus na an saindang ama laen kan sa saiya. Dai nakakaaram kun siisay an nasa isip ni Jesus, an mga namomoon na Judio nagsimbag: “Si Abraham an samong ama.” Naghohona sinda na an saindang pagtubod pareho kan ki Abraham, na katood nin Dios.

Alagad, binigla sinda ni Jesus sa simbag na: “Kun kamo mga aki ni Abraham, giboha nindo an mga gibo ni Abraham.” Iyo nanggad, an tunay na aki inaarog an saiyang ama. “Alagad ngonyan pinagmamaigotan nindong gadanon ako,” an sabi ni Jesus, “sarong tawo na nagsabi saindo kan katotoohan na nadangog ko sa Dios. Dai ini ginibo ni Abraham.” Kaya nagsabi giraray si Jesus: “Ginigibo nindo an mga gibo kan saindong ama.”

Dai pa giraray ninda nasasabotan kun siisay an boot sabihon ni Jesus. Naninindogan sinda na sinda lehitimong mga aki ni Abraham, na nagsasabi: “Dai kami ipinangaki sa pakikisaro.” Kaya, sa paghingakong tunay na mga parasamba na arog ki Abraham, nag-insister sinda: “Kami igwa nin sarong Ama, an Dios.”

Pero an Dios daw talaga an saindang Ama? “Kun an Dios iyo an saindong Ama,” nagsimbag si Jesus, “namomoot kutana kamo sa sako, huli ta ako gikan sa Dios asin uya ako digdi. Dai man ako napadigdi sa sadiri kong kabotan, kundi isinugo ako kan Sarong iyan. Taano ta dai nindo aram an sakong sinasabi?”

Hiningoa ni Jesus na ipaheling sa relihiyosong mga namomoon na ini an kaaabtan kan saindang pagsikwal sa saiya. Pero ngonyan prangka niang sinabi: “Gikan kamo sa saindong ama na Diablo, asin boot nindo na gibohon an mga horot kan saindong ama.” Anong klaseng ama an Diablo? Ipinamidbid sia ni Jesus na paragadan asin nagsabi man: “Sia sarong putikon asin iyo an ama kan kaputikan.” Kaya nagkonklusyon si Jesus: “An gikan sa Dios naghihinanyog sa mga kasabihan nin Dios. Iyan an dahelan kun taano ta dai kamo naghihinanyog, huli ta bako kamong gikan sa Dios.”

Ikinaanggot an pagkondenar ni Jesus, an mga Judio nagsimbag: “Bako daw na tama an sinasabi mi, Ika Samaritano asin igwa kang demonyo?” An terminong “Samaritano” ginagamit bilang ekspresyon nin pagduhagi asin paglanghad, palibhasa an mga Samaritano mga tawong ikinaoongis nin mga Judio.

Dai iniintindi an mapagduhaging pagtaram manongod sa pagigin sarong Samaritano, si Jesus nagsimbag: “Mayo ako nin demonyo, kundi ako nagtataong onra sa sakong Ama, asin hinahalean nindo ako nin onra.” Sa pagpadagos, si Jesus nagtao nin nakakakilag na panuga: “Kun an siisay man mag-otob sa sakong tataramon, dai sia noarin man makakaheling nin kagadanan.” Siyempre, dai boot sabihon ni Jesus na an gabos na nagsusunod sa saiya literal na dai noarin man makakaheling nin kagadanan. Imbes, boot niang sabihon na dai noarin man sinda makakaheling nin daing sagkod na kalaglagan, o “ikaduwang kagadanan,” na gikan dian mayo nin pagkabuhay liwat.

Alagad, literal an pagkaintindi kan mga Judio sa mga tataramon ni Jesus. Kaya, sinda nagsabi: “Ngonyan aram na nanggad niamo na ika igwang demonyo. Si Abraham nagadan, siring man an mga propeta; alagad ika nagsasabi, ‘Kun an siisay man mag-otob sa sakong tataramon, sia dai noarin man makakanamit nin kagadanan.’ Bako kang orog na dakula sa samong amang si Abraham, na nagadan, bako daw? Siring man, an mga propeta nagadan. Siisay ka sa paghona mo?”

Sa bilog na pag-orolay na ini, malinaw na itinotokdo ni Jesus sa mga tawong ini an bagay na sia an ipinanugang Mesiyas. Pero imbes na direktang simbagon an saindang hapot dapit sa kun siisay sia, si Jesus nagsabi: “Kun pinapamuraway ko an sakong sadiri, an sakong kamurawayan daing halaga. An sakong Ama an nagpapamuraway sako, sia na sinasabi nindo na saindong Dios; asin minsan siring dai nindo sia namidbid. Alagad midbid ko sia. Asin kun sinabi kong dai ko sia midbid magigin siring ako sa saindo, sarong putikon.”

Sa pagpadagos, sinambit giraray ni Jesus an maimbod na si Abraham, na nagsasabi: “Si Abraham na saindong ama naggayagayang gayo sa paglaom na maheling an sakong aldaw, asin iyan naheling nia asin naggayagaya.” Iyo, paagi sa mga mata nin pagtubod, si Abraham naglaom sa pagdatong kan ipinanugang Mesiyas. Sa saindang kadaihan nin pagtubod, an mga Judio nagsimbag: “Dai ka pa nin limang polong taon, asin naheling mo na si Abraham?”

“Sa katotoohan sinasabi ko sa saindo,” an simbag ni Jesus, “bago namundag si Abraham, iyo na ako.” Siyempre, an boot sabihon ni Jesus iyo an saiyang pag-eksister bago nagin tawo bilang makapangyarihan na espiritung persona sa langit.

Ikinaanggot an pagsabi ni Jesus na sia nabuhay na bago pa ki Abraham, an mga Judio nagpurot nin mga gapo tanganing gapoon sia. Alagad nagtago sia asin nagluwas sa templo na dai nakolgan. Juan 8:​37-59; Kapahayagan 3:​14; 21:8.

▪ Paano ipinaheling ni Jesus na sia asin an saiyang mga kaiwal igwa nin magkalaen na mga ama?

▪ Ano an kahulogan kan pag-apod kan mga Judio ki Jesus na Samaritano?

▪ Sa anong sentido boot sabihon ni Jesus na an saiyang mga parasunod dai noarin man makakaheling nin kagadanan?