Gurano Kahalaga sa Saindo an Buhay?

SARONG tin-edyer na lalaki an nagadan kan tumagbang hale sa ikawalong iskalon nin sarong edipisyo nin mga apartment. Nabasa nia an sarong libro na ilinaladawan an paghugot paagi sa pagtagbang na “mayo nin kolog o paghadit o takot; imbes, marahay an pagmate.” An autor kan librong ini, na ipinublikar sa Hapon, nagsabi na iinaalok man sana nia an “paghugot bilang saro sa mga pagpipilian sa buhay.”

Bako sanang mga tawong naghuhugot an nagpapaheling nin pagbasangbasang sa buhay ngonyan. An bakong maingat na mga drayber nagpapaheling man nin kadikiton na paggalang sa buhay. An iba nakainom pa ngani mantang nagmamaneho, na an dakol kaskas an dalagan pasiring sa kagadanan.

Ipinaheheling kan iba kun gurano kakadikit kan pagpahalaga ninda sa saindang buhay paagi sa saindang pagdodoon sa kasingawan. An mga parasigarilyo nagsasayumang umontok sa pagsigarilyo, minsan ngani an pagsigarilyo puwedeng ikagadan asin inaapod na luway-luway na paghugot. Imbes na magpadanay nin kabinian sa rungaw sa seksong kinaban na ini, an dakol nakikidorog minsan kiisay na parateng minagiya sa kagadanan.

Dai ngani naririsa iyan, an iba iniinaan nin dakol na taon an saindang buhay paagi sa pagpangana sa pagkakan, sobrang pag-inom, kakulangan nin ehersisyo, asin paghanap nin kasingawan. An Hapon na autor na si Shinya Nishimaru nagpatanid: “An daing kontrol na ugale sa pagkakan nakararaot sa pisyolohikong mga pagpunsionar, asin an pagparahanap sana sa kagianan asin kasingawan nagpapaluya sa kabagsikan nin mga tawo.” An iba kapareho an punto-de-vista kan sa mga suanoy na nagsarabi: “Kumakan asin uminom kita, ta nuodma magagadan kita.”​—Isaias 22:13; 1 Corinto 15:32.

Iyo, an dai pagpahalaga sa buhay lakop ngonyan. Kun siring, angay nanggad na ihapot, Gurano kahalaga sa saindo an buhay? Maninigo daw na ingatan an buhay minsan sa anong paagi? Asin igwa daw nin ano man na mas mahalaga kisa sa satong presenteng buhay?