Mga Saksi ni Jehova sa Bilog na Kinaban—Polandia
KAN tigholog nin 1989, an mga gobyernong Komunista poon sa Baltiko sagkod sa Itom na Dagat nagpoon na magaba. Mantang rinarapak an Kortinang Batbat, an mga nasyon sa Sirangan na Europa nagpoon sa paghanap kan saindang sadiring mga direksion. Kabilang sa mga iyan an Polandia, sarong nasyon na igwa nin dakol na bolod, patag na mga kaplanodohan, asin lubaklubak na mga bukid.a
An mga Polaco mahihigos na trabahador, asin an Polandia nakaprodusir nin nagkapirang bantog na pintor asin sientista sa kinaban. Pero, orog pa kaiyan, sinda ngonyan sarong nagdadakol na hukbo nin mga parabalangibog kan maogmang bareta kan Kahadean nin Dios.
Mapuso sa Pagbuyagyag kan Kaputikan
Sa Polandia dakol an boot na makanood kan katotoohan gikan sa Biblia. Alagad an iba inoolang kan saindang mga paryentes o kataraed. Halimbawa, sa lugar nin Wroclaw, an sarong interesadong misis nagpondo sa pag-adal sa Biblia kaiba kan mga Saksi ni Jehova kan gipiton sia kan pamilya asin mga katood. Minsan siring, an saiyang tin-edyer na aking babae nagbabasa nin serye nin mga artikulo sa Torrengbantayan na nagbubuyagyag kan falsong relihiyon. Nakapukaw ini kan saiyang interes sa katotoohan.
Pakalihis nin anom na bulan na pag-adal sa Biblia, an hoben na ini nagdesisyon na putolon an gabos niang koneksion sa falsong relihiyon. Dinalaw nia an klerigo kan saiyang iglesya tanganing impormaran ini kan saiyang desisyon. Sinabi kaini saiya na sumurat kan minasunod: “Ako, si K—— P——, tinatalikdan an Katolikong pagtubod.”
Kan suminunod na Domingo, an kapahayagan na ini binasa sa simbahan. An lolo kan daragita nadismayo, asin an saiyang lola naghibi. Alagad, an ibang miembro kan parokya naghanga asin nagkomento: “Sa kahurihurihi, may sarong mapusong gayo na magsabing igwa nin dakol na kaputikan sa satong iglesya.” An mapusong tin-edyer na ini ngonyan bautisado nang espirituwal na tugang asin nakapoon na nin pitong pag-adal sa Biblia sa saiyang baryo.
‘Paagi sa Saindang mga Bunga’
An semanal na diaryong Kujawy i Pomorze ipinublikar an baretang “Mamimidbid Nindo Sinda Paagi sa Saindang Bunga.” Sa kabtang, an artikulo nagsabi na an mga parasamba sa Kakristianohan “sa katunayan daing gayo siniseryoso an relihiyosong mga prinsipyo na inako ninda. Laen nanggad sinda sa mga Saksi ni Jehova na ginigibo an ihinuhulit ninda, asin ihinuhulit ninda an mga pagboot sa Biblia.”
Pakatapos na ipalaen an itsura kan mga Saksi sa inaapod daang mga Kristiano, nagpadagos an bareta: “An ikaduwa posibleng marhay na dai nakakaaram, asin parateng gayo na dai nag-aaplikar, kan mahalagang mga katotoohan asin prinsipyo kan saindang pagtubod. . . . Paagi sa saindang paggawe, ipinaheheling kan mga Saksi ni Jehova an pagkaoroyon kan saindang mga tataramon asin hiro, sa siring pinatutunayan na bako sindang ‘mga falsong propeta,’ imbes, puwede sindang mamidbid paagi sa saindang mga bunga. ‘Noarin man an mga tawo dai minaguno nin ubas sa mga tonok o nin mga higos sa mga binit, bako daw?’ (Mateo 7:15-20).”
Sarong misis an nagsurat sa semanal na diaryong Przyjaciółka, na namomondong gayo na an saiyang aking lalaki binayaan an Iglesya Katolika asin nagin saro sa mga Saksi ni Jehova. Ano an nagin sadol kan editor? “Kun an saimong aking lalaki nakiasosyar sa mga Saksi ni Jehova, nanodan asin inako an saindang pagtubod, iyan gabos saiya mismong desisyon, na dapat na midbidon asin igalang. . . . An grupong ini nin relihiyon namimidbid paagi sa dakol na magayon asin kawiliwili sa sosyal na mga kabtang, siring baga kan saindang pambihirang pagkasararo asin hararom na pagkamagturugang, dakulang pagkasadiosan saka dayupot na pagsunod sa inooyonan na mga susundon sa pamumuhay sa komunidad, asin sa katapustapusi, abilidad na mamuhay kaoyon sa saindang katotoohan, na inootob sa gibo an sinasabing mga pamantayan. Ini mahalagang mga kuwalidad.”
[Nota sa Ibaba]
a Para sa dugang na impormasyon, helingon an 1994 Calendar of Jehovah’s Witnesses.
[Kahon sa pahina 9]
SUMARYO KAN NASYON
1993 na Taon nin Paglilingkod
PINAKAHALANGKAW NA BILANG NIN NAGPAPATOTOO: 113,551
KATIMBANG: 1 Saksi sa 339
NAG-ATENDER SA MEMORIAL: 235,642
PROMEDYONG MGA PARAHAYAG NA PAYUNIR: 7,961
PROMEDYONG MGA PAG-ADAL SA BIBLIA: 79,131
BILANG NIN NABAUTISMOHAN: 8,164
BILANG NIN MGA KONGREGASYON: 1,397
SANGANG OPISINA: Nadarzyn
[Ritrato sa pahina 9]
Sangang opisina kan Polandia sa Lodz kan 1948
[Ritrato sa pahina 9]
Paghuhulit paagi sa placard, Hunyo 1948, sa dating Sirangan na Prusia
[Ritrato sa pahina 9]
Setenta y dos na miembro kan tawohan sa Bethel sa Polandia, Enero 1993
[Ritrato sa pahina 9]
An bagong sanga sa Nadarzyn