An Pinakadakulang Tawo na Nabuhay Kasuarin Pa Man

Kapitulo 98: Nagpasuruhay an mga Disipulo Mantang Nagdadangadang an Kagadanan ni Jesus

Si Jesus asin an saiyang mga disipulo yaon sa harani kan Salog nin Jordan, kun saen nagdakit sinda hale sa distrito nin Perea pasiring sa Judea. Dakol na iba pa an nagbabaklay kasabay ninda pasiring sa Paskua nin 33 C.E., na mga sarong semana na sana.

Si Jesus naeenot sa mga disipulo, asin nagngangalas sinda sa saiyang mapusong determinasyon. Girumdomon na kan nakaaging nagkapirang semana kan magadan si Lazaro asin si Jesus paduman na kutana sa Judea haleng Perea, dinagka ni Tomas an iba: “Magduman man kita, tanganing magadan kitang kaiba nia.” Girumdomon man na pakatapos buhayon liwat ni Jesus si Lazaro, an Sanhedrin nagplanong ipagadan si Jesus. Bakong makangangalas na labi-labi an pagkatakot kan mga disipulo mantang palaog na naman sinda ngonyan sa Judea.

Tanganing andamon sinda para sa maabot na mga pangyayari, isinuhay ni Jesus an 12 na sinda sana asin sinabihan sinda: “Uya kita, nagtutukad pa-Jerusalem, asin an Aki nin tawo itatao sa mga poon nin mga saserdote asin sa mga eskriba, asin sisilotan sia ninda na gadanon patin itatao sia sa mga tawo kan mga nasyon, asin pag-oolog-ologon sia ninda asin lulutaban sia asin hahampakon sia patin gagadanon sia, alagad pakalihis nin tolong aldaw sia mabubuhay.”

Ini an ikatolong beses sa uminagi pa sanang mga bulan na si Jesus nagsabi sa saiyang mga disipulo manongod kan saiyang kagadanan asin pagkabuhay liwat. Asin minsan ngani naghinanyog sinda sa saiya, dai sinda nakasabot. Posibleng huli ta nagtutubod sinda sa pagbabalik liwat digdi sa daga kan kahadean nin Israel, asin linalaoman nindang magkamit nin kamurawayan asin onra sa sarong daganon na kahadean sa kaibanan ni Cristo.

Kabilang sa mga nagbabaraklay pasiring sa Paskua si Salome, an ina kan mga apostol na sinda Santiago asin Juan. Inapod ni Jesus an mga lalaking ini na “mga Aki nin Dagoldol,” na mayong duwa-duwa huli sa saindang ugale na madaling maanggot. Nahaloyhaloy nang an duwang ini may ambisyon na magin prominente sa Kahadean ni Cristo, asin ipinaaram ninda sa saindang ina an saindang kamawotan. Sia ngonyan an nagdolok ki Jesus para sa sainda, huminurohod sa atubangan nia, asin naghagad nin pabor.

“Ano an boot mo?” an hapot ni Jesus.

Sia nagsimbag: “Ipagboot mo na an duwa kong aki tumukaw, an saro sa saimong too asin an saro sa saimong wala, sa saimong kahadean.”

Nasasabotan an ginikanan kan pakiolay, si Jesus nagsabi ki Santiago asin Juan: “Kamo dai nakakaaram kun ano an saindong hinahagad. Magigibo daw nindong inomon an kopa na sako nang iinomon?”

“Magigibo mi,” an simbag ninda. Minsan ngani kasasabi pa sana ni Jesus sainda na mapapaatubang sia sa makuring paglamag asin sa katapustapusi kagadanan, malinaw na dai ninda nasabotan na ini an boot sabihon nia kan “kopa” na saiyang iinomon.

Minsan siring, si Jesus nagsabi sa sainda: “Totoong gayo na iinomon nindo an sakong kopa, alagad ining pagtukaw sa sakong too asin sa sakong wala bakong sako an pagtao, kundi iyan para sa mga inandaman kan sakong Ama.”

Pag-abot nin panahon naaraman kan sampulo pang apostol an ipinakiolay ni Santiago asin Juan, asin anggot sinda. Posibleng lataw si Santiago asin Juan sa nakaaging pagpasuruhay sa tahaw kan mga apostol manongod sa kun siisay an pinakadakula. Ihinahayag kan saindang ipinakikiolay ngonyan na dai ninda iinaplikar an hatol na itinao ni Jesus manongod sa bagay na ini. Makamomondo, makosogon pa an saindang pagmawot na magin prominente.

Kaya tanganing husayon an pinakahuring pag-iriwal na ini asin an maraot na boot na ibinunga kaiyan, inapod gabos ni Jesus an 12. Hinahatolan sinda sa mamomoton na paagi, sia nagsabi: “Aram nindo na an mga poon kan mga nasyon naghahade sa sainda asin an makokosog na lalaki nagkakapot nin autoridad sa sainda. Bakong siring kaini dian sa tahaw nindo; kundi an siisay man na boot na magin dakula sa saindo kaipuhan na iyo an mani paralingkod sa saindo, asin an siisay man na boot mangenot sa saindo kaipuhan na iyo an mani oripon nindo.”

Itinao ni Jesus an halimbawa na maninigo nindang arogon, siring kan paliwanag nia: “Kun paanong an Aki nin tawo nagdigdi, bakong tanganing paglingkodan, kundi tanganing maglingkod asin magtao kan saiyang kalag bilang pantubos na karibay nin dakol.” Si Jesus bako sanang naglingkod para sa iba kundi gigibohon nia iyan sagkod na magadan para sa katawohan! Kaipuhan kan mga disipulo an kaparehong arog-Cristong kaisipan na iyan nin pagmawot na maglingkod imbes na paglingkodan asin magpakahababa imbes na mapasa prominenteng posisyon. Mateo 20:​17-28; Marcos 3:17; 9:​33-37; 10:​32-45; Lucas 18:​31-34; Juan 11:16.

▪ Taano ta labi-labi an pagkatakot ngonyan kan mga disipulo?

▪ Paano inandam ni Jesus an saiyang mga disipulo para sa maabot na mga pangyayari?

▪ Ano an ipinakiolay ki Jesus, asin paano naapektaran an ibang apostol?

▪ Paano hinusay ni Jesus an problema sa tahaw kan saiyang mga apostol?