Bareta kan mga Parabalangibog kan Kahadean

An Maogmang Bareta kan Kahadean Ihuhulit

SA LAOG nin dakol na siglo an pangenot na kaiwal nin Dios, si Satanas na Diablo, tusong ginamit an politikal na mga gobyerno asin falsong relihiyon sa saiyang mga paghihingoa na olangon an paglakop kan tunay na Kristianismo. Pero an mga paaging ini masusudya. Ihinula ni Jesus na ‘an maogmang bareta kan kahadean ihuhulit [bakong, “tibaad ihulit” o, “puwedeng ihulit”] sa bilog na ineerokan na daga para sa pagpatotoo sa gabos na nasyon.’​—Mateo 24:14.

An pagkasudya ni Satanas nahayag sa Grecia. Sa nasyon na iyan an Iglesya Griego Ortodokso nagprobar na bawalan an mga Saksi ni Jehova sa paghuhulit kan maogmang bareta kan Kahadean. Alagad, arog sa itinatampok kan minasunod na eksperyensia, sa katapustapusi an mga katotoohan sa Biblia nakakaabot sa mga tawong sadiosan an puso sa ibong nin pagtumang.

Kaidtong mga 30 taon na an nakaagi, sarong pading Griego Ortodokso an nag-ako kan maogmang bareta asin nagpahayag pa ngani na gustong magin saro sa mga Saksi ni Jehova. Minsan siring, an saiyang mga paryentes makosog na tinumang an gigibohon niang ini asin pinirit sia na bayaan an saiyang pakikiasosyar sa mga Saksi. Tanganing paoyonan an saiyang pamilya, ipinadagos nia an saiyang karera bilang padi; pero, permi niang narerealisar na tinabangan sia kan mga Saksi ni Jehova na manodan an katotoohan asin na binayaan nia iyan karibay nin prominenteng katongdan sa falsong relihiyon.

Minsan siring, kun beses sia nagtataram apabor sa mga Saksi ni Jehova kun nagkakaigwa nin oportunidad. Sa nagkapirang pangyayari sinadol pa ngani nia an mga tawo na kun boot nindang manodan an mga katotoohan sa Biblia, maninigo sindang makipag-adal sa mga Saksi. Sa laog nin dakol na taon an iba talagang nagkuyog sa saiyang irinekomendar.

Dai pa sana nahaloy nagkahelang nin grabe an padi asin narealisar nia na puwedeng magadan sia dai mahaloy. Mantang nasa ospital, inapod nia an saiyang mga aki, asin sinda gabos nagtiripon sa kataed kan saiyang kama.a Dangan ipinaliwanag nia sa sainda na kun sia magadan, sia puwedeng maheling ninda giraray. Ipinakipag-olay nia sa sainda an tokdo kan Biblia manongod sa mga tawo na bubuhayon liwat ni Jehova tanganing mabuhay sa sarong paraiso digdi sa daga, pero kun talagang gusto ninda na maheling na iyan nangyayari, dapat nindang manodan an katotoohan gikan sa Biblia asin sumiblag sinda sa falsong relihiyon. Pinakiolayan nia sinda na makiasosyar sa mga Saksi ni Jehova asin makanood sa sainda kun paano magigin tunay na mga Kristiano.

Dai nahaloy pakatapos kaiyan, an padi nagadan. Minsan siring, an saiyang sadol nin pagpaaram sa saiyang mga aki nag-ani nin marahay na mga bunga. An saiyang aking babae, arog kan kadaklan sa saiyang mga paryentes, tumang na marhay sa mga Saksi ni Jehova asin sa saindang gibohon. Pero dai nia puwedeng ignorohon an odok na pakiolay kan saiyang naghihigagdan na ama, kaya nakipag-olay tolos sia sa mga Saksi ni Jehova asin nagpoon na mag-adal sa Biblia. Dai pa sana nahaloy sia mismo nagin Saksi, na idinudusay an saiyang buhay ki Jehova Dios asin sinisimbolisaran an saiyang pagdusay paagi sa bautismo sa tubig.

Sa Grecia asin sa labing 230 pang nasyon, an mga Saksi ni Jehova nagsasarig sa kapangyarihan kan banal na espiritu nin Dios. Paagi sa lubos na suporta kan banal na espiritu na naootob man sa sainda an hula ni Jesus: “Kamo mag-aako nin kapangyarihan kun dumatong na saindo an banal na espiritu, asin kamo magigin mga saksi ko sa Jerusalem asin sa bilog na Judea asin Samaria patin sagkod sa kaporoporohi nin daga.”​—Gibo 1:8.

[Nota sa Ibaba]