An Pinakadakulang Tawo na Nabuhay Kasuarin Pa Man

Kapitulo 76: Pagkakan sa Kaibanan nin Sarong Fariseo

PAKATAPOS na simbagon ni Jesus an mga kritiko na kinustion an gikanan kan saiyang kapangyarihan sa pagpaomay nin sarong lalaki na dai nakakataram, sarong Fariseo an nag-imbitar sa saiya sa pagkakan. Bago sinda magkakan, an mga Fariseo naggigibo kan rituwal na paghanaw kan saindang kamot sagkod sa siko. Ginigibo ninda ini bago asin pakatapos kumakan asin dawa sa pag-oltanan nin mga pagpuwesto nin putahe. Minsan ngani an tradisyon dai nagbabalga sa nasusurat na pagboot nin Dios, iyan minalihis pa sa hinahagad nin Dios kun manongod sa bagay nin seremonyal na kalinigan.

Kan dai inotob ni Jesus an tradisyon, napangalas an kag-imbitar sa saiya. Minsan ngani puwedeng dai berbal na ipinahayag an saiyang pagngalas, narisa iyan ni Jesus asin nagsabi: “Ngonyan kamong mga Fariseo, kamo naglilinig kan luwas nin kopa asin plato, alagad an laog nindo pano nin pananamsam asin karatan. Mga tawong bakong makatanosan! Sia na naggibo kan luwas naggibo man kan laog, bako daw?”

Sa siring ibinuyagyag ni Jesus an pagsaginsagin kan mga Fariseo na naghahanaw kan saindang mga kamot sa rituwalistikong paagi pero dai naghuhugas kan karatan kan saindang puso. Sia naghatol: “Itao nindo bilang balaog nin pagkaherak an mga bagay na nasa laog, asin, uya! an gabos na iba pang bagay malinig sa saindo.” An saindang pagtao maninigong minomotibar nin mamomoton na puso, bakong nin pagmawot na pahangaon an iba paagi sa saindang paimbabaw na katanosan.

“Herak man sa saindo mga Fariseo,” an pagpadagos ni Jesus, “huli ta itinatao nindo an ikasampulo kan yerbabuena asin kan ruda asin kan gabos na iba pang gugulayon, alagad linilihisan nindo an hustisya asin an pagkamoot nin Dios! Obligado kamong gibohon an mga bagay na ini, alagad an iba pang bagay na idto dai maninigong paglingawan.” An Pagboot nin Dios sa Israel naghahagad kan pagbayad nin mga tinagba, o ikasampulong kabtang, kan ani sa mga oma. An yerbabuena asin ruda saradit na tinanom o masitas na ginagamit na panimpla sa kakanon. An mga Fariseo maingat na nagbabayad nin ikasampulo kan minsan mayong halagang mga masitas na ini, pero kinondenar sinda ni Jesus huli sa dai pag-intindi sa mas importanteng kahagadan na magpaheling nin pagkamoot, gumibo nin kabootan, asin magin hababa an boot.

Orog pa sindang kinokondenar, si Jesus nagsabi: “Herak man sa saindo mga Fariseo, huli ta kamo namomoot kan mga enotan na tukawan sa mga sinagoga asin kan mga pataratara sa mga sadan! Herak man sa saindo, huli ta kamo siring sa mga lolobngan nin girumdoman na dai naheheling, kaya an mga tawo naglalakaw sa ibabaw kan mga iyan asin dai nakakaaram kaiyan!” Dai naheheling an saindang karigsokan. An relihiyon kan mga Fariseo may pagpaabaw-abaw pero mayo nin panlaog na halaga! Iyan basado sa pagsaginsagin.

Naghihinanyog sa siring na pagkondenar, sarong abogado, saro kan mga madonong sa Pagboot nin Dios, an nagreklamo: “Paratokdo, sa pagsabi mo kan mga bagay na ini iniinsulto mo man kami.”

Pinapanimbag man ni Jesus an mga ekspertong ini sa Pagboot, na an sabi: “Herak man sa saindo na mga madonong sa Pagboot, huli ta pinapapasan nindo an mga tawo nin mga pasanon na masakit madara, alagad kamo mismo dai minadotdot sa mga pasanon paagi kan saro sa saindong mga moro! Herak man sa saindo, huli ta kamo nagtotogdok kan mga lolobngan nin girumdoman kan mga propeta, alagad an saindong mga apoon an naggadan sa sainda!”

An mga pasanon na nasambitan ni Jesus iyo an berbal na mga tradisyon, pero an mga abogadong ini dai man lamang itinutuon an sarong sadit na regulasyon tanganing mas pagianon iyan para sa mga tawo. Ihinayag ni Jesus na kinonsinte pa ngani ninda an paggadan sa mga propeta, asin sia nagpatanid: “‘An dugo kan gabos na propeta na pinabolos poon sa pagkahaman kan kinaban [sisingilon] sa kapag-arakian na ini, poon sa dugo ni Abel sagkod sa dugo ni Zacarias, na ginadan sa pag-oltanan kan altar asin kan harong.’ Iyo, ako nagsasabi sa saindo, iyan sisingilon sa kapag-arakian na ini.”

An kinaban nin matutubos na katawohan nagpoon kan mamundag an mga aki ni Adan asin Eva; kaya, si Abel nabuhay sa “pagkahaman kan kinaban.” Kasunod kan maringis na paggadan ki Zacarias, ginaba nin sarong hukbo nin Siria an Juda. Alagad naghula si Jesus nin sarong mas grabeng paggaba sa saiyang sadiring kapag-arakian huli sa mas grabeng karatan kaiyan. An paggabang ini nangyari pakalihis nin mga 38 taon, kan 70 C.E.

Ipinagpapadagos an saiyang pagkondenar, si Jesus nagsabi: “Herak man sa saindo na madodonong sa Pagboot, huli ta hinale nindo an liyabe kan kaaraman; kamo mismo dai nagralaog, asin idtong nagraralaog saindong inolang!” An mga eksperto sa Pagboot may paninimbagan na ipaliwanag sa mga tawo an Tataramon nin Dios, na ihinahayag an kahulogan kaiyan. Pero dai ninda ini nagigibo asin hinahale pa ngani sa mga tawo an oportunidad na makasabot.

An mga Fariseo asin an mga eksperto sa ley anggot na marhay ki Jesus huli sa pagbuyagyag sa sainda. Paghale nia sa harong, pinonan ninda siang tumangon nin maisog asin sinalakay ninda sia nin mga hapot. Hiningoa nindang siodon sia sa pagsabi nin sarong bagay na magigin dahelan na ikapaaresto ninda sia. Lucas 11:​37-54; Deuteronomio 14:22; Miqueas 6:8; 2 Cronica 24:​20-25.

▪ Taano ta kinondenar ni Jesus an mga Fariseo asin an mga eksperto sa Pagboot?

▪ Anong mga pasanon an ipinapapasan kan mga abogado sa mga tawo?

▪ Kasuarin an “pagkahaman kan kinaban?”

(Ipagpapadagos sa masunod na luwas.)