An Saindong Relihiyon—Saro daw na Bapor na Dai Noarin Man Maninigong Bayaan?
AN SARONG bapor nasa tahaw nin bagyo. An mga tripulante, na desperadong naghihingoa na iligtas an saindang bapor, napapaatubang sa sarong dramatikong desisyon: kun baga magdanay na nakasakay o bayaan an bapor asin iligtas an saindang sadiri. Aram daw nindo na an makatatakot na dramang ini ginagamit bilang ilustrasyon sa teolohiya?
An mga teologo, espesyalmente an mga iskolar na Katoliko, parateng ikinokomparar an saindang iglesya sa sarong bapor na nakikisagupa sa bagyo. Nagsasabi sinda na an bapor na ini, na si Jesus o si Pedro an nasa timonel, nagrerepresentar sa solamenteng paagi nin kaligtasan. An paninindogan kan klero iyo an, ‘Nungkang bayaan an bapor. An iglesya nag-agi na nin grabeng krisis kaidto, alagad iyan sarong bapor na nakaligtas sa gabos na bagyo sa kasaysayan.’ An iba nagsasabi, ‘Taano ta dapat siang bayaan? Ano an mga pagpipilian? Taano ta dai magdanay asin tabangan siang lumayag pasiring sa mas kalmadong katubigan?’
Kaoyon sa piguratibong tataramon na ini, an dakol na tawo, na kabilang sa gabos na klaseng relihiyon, nangangatanosan, ‘Aram kong sala an sakong relihiyon sa dakol na bagay, pero naglalaom ako na magbabago iyan. Habo kong bayaan iyan. Gusto kong magkaigwa nin kabtang sa pagtabang na mapangganahan an mga problema kaiyan.’ An klaseng ini nin pangangatanosan tibaad dikta nin sinserong kadayupotan sa nagimatan na relihiyon nin saro o nin pagkatakot pa ngani na “pagtraydoran” iyan.
Sarong napapanongod na kaso an ki Hans Küng, sarong bantog na teologong Katoliko na may laen na opinyon, na nag-isip-isip: “Maninigo daw na bayaan ko an sakayan durante kan bagyo, na pinababayaan an mga nakaiba kong maglayag sagkod ngonyan na sagupaon an doros, limason an tubig, asin makilaban pa ngani tanganing makaligtas?” Sia nagsimbag: “Dai ko isusuko an sakong pagkaepektibo sa laog kan iglesya.” An saro pang pagpipilian iyo an “pagsiblag sa iglesyang ini, huli sa pagtalikod kaiyan, apabor sa pagkamoot sa mas halangkaw na mga pamantayan, asin tibaad, tanganing magin mas tunay na mga Kristiano.”—Die Hoffnung bewahren.
Pero puwede daw na an saro magdanay na lunad sa sakayan kan saiyang sadiring iglesya sa paglaom na, an Dios, sa saiyang pagkaherak, tatawan an gabos na relihiyon nin daing talaan na panahon na magbago? Iyan sarong seryosong hapot. Siring sa ipinaririsa kan ilustrasyon, an tolos-tolos na paghale sa namemeligrong bapor paagi sa paglunad sa daing kasegurohan na mga lantsa-salbabida magigin siring kapeligroso nin pagdanay na nakalunad sa nalulunod na bapor. Madonong daw na magdanay sa sarong iglesya dawa ano an mangyari, ano man an kamugtakan kaiyan? Anong mga posibilidad sa reporma an iinaalok kan mga relihiyon ngonyan? Sagkod noarin sinda totogotan nin Dios na maghiro tumang sa saiyang kabotan?
[Pasasalamat para sa pinagkuanan kan retrato sa pahina 3]
Chesnot/Sipa Press