An Pinakadakulang Tawo na Nabuhay Kasuarin Pa Man

Kapitulo 89: Sarong Misyon nin Pagkaherak sa Judea

Nagkapirang semana an nakaagi, durante kan Kapiyestahan nin Pagdusay sa Jerusalem, hiningoa kan mga Judio na gadanon si Jesus. Kaya nagbiyahe sia paamihanan, na minalataw na sa sarong lugar na bakong harayo sa Dagat nin Galilea.

Dai pa sana nahaloy, nagpatimog giraray sia pasiring sa Jerusalem, na naghuhulit mantang nasa tinampo sa mga baryo nin Perea, sarong distrito sa sirangan kan Salog nin Jordan. Pakasaysay kan ilustrasyon manongod sa tawong mayaman asin ki Lazaro, padagos niang tinokdoan an saiyang mga disipulo kan mga bagay na enot na niang itinokdo mientras na nasa Galilea.

Halimbawa, sinabi nia na mas marahay pa para sa sarong tawo “na bitayan sa saiyang liog nin sarong gapong gilingan asin itapok sia sa dagat” kisa makapasingkog sia sa saro kan “mga sadangoton” nin Dios. Idinoon man nia an pangangaipo nin kapatawadan, na ipinaliliwanag: “Minsan pa kun [an sarong tugang] magkasala nin makapito sa sarong aldaw tumang sa saimo asin sia magbalik sa saimo nin makapito, na nagsasabi, ‘Nagsosolsol ako,’ kaipuhan na patawadon mo sia.”

Kan makiolay an mga disipulo na, “Tawan mo kami nin orog pang pagtubod,” si Jesus nagsimbag: “Kun igwa kamo nin pagtubod na siring kadakula kan pisog nin mustasa, sasabihon nindo sa itom na poon nin sikomorong ini, ‘Magabot ka asin makatanom sa dagat!’ asin kukuyogon kamo kaiyan.” Kaya maski an kadikit na pagtubod makakagibo nin darakulang bagay.

Sunod, isinaysay ni Jesus an sarong tunay na buhay na situwasyon na nag-iilustrar kan tamang kaisipan nin sarong lingkod kan makakamhan sa gabos na Dios. “Siisay saindo an igwa nin oripon na nag-aarado o nag-aataman nin aripompon,” an komento ni Jesus, “na masabi sa saiya pag-abot nia hale sa oma, ‘Madia tolos asin sumandig ka sa lamesa’? Imbes kaiyan, bako daw na sia masabi sa saiya, ‘Maggarogaro ka na para sa sakong pamanggihan, asin magtapi ka na patin paglingkodan mo ako sagkod na ako makakakan asin makainom, dangan puwede ka nang magkakan asin uminom’? Dai sia magtatanaw nin utang na boot sa oripon huli ta ginibo nia an mga bagay na ipinagboot, bako daw? Kaya kamo man, kun nahaman na nindo an gabos na bagay na ipinagigibo sa saindo, magsabi kamo, ‘Kami mga oripon na daing kamanungdanan. An ginibo niamo iyo an maninigo niamong gibohon.’” Kaya, an mga lingkod nin Dios dai noarin man maninigong makamate na naggigibo sinda nin pabor sa Dios paagi sa paglilingkod sa saiya. Imbes, maninigo nindang perming girumdomon an yaon sa saindang pribilehiyo na pagsamba sa saiya bilang pinagtitiwalaan na mga miembro kan saiyang harong.

Malinaw na dai nahaloy pakatao ni Jesus kan ilustrasyon na ini na uminabot an sarong mensahero. Isinugo sia ni Maria asin Marta, an mga tugang na babae ni Lazaro, na nag-iistar sa Betania nin Judea. “Kagurangnan, uya! an padangat mo naghehelang,” an pagsaysay kan mensahero.

Si Jesus nagsimbag: “An helang na ini bakong pasiring sa kagadanan, kundi iyan para sa kamurawayan nin Dios, tanganing an Aki nin Dios pamurawayon paagi kaiyan.” Pakapagdanay nin duwang aldaw sa iniistaran nia, si Jesus nagsabi sa saiyang mga disipulo: “Magduman giraray kita sa Judea.” Alagad, pinagirumdom ninda sia: “Rabi, dai pa sana nahaloy na an mga taga-Judea naghingoang gapoon ka, asin maduman ka giraray?”

“Igwang kagduwang oras na liwanag nin aldaw, bako daw?” an hapot ni Jesus bilang simbag. “Kun an siisay man naglalakaw sa liwanag nin aldaw dai sia nababangga sa ano man, huli ta naheheling nia an ilaw kan kinaban na ini. Alagad kun an siisay man naglalakaw sa banggi, may nababangga sia, huli ta mayo sa saiya an ilaw.”

An malinaw na boot sabihon ni Jesus iyo na an mga ‘oras nin liwanag nin aldaw,’ o an panahon na itinalaan nin Dios para sa ministeryo ni Jesus sa daga, dai pa tapos asin sagkod na iyan dai pa natatapos, mayo nin makadadanyar sa saiya. Kaipuhan niang lubos na gamiton an halipot na panahon nin “liwanag nin aldaw” na natatada sa saiya, huling pakatapos kaiyan madatong an “banggi” na ginadan na sia kan saiyang mga kaiwal.

Idinugang ni Jesus: “Si Lazaro na katood niato nagpahingalo, asin ako maduman tanganing pukawon sia sa pagtorog.”

Posibleng naghohona na si Lazaro nagpapahingalo sa pagtorog asin na ini positibong tanda na sia mauulian, an mga disipulo nagsimbag: “Kagurangnan, kun sia nagpahingalo, sia maoomayan.”

Dangan si Jesus prangkang nagsabi sa sainda: “Si Lazaro nagadan, asin naggagayagaya ako huli sa saindo na mayo ako duman, tanganing kamo magtubod. Alagad paduman kita sa saiya.”

Narerealisar na si Jesus puwedeng gadanon sa Judea, pero nagmamawot na suportaran sia, dinagka ni Tomas an saiyang mga kapwa disipulo: “Magduman man kita, tanganing magadan kitang kaiba nia.” Kaya baga man namemeligro an saindang buhay, inibanan si Jesus kan mga disipulo sa misyon na ini nin pagkaherak pasiring sa Judea. Lucas 13:22; 17:​1-10; Juan 10:​22, 31, 40-42; 11:​1-16.

▪ Saen naghulit si Jesus dai pa sana nahaloy?

▪ Anong katokdoan an inotro ni Jesus, asin anong tunay na buhay na situwasyon an ilinadawan nia tanganing iilustrar an anong punto?

▪ Anong bareta an naresibi ni Jesus, asin ano an boot niang sabihon kan “liwanag nin aldaw” asin kan “banggi”?

▪ Ano an boot sabihon ni Tomas kan sabihon niang, ‘Magduman kita tanganing magadan kitang kaiba nia’?