An Pinakadakulang Tawo na Nabuhay Kasuarin Pa Man

Kapitulo 72: Isinugo ni Jesus an 70

TIGHOLOG ngonyan nin 32 C.E., bilog na tolong taon poon kan bautismo ni Jesus. Sia asin an saiyang mga disipulo kaaatender pa sana sa Kapiyestahan nin mga Tabernakulo sa Jerusalem, asin malinaw na sinda nasa harani pa. Sa katunayan, ginamit ni Jesus an kadaklan kan natatadang anom na bulan kan saiyang ministeryo magsalang sa Judea o sa ibong sana kan Salog nin Jordan sa distrito nin Perea. An teritoryong ini kaipuhan man na makobrehan.

Totoo, pakatapos kan Paskua nin 30 C.E., si Jesus naggamit nin mga walong bulan sa paghuhulit sa Judea. Pero pakatapos na hingoahon siang gadanon duman kan mga Judio kan Paskua nin 31 C.E., ginamit nia an suminunod na sarong taon may kabanga sa pagtotokdo haros sa Galilea sana. Durante kan panahon na idto, nagbilog sia nin dakula, sinanay na marhay na organisasyon nin mga parahulit, sarong bagay mayo sia kan nakaagi. Kaya naglansar sia ngonyan nin pangultimong sigidong kampanya nin pagpatotoo sa Judea.

Pinonan ni Jesus an kampanyang ini paagi sa pagpili nin 70 disipulo asin isinugo sinda na manduwaduwa. Kaya, gabos-gabos igwa nin 35 padis nin parahulit kan Kahadean tanganing gibohon an teritoryo. An mga ini nag-irenot nang nagduman sa lambang siudad asin lugar na pinaplano ni Jesus na dumanan, na malinaw na kaiba kan saiyang mga apostol.

Imbes na pagbotan an 70 na magduman sa mga sinagoga, sinabihan sinda ni Jesus na lumaog sa pribadong mga harong, na nagpapaliwanag: “Saen man kamo magsakat sa sarong harong magsabi nguna kamo, ‘Magkaigwa logod nin katoninongan an harong na ini.’ Asin kun an katood nin katoninongan yaon dian, an saindong katoninongan mapapasaiya.” Ano an saindang magigin mensahe? “Magsabi kamo sa sainda,” an sabi ni Jesus, “an kahadean nin Dios nagrani sa saindo.” Manongod sa aktibidad kan 70, nagbabareta an Matthew Henry’s Commentary: “Arog kan saindang Kagurangnan, saen man sinda magsongko, sinda naghuhulit sa harong-harong.”

An mga instruksion ni Jesus sa 70 kapareho kaidtong itinao sa 12 kan sugoon nia an mga ini sa kampanya nin paghuhulit sa Galilea mga sarong taon an nakaagi. Bako sanang pinatanidan nia an 70 dapit sa pagtumang na mapapaatubang sa sainda, na iinaandam sinda sa pag-atubang kan mensahe sa mga kagharong, kundi tinawan man nia sinda nin kapangyarihan na magpaomay sa mga naghehelang. Kaya, pag-abot ni Jesus dai nahaloy pakatapos kaiyan, dakol an magigin galagang sabaton an Kagurangnan na an mga disipulo kayang gumibo nin siring na milagrosong mga bagay.

An paghuhulit kan 70 asin kasunod na gibohon ni Jesus luminawig nin medyo halipot na panahon. Dai nahaloy an 35 padis nin parahulit kan Kahadean nagpoon na magbaralik ki Jesus. “Kagurangnan,” an may kagayagayahan na nasabi ninda, “minsan an mga demonyo nasasakop mi paagi sa paggamit sa ngaran mo.” An siring kagayon na bareta nin paglilingkod siertong ikinaogma ni Jesus, huli ta sia nagsimbag: “Naheheling ko na si Satanas naholog na hale sa langit siring sa kikilat. Uya! tinawan ko kamo kan autoridad na magbatay sa mga halas asin amamatak.”

Aram ni Jesus na pagkamundag kan Kahadean nin Dios sa panahon kan katapusan, si Satanas asin an mga demonyo nia palalayason sa langit. Pero ngonyan an pagpalayas na ini sa dai naheheling na mga demonyo paagi sana sa mga tawo nagseserbing dagdag na asegurasyon dapit sa maabot na pangyayaring iyan. Kun siring, si Jesus nagtataram dapit sa maabot na pagkaholog ni Satanas hale sa langit bilang absolutong kasiertohan. Kaya, ini sa simbolikong sentido na an 70 tinawan nin autoridad na magbatay sa mga halas asin amamatak. Minsan siring, si Jesus nagsabi: “Dai kamo mag-orogma dapit kaini, na an mga espiritu nasasakop nindo, kundi mag-ogma kamo huli ta an saindong ngaran isinurat sa kalangitan.”

Labi-labi an paggayagaya ni Jesus asin hayag niang inomaw an saiyang Ama huli sa paggamit sa mapakumbabang mga lingkod niang ini sa siring kamakapangyarihan na paagi. Sa pagsalingoy sa saiyang mga disipulo, sia nagsabi: “Maogma an mga mata na nakaheheling kan mga bagay na saindong naheheling. Huli ta ako nagsasabi saindo, Dakol na propeta asin hade an nagmarawot na maheling an mga bagay na saindong naheheling alagad dai naheling an mga iyan, asin na madangog an mga bagay na saindong nadadangog alagad dai nadangog an mga iyan.” Lucas 10:​1-24; Mateo 10:​1-42; Kapahayagan 12:​7-12.

▪ Saen naghulit si Jesus durante kan enot na tolong taon kan saiyang ministeryo, asin anong teritoryo an kinobrehan nia sa saiyang huring anom na bulan?

▪ Saen pinaduman ni Jesus an 70 tanganing maghanap nin mga tawo?

▪ Taano ta sinabi ni Jesus na naheling nia si Satanas na naholog na hale sa langit?

▪ Sa anong sentido mababatayan kan 70 an mga halas asin amamatak?