Pakamahalon an Tunay na Buhay
IYO sana daw ini an buhay? Paagi sa pagdagka sa sato na ‘mangapot nin marigon sa tunay na buhay,’ ipinaririsa kan Biblia na igwa nin orog pa. (1 Timoteo 6:17-19) Kun an satong presenteng buhay bakong an tunay na buhay, arin?
An konteksto kan teksto sa enotan nagpapaheling na “buhay na daing katapusan” an maninigong pangaptan nin marigon nin tawong matatakton sa Dios. (1 Timoteo 6:12) Para sa dakulang mayoriya, ini nangangahulogan nin buhay na daing katapusan digdi sa daga. Si Adan, an enot na tawo, nagkaigwa nin paglaom na mabuhay sagkod lamang sa sarong paraisong daga. (Genesis 1:26, 27) Magagadan sana sia kun kumakan sia sa “kahoy nin pakamidbid kan marahay asin maraot.” (Genesis 2:17) Pero huling si Adan asin an saiyang agom, si Eva, may kasumbikalan na kuminakan sa kahoy na iyan, ipinahayag nin Dios an sentensiang kagadanan. ‘Sa aldaw na kuminakan sinda kaiyan,’ sinda nagadan sa pagheling nin Dios asin nagpoon sa saindang pagruro pasiring sa pisikal na kagadanan. An saindang buhay mayo na kan kuwalidad na nakamtan ninda kan enot.
An Dalan Pasiring sa “Tunay na Buhay”
Tanganing gibohon na posible an “tunay na buhay,” si Jehova Dios naggibo nin areglo na iligtas an katawohan. Tanganing tabangan kitang masabotan an areglong ini, imahinaron ta an sarong sadit na pabrika. An gabos na makina dian may diperensia asin nagkacausa nin problema sa mga makinista huli ta an enot na trabahador kaidtong mga nakaaging taon inignoro an libro nin makinista asin nadanyaran an gabos na makina. An mga makinista sa presenteng aldaw daing ibang magigibo kundi pagmaigotan an pinakamakakaya ninda na magtrabaho sa mga makinang yaon sa sainda. Gustong hirahayon kan kagsadiri kan pabrika an mga makina tanganing matabangan an saiyang mga trabahador, asin itinatagama nia an mga pondong kaipuhan para sa katuyohan na iyan.
An enot na ‘makinista,’ si Adan, dai minahal an buhay na itinao sa saiya. Kaya, ipinasa nia sa saiyang mga aki an bakong sangkap na buhay, kaagid nin makinang may diperensia. (Roma 5:12) Arog kan mga huring makinista sa pabrika, na dai kayang remedyohan an situwasyon, dai nahimong kamtan kan mga aki ni Adan an tunay na buhay para sa saindang sadiri. (Salmo 49:7) Tanganing itanos an garo baga dai nang paglaom na situwasyon na ini, isinugo ni Jehova digdi sa daga an saiyang bugtong na Aki tanganing tuboson an buhay na daing katapusan para sa katawohan. (Lucas 1:35; 1 Pedro 1:18, 19) Paagi sa sakripisyal na pagkagadan para sa katawohan, an bugtong na Aki nin Dios, si Jesu-Cristo, nagtao kan pondo—an buhay na katimbang kan buhay na nawara ni Adan. (Mateo 20:28; 1 Pedro 2:22) Paagi sa mahalagang atang na ini, may basihan na ngonyan si Jehova sa pagtao kan tunay na buhay.
Para sa makinuyog na katawohan, an pantubos na atang ni Jesus mangangahulogan nin buhay na daing sagkod sa sarong paraisong daga. (Salmo 37:29) An paglaom na ini ipinaaabot sa gabos na makakaligtas sa “ralaban kan dakulang aldaw nin Dios na Makakamhan sa gabos,” na inaapod na Har–Magedon. (Kapahayagan 16:14-16) Paparaon kaiyan an gabos na karatan sa daga. (Salmo 37:9-11) An mga nasa girumdoman nin Dios na nagadan bago kan panahon na iyan bubuhayon liwat sa Paraisong ibinalik liwat digdi sa daga asin magkakaigwa kan paglaom na kamtan an tunay na buhay na natatagama sa gabos na nagkukuyog sa Dios.—Juan 5:28, 29.
An Pangangaipong Padangaton an Satong Presenteng Buhay
Dai ini nangangahulogan na tamang makakapaheling kita nin pagbasangbasang sa kabanalan kan satong presenteng buhay. Magamit daw nin panahon asin kuwarta an kagsadiri kan pabrika sa paghirahay nin sarong makina para sa sarong trabahador na dai nag-iingat kaiyan? Imbes, dai daw ipagkakatiwala kan among an nahirahay nang makina sa saro na naggibo kan saiyang pinakamakakaya na ingatan an daan?
An buhay sarong mahalagang regalo gikan ki Jehova. Bilang matinaong gikanan kan regalong iyan, boot niang padangaton niato iyan. (Salmo 36:9; Santiago 1:17) Sa pagtaram manongod sa pagmakolog ni Jehova sa mga tawo digdi sa daga, si Jesus nagsabi: “An mismong buhok kan saindong payo bilang gabos.” (Lucas 12:7) Pinagbotan ni Jehova an mga Israelita na dai maggadan, na naturalmenteng kabale an dai paggadan sa sadiri. (Exodo 20:13) Tinatabangan kita kaini na likayan na ibilang na pagpipilian an paghugot.
Naaaraman an mamomoton na interes ni Jehova sa satong ikararahay, iinaaplikar kan mga tawong matatakton sa Dios an mga prinsipyo sa Biblia sa mga kaugalean sa presenteng aldaw. Halimbawa, huling hinahagad sa tunay na mga Kristiano na ‘magpakalinig sinda sa lambang ramog nin laman asin espiritu, na sinasangkap an kabanalan sa pagkatakot sa Dios,’ sinasayumahan ninda an tabako asin nakakaadiktong mga droga na nakakaapektar sa pag-isip.—2 Corinto 7:1.
An interes nin Dios sa buhay nin tawo orog pang naheheling sa saiyang hatol na magpadanay nin “trangkilong puso” asin likayan an inmoral na gawe. (Talinhaga 14:30; Galacia 5:19-21) Paagi sa pagsunod sa halangkaw na mga pamantayan na ini, naiingatan kita sa mga bagay na arog nin pagkaanggot na nakararaot sa salud asin mga helang na ikinaoolakit paagi sa seksuwal na pagdodorog.
An pagmakolog ni Jehova sa buhay kan saiyang banwaan naheheling man sa saiyang sadol na lumikay sa pagpangana sa pagkakan asin sobrang pag-inom. (Deuteronomio 21:18-21; Talinhaga 23:20, 21) An mga Kristiano pinatatanidan na an paslong mga tawo asin mga paraburat dai magmamana kan Kahadean nin Dios, an boot sabihon, dai ninda noarin man maeeksperyensiahan an tunay na buhay. (1 Corinto 6:9, 10; 1 Pedro 4:3) Paagi sa pagdagka nin pagigin tama sana, tinotokdoan kita ni Jehova na pakinabangon an satong sadiri.—Isaias 48:17.
Kun sinusunod ta an mga pamantayan nin Dios, ipinaheheling ta na pinahahalagahan niato an satong presenteng buhay. Siyempre, orog pa nganing mahalaga an tunay na buhay. Mantang iyan daing katapusan, tinatawan iyan nin orog na importansia kan tunay na mga Kristiano kisa sa saindang presenteng buhay. Kan iatang ni Jesu-Cristo an saiyang buhay, ipinasakop nia an saiyang sadiri sa kabotan ni Jehova. Orog pang mahalaga para sa saiya an pagkuyog sa saiyang Ama kisa sa saiyang buhay digdi sa daga. An ginibo ni Jesus nagbunga kan pagbuhay liwat sa saiya asin kan pag-ako nia nin inmortal na buhay sa langit. (Roma 6:9) An saiyang kagadanan nangangahulogan man nin buhay na daing katapusan para sa makinuyog na katawohan na nagsasagibo nin pagtubod sa pantubos na atang.—Hebreo 5:8, 9; 12:2.
Mahalagang Pagboot Dapit sa Dugo
Siyempre, ipinababanaag kan mga parasunod ni Jesus an saiyang kaisipan. Minamawot nindang paoyonan an Dios sa gabos na bagay, siring kan ginibo ni Jesus. Enot, ipinaliliwanag kaini kun taano ta sinasayumahan ninda an mga pagpaineksion nin dugo, na inaapod kan ibang doktor na pagliligtas-buhay. Helingon ta kun paano ipinaheheling nin saro na mahal nia an tunay na buhay paagi sa pagsayumang paineksion nin dugo.
Arog ki Jesu-Cristo, an tunay na mga Kristiano nagmamawot na magin buhay sa pagheling nin Dios, asin iyan naghahagad nin kompletong pagkuyog sa Saiya. An Tataramon nin Dios nagboboot sa mga parasunod ni Cristo: “Lumikay sa mga bagay na idinolot sa mga ladawan asin sa dugo asin sa mga bagay na tinook patin sa pakikisaro.” (Gibo 15:28, 29) Taano an pagboot na ini manongod sa dugo ta iiniba sa mga pagboot na nakasasakop sa mga Kristiano?
An Pagboot na itinao sa mga Israelita naghagad nin paglikay sa dugo. (Levitico 17:13, 14) An mga Kristiano bakong sakop kan Mosaikong Pagboot. Pero nasasabotan ninda na an pagboot na dai kumakan nin dugo naenot sa Pagboot; naenot na iyan na itinao ki Noe pakatapos kan Delubyo. (Genesis 9:3, 4; Colosas 2:13, 14) An pagboot na ini aplikado sa gabos na aki ni Noe, na ginikanan kan gabos na nasyon sa daga. (Genesis 10:32) Dugang pa, tinatabangan kita kan Mosaikong Pagboot na masabotan an rason sa pag-insister nin Dios sa kabanalan nin dugo. Pakabawali sa mga Israelita na kumakan nin ano man na klaseng dugo, an Dios nagsabi: “An kalag kan laman yaon sa dugo, asin ako mismo nagbugtak kaiyan sa ibabaw kan altar tanganing magin pantubos para sa saindong kalag, huli ta an dugo iyo an minatubos paagi sa kalag na yaon dian.” (Levitico 17:11) An dugo itinagama nin Dios para gamiton sa pag-atang sa altar. An saiyang pagboot dapit sa kabanalan nin dugo naghahayag kan saiyang autoridad sa gabos na buhay digdi sa daga. (Ezequiel 18:4; Kapahayagan 4:11) Hiniheling an satong buhay gikan sa punto-de-vista ni Jehova, nasasabotan ta na iyan bakong sato kundi ipinaniwala sana iyan sa sato nin Dios.
Kun paanong an makinista sa satong ilustrasyon may paninimbagan sa makina, kita pinaniwalaan kan satong presenteng buhay. Ano an gigibohon nindo kun an saindong makina kaipuhan na hirahayon asin an sarong mekaniko nagsuherir na hirahayon iyan paagi sa paggamit nin mga piyesa na espisipikong ibinabawal sa libro nin makinista? Dai daw kamo makikihumapot sa ibang mekaniko tanganing siertohon kun mahihirahay an makina kaoyon kan mga instruksion sa libro? An buhay nin tawo labi pa kaimportante asin kakomplikado kisa makina. Sa saiyang ipinasabong na Tataramon, an libro sa pagpapadanay na buhay kan mga tawo, ibinabawal kan satong Kaggibo an paggamit nin dugo sa pagsustenir sa buhay. (Deuteronomio 32:46, 47; Filipos 2:16) Bako daw makatanosan na sumunod sa mga kahagadan kan librong iyan?
An totoo, an Kristianong mga pasyente na naghahagad nin mayong dugong pagbolong sa saindang helang dai nagsasayuma sa gabos na medikal na pagbolong. Hinahagad sana ninda an pagbolong na magpapaheling nin paggalang sa saindang buhay—kapwa kan sa presente asin sa ngapit. An mga doktor na mapusong iginagalang an paninindogan kan mga Kristiano nagpapatunay sa mga pakinabang kan pagbolong sa sainda kaoyon sa saindang pakiolay. “An pakabisto sa mga Saksi ni Jehova naggiya sako pasiring sa bagong mga pamantayan,” an sabi nin sarong siruhano na dati perming naggagamit nin dugo. Ngonyan hinihingoa niang bolongon na mayo nin dugo pati an bakong mga Saksi.
Pagmahal sa Tunay na Buhay
Ano an bagong mga pamantayan na nanompongan kan siruhanong ini paagi sa pagbolong sa mga Saksi ni Jehova? Narerealisar nia ngonyan na an pagbolong sa pasyente kabale bako sana an kabtang kan hawak na apektado kan helang kundi an bilog na persona. Dai daw maninigong togotan an pasyente na hagadon an pinakamarahay na pag-asikaso sa saiyang pisikal, espirituwal, asin emosyonal na ikararahay?
Para sa 15-anyos na si Kumiko, an pag-ineksion nin dugo tanganing bolongon an saiyang nakagagadan na leukemia iyo an pinakamaraot na posibleng pagpipilian. Dai mababawi kan paghihingoang palawigon an saiyang buhay sa paaging ini sa laog nin nagkapirang semana, bulan, o dawa taon an magigin halawig na epekto kaiyan sa saiya. Huling idinusay na an saiyang presenteng buhay ki Jehova Dios bilang saro kan saiyang mga Saksi, iginalang nia an kabanalan nin buhay asin dugo. Minsan ngani kontrang marhay sa saiyang paninindogan an saiyang ama asin iba pang paryentes, si Kumiko marigon na nanindogan. Sarong beses hinapot sia kan saiyang doktor: “Kun an saimong Dios nagpapatawad sa mga pagkukulang, dai ka daw nia patatawadon dawa kun nagpaineksion ka nin dugo?” Si Kumiko nagsayumang magkompromiso asin sa siring isikwal an saiyang pagtubod na basado sa Biblia. “Marigon na nangangapot sa tataramon nin buhay,” nagdanay sia sa saiyang paninindogan. (Filipos 2:16) Siring kan sabi kan saiyang mayo sa pagtubod na lola, “Habong bayaan ni Kumiko an saiyang pagtubod.” Dai nahaloy nagbago an kaisipan kan saiyang ama asin kan saiyang lola siring man kan nag-aasikasong mga doktor.
An marigon na pagtubod ni Kumiko ki Jehova Dios, na makakabuhay liwat sa saiya hale sa mga gadan, nakapahiro sa dakol na puso. Mientras na buhay pa, pinakiolayan nia an saiyang ama: “Dawa kun ako magadan, bubuhayon liwat ako sa Paraiso. Pero kun malaglag po kamo sa Har–Magedon, dai ko kamo maheheling. Kaya tabi adalan nindo an Biblia.” An saiyang ama nagparasabi sana: “Pagrahay mo, maadal ako.” Alagad kan magadan si Kumiko sa saiyang makuring helang, an saiyang ama nagbugtak sa lungon nia nin sarong surat na nagsasabi: “Maghehelingan kita sa Paraiso, Kumiko.” Pakatapos kan paglobong, nagtaram sia sa mga nakilobong asin nagsabi: “Nanuga ako ki Kumiko na maghehelingan kami sa Paraiso. Minsan ngani dai ko pa mapaniwalaan iyan huli ta dai akong gayo nakapag-adal, determinado akong siyasaton iyan. Tabangi man tabi nindo ako.” An iba pa sa saiyang pamilya nagpoon man na mag-adal sa Biblia.
Si Kumiko nagkaigwa nin tunay na paggalang sa buhay asin gustong mabuhay. Pinahalagahan nia an gabos na ginibo kan saiyang mga doktor na iligtas an saiyang presenteng buhay. Alagad, paagi sa pagsunod sa mga instruksion sa libro kan Kaglalang pinatunayan nia na mahal nia an tunay na buhay. Para sa minilyon, iyan magigin buhay na daing katapusan sa sarong paraisong daga. Makakabilang daw kamo sa sainda?