“Iyan an Maninigong Ugale nin Tunay na mga Kristiano”

SA SAIYANG libro kan 1990 na Arbeit macht tot​—Eine Jugend in Auschwitz (An Trabaho Nakakagadan Saindo​—Mga Hobenes na Lalaki sa Auschwitz), an naligtas na buhay sa Auschwitz na si Tibor Wohl isinurat an sarong pag-oolay na nadangog nia sa duwang kairibang preso. An saro, Austriano, nagsabing “daing pagtubod.” Minsan siring, inomaw nia an mga preso na nakasulot kan lilang triangulong tsapa​—an mga Estudyante sa Biblia, na pag-apod kaidto sa mga Saksi ni Jehova sa kampo.

“Dai sinda nakikiguerra,” nagsabi an Austriano sa saiyang kaiba. “Mapagadan na sana sinda kisa mangadan sinda nin siisay man. Sa sakong punto-de-vista iyan an maninigong ugale nin tunay na mga Kristiano. Dapat kong sabihon saindo an manongod sa magayonon na pangyayari kan nakaiba ko sinda. Kairiba mi pareho an mga Judio asin Estudyante sa Biblia sa sarong edipisyo sa kampo sa Stutthof. Kan mga aldaw na idto an mga Estudyante sa Biblia kinaipuhan na gumibo nin puwersahan na trabaho, sa luwas na malipot na gayo. Dai niamo masabotan kun paano sinda nakaligtas na buhay. Nagsabi sinda na tinawan sinda ni Jehova nin kosog. Kaipuhan nindang marhay an saindang tinapay, huli ta gutom na gayo sinda. Alagad ano an saindang ginibo? Tiniripon ninda an gabos nindang tinapay, kinua an kabanga kaiyan asin itinao an kabanga pa sa saindang mga tugang, an saindang espirituwal na mga tugang, na uminabot na makuri an gutom hale sa ibang kampo. Asin inistimar ninda an mga ini asin hinadokan sinda. Bago sinda magkakan, namibi sinda, asin pakatapos kaiyan an saindang mga lalauogon nagliwanag sa kaogmahan. Sinabi ninda na mayo nang nagugutom. Kaya, naheling nindo, dangan naisip ko sa sakong sadiri, ‘Ini an tunay na mga Kristiano.’ Iyan an permi kong iniimahinar na maninigo sindang magin siring. Kanigoan kutana karahay na tawan an nagugutom na gayong mga kairiba nin siring na pag-istimar digdi sa Auschwitz!”