An Pinakadakulang Tawo na Nabuhay Kasuarin Pa Man

Kapitulo 91: Kan Buhayon Liwat si Lazaro

Si Jesus, pati an kairiba nia, nagdatong ngonyan sa lolobngan nin girumdoman ni Lazaro. Sa aktuwal, iyan sarong lungib na binugtakan nin gapo sa tata. “Halea nindo an gapo,” an sabi ni Jesus.

Si Marta nagsayuma, na dai pa nasasabotan kun ano an intension na gibohon ni Jesus. “Kagurangnan,” an sabi nia, “sa panahon na ini mabata na sia, ta apat na aldaw na.”

Alagad naghapot si Jesus: “Bakong sinabi ko sa saimo na kun tumubod ka maheheling mo an kamurawayan nin Dios?”

Kaya hinale an gapo. Dangan itiningkalag ni Jesus an saiyang mga mata asin namibi: “Ama, nagpapasalamat ako saimo na dinangog mo ako. Totoo, aram ko na permi mo akong dinadangog; alagad dahel sa kadaklan na nagtitirindog sa palibot ako nagtaram, tanganing sinda magturubod na sinugo mo ako.” Namibi si Jesus sa publiko tanganing maaraman kan mga tawo na an gigibohon nia maootob paagi sa kapangyarihan na inako gikan sa Dios. Dangan sia nagkurahaw sa makosog na tingog: “Lazaro, lumuwas ka!”

Sa oras na iyan, luminuwas si Lazaro. An saiyang mga kamot asin bitis nagagapos pa nin mga henerong sa gadan, asin an saiyang lalauogon napapatos nin podong. “Hubadi sia nindo asin palakawa,” an sabi ni Jesus.

Pakaheling sa milagro, an dakol na Judiong nagdaratong tanganing rangahon si Maria asin Marta nagturubod ki Jesus. Alagad, an iba naghale tanganing iosip sa mga Fariseo an nangyari. Sinda asin an poon na mga saserdote tolos-tolos na nag-areglo nin miting kan halangkaw na korte nin Judio, an Sanhedrin.

Kaiba sa Sanhedrin an presenteng halangkaw na saserdote, si Caifas, siring man an mga Fariseo asin Saduceo, poon na mga saserdote, pati an mga dating halangkaw na saserdote. An mga ini nanambitan: “Ano an satong gigibohon, huli ta an tawong ini naggigibo nin dakol na tanda? Kun pabayaan ta sana sia nin siring, sinda gabos maturubod sa saiya, asin madatong an mga taga-Roma asin kukuanon an satong lugar asin an satong nasyon.”

Minsan ngani inaako kan relihiyosong mga namomoon na si Jesus “naggigibo nin dakol na tanda,” an solamenteng bagay na pinaghahaditan ninda iyo an saindang sadiring posisyon asin autoridad. An pagbuhay liwat ki Lazaro sarong nangongorog kapuwersang hampak sa mga Saduceo, huling dai sinda nagtutubod sa pagkabuhay liwat.

Si Caifas, na posibleng sarong Saduceo, nagtaram ngonyan, na an sabi: “Mayo kamong ano man na naaaraman, asin dai kamo nangangatanosan na sa saindong kapakinabangan na an sarong tawo magadan sa kapakanan kan mga tawo asin na an bilog na nasyon dai malaglag.”

Inimpluwensiahan nin Dios si Caifas na sabihon ini, huli ta kan huri si apostol Juan nagsurat: “Alagad, [si Caifas] dai nagsabi kaini sa sadiri niang boot.” Aktuwalmente an boot sabihon ni Caifas iyo na si Jesus maninigong gadanon tanganing mapogolan Sia sa dugang pang pagraot sa saindang mga posisyon nin autoridad asin impluwensia. Minsan siring, sono ki Juan, ‘ihinula ni Caifas na si Jesus nakatalagang magadan bako sanang para sa nasyon, kundi tanganing matipon an mga aki nin Dios.’ Asin, tunay nanggad, na katuyohan nin Dios na an saiyang Aki magadan bilang pantubos para sa gabos.

Nagin mapanggana ngonyan si Caifas sa pag-impluwensia sa Sanhedrin na magplanong gadanon si Jesus. Pero si Jesus, na posibleng naaaraman an mga planong ini paagi ki Nicodemo, sarong miembro kan Sanhedrin na makikatood sa saiya, naghale duman. Juan 11:​38-54.

▪ Taano si Jesus ta namibi sa publiko bago buhayon liwat si Lazaro?

▪ Ano an reaksion kan mga nakaheling sa pagbuhay liwat na ini?

▪ Ano an naghayag sa karatan kan mga miembro kan Sanhedrin?

▪ Ano an intension ni Caifas, alagad ginamit sia nin Dios na maghula nin ano?