An Nagdadanay sa Integridad na Nasyon

“Buksi nindo an mga tata, tanganing makalaog an matanos na nasyon na nagpapadanay sa maimbod na gawe.”​—ISAIAS 26:2.

1. Taano ta nakabibigla an tataramon ni Isaias manongod sa sarong “matanos na nasyon”?

NGONYAN, igwang gabos na klase nin nasyon. An iba demokrasya, an iba diktadora. An iba mayaman, an iba pobre. Sarong bagay an parareho sinda: An gabos kabtang kan kinaban na si Satanas an dios. (2 Corinto 4:4) Manongod kaini, an mga tataramon ni Isaias puwedeng ikabigla nin iba kan sia magsabi: “Buksi nindo an mga tata, tanganing makalaog an matanos na nasyon na nagpapadanay sa maimbod na gawe.” (Isaias 26:2) Sarong matanos na nasyon? Iyo, igwa nin sarong matanos na nasyon, huli ta an hula nagtotokdo sa pag-eksister kaiyan sa satong kaaldawan. Paano mamimidbid an pambihirang nasyon na ini?

2. Ano an “matanos na nasyon”? Paano niato naaaraman?

² Sa pagkatradusir kan New World Translation sa Isaias 26:​2, an nasyon sinasabing “nagpapadanay sa maimbod na gawe.” Tinatradusir kan King James Version (marhen) an bersikulo na, “an matanos na nasyon na nag-ootob kan mga katotoohan.” An duwa angay na paglaladawan. Sa katunayan, an matanos na nasyon pasil na mamidbid huli ta iyan an solamenteng nasyon digdi sa daga na sakop kan Cristong Hade, kaya bakong kabtang kan kinaban ni Satanas. (Juan 17:16) Bilang siring, an mga miembro kaiyan midbid sa ‘pagpapadanay na marahay kan saindang ugale sa tahaw nin mga nasyon.’ Sinusunod ninda an estilo nin pamumuhay na nagpapamuraway sa Dios. (1 Pedro 2:12) Saro pa, saen man sinda sa kinaban, sinda kabtang kan “kongregasyon kan nabubuhay na Dios, harigi asin tukod kan katotoohan.” (1 Timoteo 3:15) Sa pagsuportar sa katotoohan, sinasayumahan ninda an paganong mga pilosopiya na itinotokdo kan Kakristianohan, asin pinapanggagana ninda an “daing kasalak na gatas kan tataramon”​—an Tataramon nin Dios, an Biblia. (1 Pedro 2:2) Dugang pa, maigot nindang ihinuhulit an maogmang bareta kan Kahadean “sa gabos na linalang sa sirong nin langit.” (Colosas 1:23) Mapagdududahan daw na an nasyon na ini kompuwesto kan mga natatada kan “Israel nin Dios,” an kongregasyon nin linahidan na mga Kristiano? Dai nanggad!​—Galacia 6:16.

Namundag an Nasyon

3. Iladawan kun paano namundag an “matanos na nasyon.”

³ Kasuarin namundag an “matanos na nasyon”? An kapinonan kaiyan ihinula sa libro nin Isaias. Sa Isaias 66:​7, 8, satong mababasa: “Bago sia [an Sion] purusan nangaki na sia. Bago umabot sa saiya an kolog nin pangangaki, nangaki sia nin sarong aking lalaki. . . . An Sion pinurusan asin nangaki sa saiyang mga aking lalaki.” Pambihira nanggad, an Sion, an langitnon na organisasyon nin Dios, nangaki nin “aking lalaki” bago sia pinurusan. Kan 1914 an Mesiyanikong Kahadean namundag sa kalangitan. (Kapahayagan 12:5) Pakatapos kaiyan, padakol nang padakol na nasyon an napalabot sa enot na guerra mundial, asin an linahidan na mga Kristiano nag-agi nin makuring kasakitan asin paglamag. Sa katapustapusi, kan taon 1919, an espirituwal na nasyon, an “aking lalaki,” namundag sa daga. Kaya an Sion “nangaki sa saiyang mga aking lalaki”​—an linahidan na mga miembro kan bagong “matanos na nasyon”—​asin an mga ini inorganisar para sa danay na nag-ooswag na pagpatotoo.​—Mateo 24:​3, 7, 8, 14; 1 Pedro 2:9.

4. Taano an matanos na nasyon nin Dios ta kaipuhan na makilaban tanganing mapagdanay an integridad?

⁴ Poon sa kapinonan kaiyan, an nasyon na ini napaatubang sa makuring mga pagbalo sa integridad kaiyan. Taano? Kan mamundag an langitnon na Kahadean, si Satanas asin an saiyang mga demonyo pinalayas sa langit pasiring digdi sa daga. An sarong makosog na tingog nagbalangibog: “Nangyari na an kaligtasan asin an kapangyarihan asin an kahadean kan satong Dios asin an autoridad kan saiyang Cristo, huli ta ihinolog na an parasumbong sa satong mga tugang, na nagsusumbong sa sainda aldaw asin banggi sa atubang nin satong Dios! Asin sinda nakadaog sa saiya huli sa dugo kan Kordero asin huli sa tataramon kan saindang pagpatotoo, asin dai ninda namotan an saindang kalag minsan sa atubang nin kagadanan.” Huminiro si Satanas na may dakulang kaanggotan sa pagkaliwat na ini nin mga kamugtakan ‘asin nagluwas sa pakilaban sa mga natatada kan banhi [kan babae], na nagkukuyog sa mga pagboot nin Dios asin igwa kan gibohon nin pagpatotoo ki Jesus.’ Napapaatubang sa mga pagsalakay ni Satanas, an linahidan na mga Kristiano marigon na nanindogan. Sagkod ngonyan, an maigot na mga miembro kan matanos na nasyon nin Dios naggigibo nin pagtubod sa nakababalukat na dugo ni Jesus asin padagos na nagtatao ki Jehova nin ikasisimbag sa dakulang paraduhagi paagi sa pagdadanay sa integridad “minsan sa atubang nin kagadanan.”​—Kapahayagan 12:​1, 5, 9-12, 17; Talinhaga 27:11.

5. Anong marahay na kaisipan kan mga Saksi sa modernong aldaw an nakatabang sa sainda na magdanay sa integridad?

⁵ Kan 1919, kan magpoon an modernong aldaw na pagpatotoo sa Kahadean nin Dios, an mga Estudyante sa Biblia, an apod kaidto sa mga Saksi ni Jehova, pipira sana an bilang pero marigon sa pagtubod. Sinda nagin pundasyon na mga miembro nin ‘posog na siudad, na kaligtasan an ibinugtak na pinakang mga lanob asin kuta.’ An saindang pagsarig nasa ki “Jah Jehova [na iyo] an Gapo sa mga panahon na daing katapusan.” (Isaias 26:​1, 3, 4) Arog ki Moises kan suanoy, sinda nagbalangibog: “Ipahahayag ko an ngaran ni Jehova. Padakulaon nanggad nindo an satuyang Dios! An Gapo, sangkap an saiyang gibo, huli ta an gabos niang dalan hustisya. Dios nin kaimbodan, na dian sa saiya mayo nin inhustisya; banal asin matanos sia.”​—Deuteronomio 32:​3, 4.

6. Sa anong paagi binendisyonan ni Jehova an saiyang banwaan sa huring mga aldaw na ini?

⁶ Poon kaidto, an mga tata kan areglo sa Kahadean nin Dios nagdanay na bukas na marhay mantang enot na tinipon an mga natatada kan 144,000 na linahidan na Kristiano asin ngonyan sarong dakulang kadaklan nin “ibang karnero” an minaiba sa pagpahayag kan mga katuyohan kan Kahadean ni Jehova. (Juan 10:16) Kaya, magayagayang ikakapaisi: “Dinagdagan mo an nasyon; O Jehova, dinagdagan mo an nasyon; pinamuraway mo an saimong sadiri. Pinahiwas mo an gabos na pagdolonan kan daga.” (Isaias 26:15) Mantang sinusurbey niato an oma nin kinaban ngonyan, naheheling niato kun gurano katotoo an mga tataramon na iyan! Paagi sa kapangyarihan kan banal na espiritu, ikinatao na an patotoo sa maabot na Kahadean ni Cristo “sagkod sa kaporoporohi nin daga.” (Gibo 1:8) An hiwas kan pag-oswag na iyan puwedeng masokol sa Report kan 1994 Taon nin Paglilingkod kan mga Saksi ni Jehova sa Bilog na Kinaban, na maheheling sa pahina 12 sagkod 15.

Sarong Bagong Peak nin mga Parahayag

7, 8. (a) Ano an ebidensia na an banwaan nin Dios ‘pinalaba an mga lubid kan saindang tolda’? (b) Kun hehelingon an Report kan 1994 Taon nin Paglilingkod, anong mga lugar an naheheling nindo na pambihirang ‘nagpapahiwas kan saindang mga pagdolonan’?

⁷ Horophoropa an nagkapirang tampok sa report na ini. An peak nin mga parahayag kan Kahadean sa langtad uminabot sa 4,914,094! Kanigoan kanakaoogmang masdan an danay na pagtipon sa “dakulang kadaklan . . . hale sa gabos na nasyon asin tribo asin banwaan patin tataramon, na nagtitindog sa atubangan kan trono asin sa atubangan kan Kordero, na nagugubingan nin maputing mga gubing”! Iyo, an mga ini man napatunayan na mga nagdadanay sa integridad. “Hinugasan ninda an saindang mga gubing asin pinaputi iyan sa dugo kan Kordero,” na ibinibilang na matanos huli sa paggibo nin pagtubod sa pantubos na atang ni Jesus.​—Kapahayagan 7:​9, 14.

⁸ Partikularmente poon kan 1919, an pangapodan ipinaabot sa organisasyon ni Jehova: “Pahiwasa an lugar kan saimong tolda. Asin paignitan sa sainda an mga tahob kan saimong dakulang tabernakulo. Dai ka magduwaduwa. Palabaa an mga lubid kan saimong tolda, asin pasariga an mga taldok kan saimong tolda.” (Isaias 54:2) Bilang simbag, an paghuhulit nagpapadagos na daing ontok, minsan sa maniyebeng Yukon, sa linderos nin Alaska, kun saen an mabaskog na grupo nin mga payunir nagtatagal nin temperaturang -45° sagkod sa -50° Sentigrado sa laog nin dakol na semana sa sarong panahon. Sa nakaagi pa sanang mga taon orog na nagririkas an pagburunyog nin mga kadaklan pasiring sa nagdadanay sa integridad na nasyon ni Jehova. Mas bukas an mga tata na akoon an mga ini hale sa mga kadagaan nin Asia sa luwas nin Kakristianohan, hale sa mga nasyon na dating Komunista, hale sa dakol na kadagaan sa Aprika, asin hale sa mga sakop nin Katoliko, arog baga nin Italya, Espanã, Portugal, asin Timog Amerika. An mga tawong nagharale sa sadiring nasyon nagbukas nin saro pang langtad. Halimbawa, sa Inglaterra inaasikaso kan mga Saksi an mga pangangaipo nin 13 grupong etniko na laen an tataramon.

“Padagos Nindong Gibohon Ini”

9. (a) Ano an ipinaririsa kan bilang nin nag-atender sa Memorial kan 1994? (b) Arin an nagkapirang nasyon na igwa nin pambihira kalangkaw na mga bilang nin nag-atender sa Memorial?

⁹ Saro pang tampok sa taonan na report an bilang nin nag-atender sa Memorial. Dai nahaloy bago sia nagadan, pinonan ni Jesus an Memorial sa paggirumdom sa saiyang kagadanan asin sinabihan an saiyang mga parasunod: “Padagos nindong gibohon ini sa paggirumdom sa sako.” (1 Corinto 11:24) Nakaoogmang maheling kan 1994 an 12,288,917​—labing doble sa bilang kan aktibong mga parahayag—​na nagtiripon tanganing kuyogon an pagboot na iyan, magsalang bilang mga nakikabtang o bilang mga paramasid. Sa ibang kadagaan mas halangkaw pa ngani an katimbang kan mga nag-atender sa Memorial sa mga parahayag. An 4,049 parahayag sa Estonia, Latvia, asin Lithuania naogmang magkaigwa nin 12,876 na nag-atender sa Memorial, labing tolong doble sa bilang nin mga parahayag. Asin sa Benin, an 16,786 na nag-atender sa Memorial nagrepresentar sa haros limang doble kan bilang nin mga parahayag. An sarong kongregasyon na igwang mga 45 parahayag nagkaigwa nin nag-atender na 831!

10. (a) Anong paninimbagan an itinatao sato kan halangkaw na bilang nin nag-atender sa Memorial? (b) Isabi an puwedeng mangyari kun an saro na nag-atender sa Memorial nag-aako nin dugang pang tabang.

¹⁰ Maogma an mga Saksi ni Jehova na kadakol na interesadong tawo an uminiba sa sainda sa marahay na okasyon na iyan. Ngonyan boot nindang tabangan an mga ini na orog pang umoswag sa saindang pakasabot asin pagkamoot sa katotoohan. An iba tibaad maghimate sa paaging arog kan ginibo ni Alla na taga-Rusya. Si Alla nakikipag-adal sa sarong espesyal payunir na tugang na babae pero kakadikit an pag-oswag, kaya pinondo an pag-adal. Minsan siring, inako ni Alla an imbitasyon na umatender sa Memorial. An pagtiripon na idto, na igwa nin dakulaon na kahulogan, nakatudok na marhay sa boot nia. Pagpuli sa harong, iinapon nia an gabos niang imahen asin namibi ki Jehova para sa tabang. Pakalihis nin duwang aldaw sinongko si Alla kan tugang na payunir tanganing aramon kun ano an nagustohan nia sa Memorial. Suminunod an mabungang orolay. Naponan giraray an pag-adal ni Alla. Dai nahaloy nakikikabtang na sia sa pagpatotoo. An eksperyensiang ini nagpapaheling kan halaga nin pagsongko sa mga nag-aatender sa Memorial. Dakol an posibleng mahimate arog kan ginibo ni Alla.

“Dai Pagpabayaan an Satong Pagtorotiripon”

11-13. (a) Ano an kabtang sa maimbod na paggawe kan matanos na nasyon? (b) Taano an tunay na mga Kristiano ta kaipuhan na umatender sa mga pagtiripon?

¹¹ An Memorial iyo an pinakaimportanteng pagtiripon sa kalendaryo kan mga Saksi ni Jehova, pero bako sana nanggad iyan. Serosemana an mga Saksi ni Jehova nagtitiripon bilang pagkuyog sa mga tataramon ni apostol Pablo: “Magpasaradolsadol kita na magdagka sa pagkamoot asin sa marahay na mga gibo, na dai pagpabayaan an satong pagtorotiripon, siring kan kaugalean nin nagkapira, kundi na magpakinosogan kita, asin lalo na ta naheheling nindo na an aldaw harani na.” (Hebreo 10:​24, 25) Asosyado sinda sa matanos na nasyon ni Jehova na midbid sa maimbod na gawe kaiyan. Kaiba sa maimbod na gawe an may kaimbodan na pag-atender sa mga pagtiripon.

¹² Malinaw na nasasabotan na gayo ini sa Pilipinas, na sa bilog na nasyon an promedyong bilang nin nag-aatender sa mga pagtiripon kun Domingo 125 porsiento kan bilang nin mga parahayag. Nasasabotan man na gayo iyan sa grupo nin mga Saksi asin interesadong mga tawo sa Argentina. An saindang iniistaran mga 20 kilometros hale sa Kingdom Hall. Minsan siring, ibinareta kan paraataman sa sirkito na apuwera kun may naghehelang, ni saro sa sainda dai nagpapalta sa mga pagtiripon. Nagbibiyahe sinda sa laog nin apat na oras lunad sa karitela o sakay sa kabayo, asin durante nin tiglipot nagbibiyahe sinda papuli sa kadikloman nin banggi.

¹³ Mientras na orog na naghaharani an katapusan kan palakaw na ini, mas nagdedepisil an buhay, nagdadakol an problema, asin an regular na pag-atender sa mga pagtiripon tibaad labi pa sa angat. Pero sa siring na mga kamugtakan, mas nangangaipo kita nin espirituwal na pagkakan asin maogmang pag-iribaiba kisa kasuarin pa man na manonompongan sana sa siring na mga pagtiripon.

“Gibohon Iyan na May Pagkasibot”

14. Taano an mga Saksi ni Jehova ta nakakamate nin pagkasibot manongod sa saindang ministeryo, asin anong mga resulta an nagpapaheling kaini?

¹⁴ Kan nakaaging taon, sinambit kan Iglesya Katolika sa Italya an gibohon kan mga Saksi ni Jehova bilang “madahas na proselitismo.” Alagad, an totoo mayo nin kadahasan manongod sa ginigibo kan mga Saksi. Imbes, an saindang ministeryo kapahayagan nin hararom na pagkamoot sa saindang kataraed. Ebidensia man iyan nin pagkuyog sa mga tataramon ni Pablo: “Ihulit mo an tataramon, gibohon iyan na may pagkasibot sa marahay na panahon, sa masakit na panahon.” (2 Timoteo 4:2) An pakamate nin pagkasibot nagpapahiro sa mga Saksi ni Jehova na magmaigot sa saindang ministeryo, siring kan maheheling sa paggamit ninda nin total na 1,096,065,354 oras kan 1994 sa paghuhulit sa saindang kataraed, mga pagdalaw liwat, asin pagkondukta nin 4,701,357 pag-adal sa Biblia. Dakol an nakapakikabtang sa paglilingkod bilang payunir, na nagpapaheling na buhay asin aktibo an espiritu nin pagpapayunir. An promedyong 636,202 na payunir sa bilog na kinaban nagpapatunay kaini.

15, 16. (a) Paano an mga hoben asin gurang pareho nagpaheling nin espiritu nin pagpapayunir? (b) Kun hehelingon an indibiduwal na mga nasyon sa Report kan 1994 Taon nin Paglilingkod, saen kamo nakakaheling nin pambihirang bilang nin mga payunir?

¹⁵ Kaiba sa mga payunir na iyan an dakol na hobenes. An iba sa Estados Unidos naglilingkod ngonyan bilang mga regular payunir durante nin haiskul, na an mga kaklase an saindang pangenot na teritoryo. Nanompongan kan mga hobenes na ini na an pagpapayunir iyo an pinakamarahay na paagi nin pagprotehir sa saindang sadiri sa mga droga, inmoralidad, asin kadahasan na lakop sa dakol na eskuwelahan sa nasyon na iyan. An dakol na iba pang hobenes ginibong pasohan ninda an pagpapayunir pakatapos kan saindang pag-eskuwela. Si Irina, na taga-Ukraine, nag-auxiliary payunir durante kan bilog na taon nia sa haiskul tanganing andamon an saiyang sadiri para sa pagpapayunir pakagraduwar. Pakatapos kan saiyang pag-eskuwela, an saiyang pamilya nag-alok na makikooperar kun manongod sa sekular na trabaho tanganing ikarepresentar nia sinda sa regular na pagpapayunir. Kun manongod sa pagbuhay, bakong pasil an mga bagay sa Ukraine. Pero si Irina nagsabi: “Aram ko na ginigibo ko an sarong gibohon na nangangahulogan nin buhay bako sanang para sa sako kundi para man sa mga hinuhulitan ko.” Nakaoogma nanggad na maheling an kadakol na hobenes ngonyan na arog ki Irina an iniisip. Igwa daw nin maorog pang paagi kisa ‘girumdomon ninda an saindang Dakulang Kaglalang sa mga aldaw kan saindang pagigin soltero asin daraga’?​—Eclesiastes 12:1.

¹⁶ An sarong dakulang bilang nin mga payunir gururang na. An saro nagbareta na durante kan ikaduwang guerra mundial, nagadan an saiyang ama asin tugang na lalaki mientras na nakikiguerra an mga ini, asin an saiyang ina asin tugang na babae binadil sa sarong ghetto. Kan huri nagadan an saiyang aking lalaki. Ngonyan, sa saiyang paggurang asin maluyang salud, tinawan sia ni Jehova, sa Kristianong kongregasyon, nin sarong mas dakulang pamilya kisa sa nawara nia. Asin nanonompongan nia an saiyang kagayagayahan sa pagtabang sa iba bilang regular payunir.

17, 18. Paano an lambang saro sa sato, baga man payunir o bako, makakapaheling kan espiritu nin pagpapayunir?

¹⁷ Siyempre, bakong gabos puwedeng magpayunir. Si Jehova naoogmang akoon an satong bilog na tinagba, an pinakamarahay niatong ikadodolot, ano man ini sa satong partikular na kamugtakan. (Malaquias 3:​10) Iyo nanggad, kita gabos makakapatalubo kan espiritu kan maigot na mga payunir na ini asin magigibo an ano man na itinotogot kan satong mga kamugtakan tanganing pahiwason an paghuhulit kan maogmang bareta.

¹⁸ Halimbawa, sa Australia, an Abril 16 itinalaan bilang espesyal na aldaw para sa pagpapatotoo sa tinampo. Sinuportaran na marhay iyan kan mga parahayag asin siring man mga payunir, siring kan maheheling sa bagong peak nin mga parahayag na 58,780 para sa bulan na idto. Dugang pa, 90,000 pang magasin an ikinawaras kisa kan iyo man sanang bulan kan nakaaging taon. Durante kan espesyal na aldaw, sarong tugang na babae an nakapasakamot nin mga magasin sa sarong lalaki, asin mantang isinusurat an ngaran asin adres kaini tanganing kultibaron an interes, naaraman nia na sinda magparyentes! Magpinsan palan sinda na dai pa nagkahelingan sa laog nin 30 taon. Iyan siertong nagbunga nin nagkapirang maogmang marhay na pagdalaw liwat!

Magdanay sa Integridad Sagkod sa Katapusan

19. Taano ta apurado na an matanos na nasyon ni Jehova magdanay sa integridad sagkod sa katapusan?

¹⁹ Apurado na an gabos sa matanos na nasyon nin Dios magdanay sa integridad mantang an kinaban ni Satanas pasiring na sa katapusan kaiyan. Dai mahaloy, madadangog kan banal na nasyon ni Jehova an pag-apod na: “Lakaw, banwaan ko, lumaog ka sa panlaog mong mga kuwarto, asin pintoan mo an mga tata sa likod mo. Magtago ka nin kadikit sanang panahon sagkod na makalihis an kabangisan.” An may kasalan sa dugong kinaban na ini dai makakalikay sa pag-atubang sa paghokom nin Dios. “Huli ta, uya! si Jehova minadatong hale sa saiyang lugar tanganing pabayadan an kasalan kan nag-eerok sa daga tumang sa saiya, asin an daga siertong mabuyagyag kan saiyang pagpabolos nin dugo asin dai na matahob sa saiyang mga gadan.” (Isaias 26:​20, 21) An lambang saro logod sa sato manindogan nin marigon bilang nagdadanay sa integridad na Kristiano na asosyado sa matanos na nasyon ni Jehova. Dangan maggagayagaya kita sa pagkamit nin buhay na daing katapusan sa daganon o langitnon na rona kan Kahadean ni Cristo.

Nagigirumdoman daw Nindo?

◻ Kasuarin namundag an “matanos na nasyon”?

◻ Taano an banwaan nin Dios ta nangaipo nin pakatagal durante kaining huring mga aldaw?

◻ Ano an ipinaheheling kan halangkaw na bilang nin mga parahayag asin kan oras na ginamit sa ministeryo na maheheling sa Report kan 1994 Taon nin Paglilingkod?

◻ Taano an pag-atender sa mga pagtiripon ta mahalagang marhay mantang an kinaban na ini nagdadangadang na sa katapusan kaiyan?

◻ Taano an gabos na asosyado sa matanos na nasyon nin Dios ta kaipuhan na magdanay sa integridad?

[Tsart sa pahina 12-15]

REPORT KAN 1994 NA TAON NIN PAGLILINGKOD KAN MGA SAKSI NI JEHOVAH SA BILOG NA KINABAN

(Hilingon an bound volume)

[Retrato sa pahina 18]

An mga nagdadanay sa integridad sa matanos na nasyon ni Jehova magkakamit kan buhay na daing katapusan na may pagkasangkap