Pagkamapag-imbento—Sarong Maboot na Balaog Gikan sa Dios

SI Jehova naggagayagaya sa saiyang mga gibo nin paglalang. (Salmo 104:31) An hararom na satispaksion na saiyang nakukua sa paglalang ipinahahayag sa Genesis 1:31: “Naheling nin Dios an gabos niang ginibo asin, uya! idto marahayon.”

Dai sinadiri ni Jehova an kagayagayahan na ini. Tinawan nia si Jesus kan pribilehiyo nin pagigin ahente, o instrumento, na paagi sa saiya an gabos na iba pang bagay linalang. (Juan 1:3; Colosas 1:​16, 17) Bilang “pangenot na trabahador,” si Jesus ‘naogma man sa atubangan ni Jehova sa bilog na panahon.’​—Talinhaga 8:​30, 31.

Pero an abilidad sa pag-imbento bako sanang sa langit nag-eeksister. “Iyan dinisenyo bilang kabtang kan mga tawo,” an isinurat ni Eugene Raudsepp sa saiyang librong How Creative Are You? Bako ining pagkanorongod, huling an tawo linalang sa ladawan nin Dios. (Genesis 1:26) Kaya sinangkapan ni Jehova an katawohan nin nakakokontentong mga abilidad sa pag-imbento.​—Santiago 1:17.

Kaya, bakong makangangalas na an Biblia may pag-oyon nanggad na nagtataram dapit sa pag-awit, pagbayle, paghabol, pagluto, pagpanday, asin iba pang aktibidad sa pag-imbento. (Exodo 35:​25, 26; 1 Samuel 8:13; 18:​6, 7; 2 Cronica 2:​13, 14) Si Bezalel, sarong artesano, ginamit an saiyang talento sa “pagdisenyo nin mga kagamitan” tanganing makatabang sa pagtogdok kan tabernakulo. (Exodo 31:​3, 4) An pastor na si Jabal puwedeng iyo an nakaimbento kan tolda, mapag-imbentong kagianan para sa buhay na pagbabaklay. (Genesis 4:20) Si David bako sanang musikero asin kompositor, kundi paraimbento man nin bagong mga instrumento sa musika. (2 Cronica 7:6; Salmo 7:17; Amos 6:5) Puwedeng si Miriam an nagdirehir sa maogmahon na pagbayle na nagselebrar sa milagrosong pagkaligtas kan mga Israelita sa Dagat na Pula.​—Exodo 15:20.

An pagkamapag-imbento sa parate kapakipakinabang sa pagpalakop kan tunay na pagsamba. Si Jesus mapag-imbentong naggamit nin mga ilustrasyon asin praktikal na mga halimbawa tanganing ikomunikar an saiyang mensahe. An saiyang mga parasunod sinasadol man na ‘magmaigot sa pagtaram asin pagtokdo.’ (1 Timoteo 5:17) Iyo, an saindang paghuhulit bako sanang rutina. Iyan sarong abilidad na nagkakaipo nin mapag-imbentong mga paagi nin pagtotokdo. (Colosas 4:6) Ini nangorognang mahalaga kun nagtotokdo sa sadiring mga aki.​—Deuteronomio 6:​6, 7; Efeso 6:4.

Kaya, ihinihiras ni Jehova sa iba an kagayagayahan na itinatao saiya kan paglalang. Kanigoan kaboot na balaog!