An Pinakadakulang Tawo na Nabuhay Kasuarin Pa Man
Kapitulo 87: Magtagama Para sa Ngapit na Igwa nin Praktikal na Kadonongan
Katatapos pa sanang isaysay ni Jesus an estorya dapit sa gastador na aki sa sarong kadaklan na kabale an saiyang mga disipulo, madayang mga parasingil nin buhis asin iba pang midbid na mga parakasala, saka an mga eskriba asin Fariseo. Ngonyan, kinakaolay an saiyang mga disipulo, nagsaysay sia nin sarong ilustrasyon manongod sa sarong tawong mayaman na nag-ako nin bakong magayon na bareta manongod sa namamahala sa saiyang harong, o pinaniwalaan.
Oyon ki Jesus, inapod kan tawong mayaman an saiyang pinaniwalaan asin sinabihan sia na pahahaleon na nia sia. “Ano daw an gigibohon ko, ta hahaleon sa sako kan sakong kagurangnan an pagigin pinaniwalaan?” an paghorophorop kan pinaniwalaan. “Bako akong gayo makosog tanganing maggudak, nasosopog akong makilimos. A! Aram ko na an gigibohon ko, tanganing, kun haleon na ako sa pagigin pinaniwalaan, aakoon ako kan mga tawo sa saindang harong.”
Ano an plano kan pinaniwalaan? Inapod nia an mga may utang sa saiyang kagurangnan. “Gurano an utang mo?” an hapot nia.
An enot nagsimbag, ‘2,000 litro nin lana nin olibo.’
‘Kuaa an saimong nasusurat na kasundoan asin tumukaw ka patin tolos-tolos na isurat mong 1,100,’ an sabi nia sa saiya.
Hinapot nia an saro pa: ‘Ngonyan ika, gurano an utang mo?’
Sinabi nia, ‘22,000 litro nin trigo.’
‘Kuaa an saimong nasusurat na kasundoan asin isurat mong 18,000.’
An pinaniwalaan igwa nin diretso na inaan an kantidad na inutang sa saiyang kagurangnan, mantang sia pa an namamahala sa pinansial na mga aktibidad kan saiyang kagurangnan. Paagi sa pag-ina sa mga kantidad, nakikikatood sia sa mga makababalos sa saiya nin mga pabor kun mawaran na sia kan saiyang trabaho.
Kan maaraman kan kagurangnan an nangyari, naghanga sia. Sa katunayan, saiyang ‘kinomendaran an pinaniwalaan, minsan ngani maraot, huli ta sia naghiro na igwa nin praktikal na kadonongan.’ Iyo nanggad, idinagdag ni Jesus: “An mga aki kan palakaw na ini nin mga bagay mas madonong sa praktikal na paagi sa saindang sadiring kapag-arakian kisa sa mga aki kan liwanag.”
Ngonyan, ipinaheheling an leksion sa saiyang mga disipulo, nagpakosog si Jesus: “Makikatood kamo paagi sa maraot na mga kayamanan, tanganing, kun iyan masudya na, kamo akoon ninda sa daing katapusan na mga erokan.”
Dai kinokomendaran ni Jesus an pinaniwalaan huli sa saiyang karatan kundi sa saiyang harayo an pananaw, praktikal na kadonongan. Sa parate “an mga aki kan palakaw na ini nin mga bagay” madonong na ginagamit an saindang kuwarta o posisyon tanganing makikatood sa mga makababalos sa sainda nin mga pabor. Kaya kaipuhan man na gamiton kan mga lingkod nin Dios, an “mga aki kan liwanag,” an saindang materyal na mga kayamanan, an saindang “maraot na mga kayamanan,” sa madonong na paagi tanganing makinabang sinda mismo.
Pero arog kan sabi ni Jesus, maninigo sindang makikatood paagi sa mga kayamanan na ini sa mga puwedeng umako sainda “sa daing katapusan na mga erokan.” Para sa mga miembro kan sadangoton na aripompon, an mga lugar na ini nasa langit; para sa “ibang karnero,” an mga iyan nasa Paraisong daga. Mantang si Jehova asin an saiyang Aki sana an makakaako sa mga tawo sa mga lugar na ini, maninigo kitang magmahigos na pataluboon an pakikatood sa sainda paagi sa paggamit sa ano man na “maraot na mga kayamanan” na puwedeng igwa kita sa pagsuportar sa intereses kan Kahadean. Dangan, kun an materyal na mga kayamanan masudya o mapara na, na siertong mangyayari, maseseguro an satong daing katapusan na ngapit.
Nagpadagos si Jesus sa pagsabi na an mga tawong maimbod sa pag-asikaso minsan sa materyal, o sadit, na mga bagay na ini magigin maimbod man sa pag-asikaso sa mga bagay na orog na mahalaga. “Kun siring,” an pagpadagos nia, “kun dai nindo napatunayan na kamo maimbod mapadapit sa maraot na mga kayamanan, siisay an maniniwala saindo kan tunay [an boot sabihon, espirituwal, o pan-Kahadean, na intereses]? Asin kun dai pa nindo napatunayan na kamo maimbod mapadapit kan sa iba [an pan-Kahadean na intereses na ipinaniwala nin Dios sa saiyang mga lingkod], siisay an matao saindo kan para sa saindo [an balos na buhay sa daing katapusan na mga erokan]?”
Dai nanggad kita puwedeng magin tunay na mga lingkod nin Dios asin kadungan kaiyan magin mga oripon nin maraot na mga kayamanan, materyal na mga kayamanan, siring kan ikinonklusyon ni Jesus: “Mayong surogoon sa harong na puwedeng magpaoripon sa duwang kagurangnan; huli ta, arin man sa ikakaongis nia an saro asin mamomotan an ikaduwa o magdadanay sia sa saro asin isisikwal an ikaduwa. Dai kamo puwedeng magin mga oripon nin Dios asin nin mga kayamanan.” Lucas 15:1, 2; 16:1-13; Juan 10:16.
▪ Paano an pinaniwalaan sa ilustrasyon ni Jesus nakikatood sa mga makakatabang sa saiya sa huri?
▪ Ano an “maraot na mga kayamanan,” asin paano kita makakapakikatood paagi sa mga iyan?
▪ Siisay an makakaako sa sato sa “daing katapusan na mga erokan,” asin anong mga lugar ini?