An Pinakadakulang Tawo na Nabuhay Kasuarin Pa Man

Kapitulo 97: Mga Trabahador sa Ubasan

“Dakol na enot,” sabi pa sana ni Jesus, “an magigin huri asin an mga huri enot.” Ngonyan iinilustrar nia ini paagi sa pagsaysay nin sarong estorya. “An kahadean kan kalangitan,” an pagpoon nia, “nakakaagid sa sarong tawo, sarong kagharong, na nagluwas nin amay pagkaaga sa pagtangdan nin mga trabahador sa saiyang ubasan.”

Si Jesus nagpadagos: “Kan [an kagharong] makipag-oyon na sa mga trabahador na sarong denario an aldaw, isinugo nia sinda sa saiyang ubasan. Pagluwas man kan mga ikatolong oras, naheling nia an iba na nagtitindog na daing trabaho sa sadan; asin sa mga iyan sia nagsabi, ‘Kamo man, paduman kamo sa ubasan, asin an ano man na maninigo itatao ko sa saindo.’ Kaya nagduman sinda. Sa giraray nagluwas sia kan mga ikaanom asin ikasiyam na oras asin siring man an ginibo. Sa katapustapusi, kan mga ikaonseng oras sia nagluwas asin nanompongan an iba pa na nagtitindog, asin sia nagsabi sa sainda, ‘Tadaw ta nagtitindog kamo digdi sa bilog na aldaw na daing trabaho?’ Sinda nagsabi sa saiya, ‘Huli ta mayo nin siisay man na nagtangdan samo.’ Sia nagsabi sa sainda, ‘Paduman man kamo sa ubasan.’”

An kagharong, o kagsadiri kan ubasan, iyo si Jehova Dios, asin an ubasan iyo an nasyon nin Israel. An mga trabahador sa ubasan mga tawo na ilinaog sa tipan nin Pagboot; sa espisipiko sinda an mga Judio na nabubuhay kan bilog na aldaw kan mga apostol. Sa bilog na aldaw sanang mga trabahador ginibo an kontrata sa tangdan. An tangdan sarong denario para sa sarong aldaw na pagtrabaho. Mantang an “ikatolong oras” alas 9:00 n.a., an mga inapod sa ika-3, ika-6, ika-9, asin ika-11 oras nagtrabaho, sono sa pagkasunodsunod, nin 9, 6, 3, asin 1 oras sana.

An 12 oras, o bilog na aldaw, na mga trabahador nagrerepresentar sa mga namomoon na Judio na padagos na nagin sibot sa relihiyosong serbisyo. Bako sindang arog kan mga disipulo ni Jesus, na, sa kadaklan kan saindang buhay, an trabaho pagsisira o iba pang sekular na mga okupasyon. Kan tigholog sana nin 29 C.E. na isinugo kan “kagharong” si Jesu-Cristo na tiponon an mga ini tanganing magin saiyang mga disipulo. Sa siring sinda an nagin “huri,” o an ika-11 oras na mga trabahador sa ubasan.

Sa katapustapusi, an simbolikong aldaw nin trabaho natapos sa pagkagadan ni Jesus, asin nagdatong na an oras na tangdanan an mga trabahador. Sinunod an pambihirang paagi na enot na tangdanan an mga huri, siring kan ipinaliwanag: “Kan banggi na, an kagurangnan kan ubasan nagsabi sa saiyang pinaniniwalaan, ‘Apoda an mga trabahador asin bayadi sinda kan saindang tangdan, magpoon sa huri sagkod sa enot.’ Kan dumatong an ikaonseng oras na mga tawo, kada saro sa sainda nag-ako nin sarong denario. Kaya, kan dumatong an mga enot, sinda naghona na mas dakol an aakoon ninda; alagad nag-ako man sinda nin bayad sa halaga nin sarong denario. Pakaako kaiyan sinda nagpoon na maggumodgumod tumang sa kagharong asin nagsabi, ‘Ining mga huri nagtrabaho nin sarong oras; minsan siring ipinantay mo sinda sa samo na nagtios kan pasan sa bilog na aldaw asin kan nakakapasong init!’ Alagad bilang simbag sa saro sa sainda sia nagsabi, ‘Katood, dai taka ginibohan nin sala. Uminoyon ka sako sa sarong denario, bako daw? Kuana an saimo asin lakaw. Boot kong itao sa huring ini an pareho kan sa saimo. Bako daw sono sa katogonan na gibohon ko an boot ko sa sakong mga sadiri? O maraot daw an saimong mata huli ta ako marahay?’” Bilang konklusyon, inotro ni Jesus an sarong punto na sinabi na nia kan primero, na sinasabi: “Sa paaging ini an mga huri magigin enot, asin an mga enot huri.”

An pag-ako kan denario nangyari, bakong kan pagkagadan ni Jesus, kundi kan Pentecostes 33 C.E., kan si Cristo, an “pinaniniwalaan,” ibubo an banal na espiritu sa saiyang mga disipulo. An mga disipulong ini ni Jesus kapareho kan “mga huri,” o ika-11-oras, na mga trabahador. An denario dai nagrerepresentar sa balaog na banal na espiritu mismo. An denario sarong bagay na gagamiton kan mga disipulo digdi sa daga. Iyan sarong bagay na nangangahulogan kan saindang pagkabuhay, kan saindang buhay na daing katapusan. Iyan an pribilehiyo nin pagigin espirituwal na Israelita, na linahidan na maghulit manongod sa Kahadean nin Dios.

Dai nahaloy naheling kan enot na mga trabahador na an mga disipulo ni Jesus tinangdanan na, asin naheling ninda sinda na ginagamit an simbolikong denario. Pero labi pa sa banal na espiritu asin sa kaiba kaiyan na mga pribilehiyo sa Kahadean an gusto ninda. An saindang mga paggumodgumod asin pagkontra pinaagi sa paglamag sa mga disipulo ni Cristo, an “mga huring” trabahador sa ubasan.

An kaotoban daw na iyan kan enot na siglo an solamenteng kaotoban kan ilustrasyon ni Jesus? Bako, an klero nin Kakristianohan sa ika-20 siglong ini iyo an, dahelan sa saindang mga posisyon asin paninimbagan, “enot” na pinalaog na magtrabaho sa simbolikong ubasan nin Dios. Ibinilang ninda an dusay na mga parahulit na asosyado sa Watch Tower Bible and Tract Society na “mga huri” sa pagkaigwa nin ano man na balidong asignasyon sa paglilingkod sa Dios. Pero, an totoo, an mga ini mismo, na hinamak kan klero, an nag-ako kan denario​—an onra sa paglilingkod bilang linahidan na mga embahador kan langitnon na Kahadean nin Dios. Mateo 19:​30–20:16.

▪ Ano an irinirepresentar kan ubasan? Siisay an irinirepresentar kan kagsadiri kan ubasan asin kan 12-oras asin 1-oras na mga trabahador?

▪ Kasuarin natapos an simbolikong aldaw nin pagtrabaho, asin kasuarin ginibo an pagtangdan?

▪ Ano an irinirepresentar kan pagtangdan kan denario?