An Pinakadakulang Tawo na Nabuhay Kasuarin Pa Man

Kapitulo 90: An Paglaom sa Pagkabuhay Liwat

Sa katapustapusi uminabot si Jesus sa harani sa Betania, sarong baryo na mga tolong kilometro hale sa Jerusalem. Nagkapirang aldaw pa sana poon kan magadan asin ilobong si Lazaro. An mga tugang kaining si Maria asin Marta nagmomondo pa, asin dakol an nagduman sa harong ninda tanganing rangahon sinda.

Mantang nagmomondo sinda, may sarong nagbareta ki Marta na si Jesus maabot na. Kaya huminale sia asin naghihidale sa pagsabat sa saiya, na malinaw na dai nagpaaram sa saiyang tugang. Pagrani ki Jesus, inotro ni Marta an paorootrong sinasabi nindang magtugang durante kan nakaaging apat na aldaw: “Kun uya ka digdi dai kutana nagadan an sakong tugang.”

Minsan siring, si Marta nagpahayag nin paglaom, na ipinaririsa na tibaad may magibo pa si Jesus para sa saiyang tugang. “Naaaraman ko na an gabos na hagadon mo sa Dios, itatao sa saimo nin Dios,” an sabi nia.

“An saimong tugang mabubuhay liwat,” an ipinanuga ni Jesus.

An pakasabot ni Marta nagtataram si Jesus dapit sa sarong daganon na pagkabuhay liwat sa ngapit, na iyo man an linaoman ni Abraham asin iba pang lingkod nin Dios. Kaya sia nagsimbag: “Aram ko na sia mabubuhay sa pagbuhay liwat sa huring aldaw.”

Alagad, si Jesus nagtao nin paglaom para sa tolos-tolos na karangahan, na an simbag: “Ako iyo an pagkabuhay liwat asin an buhay.” Pinagirumdom nia si Marta na tinawan sia nin Dios nin kapangyarihan sa kagadanan, na sinasabi: “An naggigibo nin pagtubod sa sako, minsan pa sia magadan, mabubuhay; asin an gabos na nabubuhay asin naggigibo nin pagtubod sa sako dai na noarin man magagadan.”

Dai isinusuherir ni Jesus ki Marta na an mga maimbod na nabubuhay kan panahon na idto dai na noarin man magagadan. Dai, kundi an punto nia iyo na an paggibo nin pagtubod sa saiya puwedeng gumiya pasiring sa buhay na daing katapusan. An siring na buhay kakamtan nin kadaklan na tawo bilang resulta kan pagbuhay liwat sa sainda sa huring aldaw. Pero an iba na maimbod makakaligtas sa katapusan kan palakaw na ini nin mga bagay sa daga, asin para sa mga ini an mga tataramon ni Jesus magigin totoo sa literal na gayong paagi. Dai na sinda noarin man magagadan! Pakatapos kan kahangahangang pananaram na ini, hinapot ni Jesus si Marta, “Minatubod ka kaini?”

“Iyo, Kagurangnan,” an simbag nia. “Nagtubod ako na ika an Cristo na Aki nin Dios, an Saro na madatong sa kinaban.”

Dangan naghihidaleng puminuli si Marta tanganing apodon an saiyang tugang, na sinasabihan sia sa hilom: “Uya digdi an Paratokdo asin inaapod ka.” Tolos-tolos na huminale sa harong si Maria. Kan maheling kan iba na pahale sia, nagsurunod sinda, na an paghona ninda paduman sia sa lolobngan nin girumdoman.

Pagrani ki Jesus, si Maria naglaob sa saiyang pamitisan na nananangis: “Kagurangnan, kun uya ka digdi, dai kutana nagadan an sakong tugang,” an sabi nia. Si Jesus odok na napahiro kan maheling niang nagtatangis si Maria asin an mga kadaklan nin tawo na nagsusurunod sa saiya. “Saen sia nindo ibinugtak?” an hapot nia.

“Kagurangnan, madia asin helinga,” an simbag ninda.

Si Jesus naghibi man, na dahelan na nakapagsabi an mga Judio: “Helinga, kun gurano an pagpadangat nia saiya!”

Nagirumdoman kan iba na si Jesus, kan panahon kan Kapiyestahan nin mga Tabernakulo nagkapirang bulan bago kaini, nagpaomay sa sarong soltero na namundag na buta, asin sinda naghapot: “Dai daw magigibo kan tawong ini na nagpabuklat sa mga mata kan tawong buta na pogolan na magadan an sarong ini?” Juan 5:21; 6:40; 9:​1-7; 11:​17-37.

▪ Kasuarin si Jesus sa katapustapusi uminabot sa Betania, asin ano an situwasyon duman?

▪ Anong basihan igwa si Marta para sa pagtubod sa sarong pagkabuhay liwat?

▪ Paano naapektaran si Jesus kan kagadanan ni Lazaro?