An Pinakadakulang Tawo na Nabuhay Kasuarin Pa Man
Kapitulo 73: Sarong Parapakikapwa-tawong Samaritano
SI Jesus posibleng harani sa Betania, sarong baryo na mga tolong kilometro an rayo sa Jerusalem. Sarong lalaki na eksperto sa Pagboot ni Moises an nagdolok sa saiya na igwa nin hapot: “Paratokdo, paagi sa paggibo nin ano na ako magmamana nin buhay na daing katapusan?”
Narisa ni Jesus na an lalaki, na sarong abogado, naghahapot bako sanang para sa impormasyon kundi, imbes, huli ta gusto kaining baloon sia. An katuyohan kan abogado tibaad tanganing mapasimbag si Jesus sa paaging maghihinanakit an mga Judio. Kaya nagibo ni Jesus na mahayag an pagmansay kan abogado, na an hapot: “Ano an nasusurat sa Pagboot? Ano an nababasa mo?”
Bilang simbag, an abogado, na naggagamit nin pambihirang pagmansay, nagkotar sa mga pagboot nin Dios sa Deuteronomio 6:5 asin Levitico 19:18, na nagsasabi: “‘Kamotan mo si Jehova na saimong Dios sa bilog mong puso asin sa bilog mong kalag asin sa bilog mong kosog patin sa bilog mong isip,’ asin, ‘an saimong kataed siring sa saimo man sana.’”
“Tama an pagkasimbag mo,” an simbag ni Jesus. “Padagos mong gibohon ini asin magkakamit ka nin buhay.”
Alagad, an abogado dai nakontento. An simbag ni Jesus bakong gayong espisipiko para sa saiya. Gusto niang patunayan ni Jesus na tama an saiyang mga pagmansay asin kun siring na sia matanos sa saiyang pagtratar sa iba. Kaya, sia naghapot: “Siisay man nanggad an sakuyang kataed?”
Nagtutubod an mga Judio na an terminong “kataed” napapanongod sana sa mga kapwa Judio, siring sa garo baga ipinaririsa kan konteksto sa Levitico 19:18. Sa katunayan, kan huri maski si apostol Pedro nagsabi: “Kamo nakakaising gayo na bako nanggad sono sa katogonan na an sarong Judio makiiba o dumolok sa tagaibang rasa.” Kaya an abogado, asin posibleng pati an mga disipulo ni Jesus, nagtutubod na sinda matanos kun maboot nindang tinatratar an mga kapwa Judio sana, palibhasa, sa saindang pagmansay, an bakong mga Judio bako man talaga ninda mga kataed.
Dai nakokologan an mga naghihinanyog sa saiya, paano ikakatanos ni Jesus an saindang pagmansay? Sia nagsaysay nin sarong estorya, na posibleng basado sa sarong aktuwal na pangyayari: “May sarong [Judio],” an paliwanag ni Jesus, “na naglulugsot hale sa Jerusalem pasiring sa Jerico asin naholog sa mga parahabon, na sia kapwa hinubaan asin pinaghampak, asin nagharale, na binayaan siang haros gadan na.”
“Ngonyan, nagkanorongod,” an pagpadagos ni Jesus, “may sarong saserdote na naglulugsot duman sa dalan na idto, alagad, kan maheling nia sia, nagliklik sia sa ibong na kampi. Siring man, an sarong Levita man, paglugsot nia sa lugar asin naheling sia, nagliklik sa ibong na kampi. Alagad sarong Samaritano na nagbabaklay sa dalan an uminabot sa saiya asin, pakaheling sa saiya, sia napahiro nin pagkaherak.”
An dakol na saserdote asin an saindang mga katabang sa templo na Levita nag-iistar sa Jerico, na may distansiang 23 kilometros sa sarong peligrosong dalan na pababa nin 900 metros paghale sa pinaglilingkodan ninda sa templo sa Jerusalem. An saserdote asin Levita lalaoman na tumabang sa sarong kapwa Judio na nasa kagipitan. Pero dai sinda nagtabang. Imbes, sarong Samaritano an tuminabang. Ikinaoongis na marhay kan mga Judio an mga Samaritano kaya dai pa sana nahahaloy ininsulto ninda si Jesus sa pinakamalanit na mga termino paagi sa pag-apod sa saiya na sarong “Samaritano.”
Ano an ginibo kan Samaritano tanganing tabangan an Judio? “Dinolok nia sia,” an sabi ni Jesus, “asin binugkosan an saiyang mga lugad, na inulaan iyan nin lana asin arak. Dangan isinakay nia sia sa sadiri niang hayop asin dinara sia sa sarong sakatan asin inasikaso sia. Asin kan sunod na aldaw kuminua sia nin duwang denario [mga duwang aldaw na suweldo], itinao iyan sa kagharong kan sakatan, asin nagsabi, ‘Asikasohon mo sia, asin ano man an magasto mo apuwera kaini, babayadan taka pagbalik ko digdi.’”
Pakasaysay kan estorya, hinapot ni Jesus an abogado: “Siisay sa tolong ini an para sa saimo naggibo kan saiyang sadiri na kataed kan lalaki na naholog sa mga parahabon?”
Palibhasa dai maako an pag-atribuwir nin ano man na merito sa sarong Samaritano, suminimbag sana an abogado: “An saro na naghirong may pagkaherak sa saiya.”
“Lakaw asin gumibo ka mismo nin siring,” an pagtapos ni Jesus.
Kun direktang sinabi ni Jesus sa abogado na an mga bakong Judio mga kataed man kaini, bako sanang dai ini aakoon kan lalaki kundi an kadaklan kan mga nagdadangog posibleng kuminampi sa saiya sa saiyang pakikipag-olay ki Jesus. Alagad, an tunay-na-buhay na estoryang ini nagtaong liwanag sa dai mapapahimutikan na paagi na an satong mga kataed kabilang an mga tawong bako niato kapareho an rasa asin nasyonalidad. Kanigoan kahangahangang paagi an pagtotokdo ni Jesus! Lucas 10:25-37; Gibo 10:28; Juan 4:9; 8:48.
▪ Ano an mga ihinapot kan abogado ki Jesus, asin ano an malinaw na katuyohan nia sa paghapot?
▪ Sairisay sa pagtubod kan mga Judio an saindang mga kataed, asin ano an dahelan na maniwala na pati an mga disipulo arog man kaini an pagmansay?
▪ Paano ipinaliwanag ni Jesus an tamang pagmansay kaya dai iyan mapahimutikan kan abogado?