An Pinakadakulang Tawo na Nabuhay Kasuarin Pa Man

Kapitulo 101: Sa Betania, sa Harong ni Simon

Paghale ni Jesus sa Jerico, nagduman sia sa Betania. Haros bilog na aldaw an biyahe, huling patukad iyan nin mga 19 kilometros sa depisil na lugar. An Jerico mga 250 metros na mas hababa sa dagat, asin an Betania mga 760 metros an langkaw sa dagat. An Betania, tibaad nagigirumdoman nindo, iyo an erokan ni Lazaro asin kan saiyang mga tugang na babae. An sadit na baryo mga tolong kilometro an rayo sa Jerusalem, na yaon sa sirangan na bakilid kan Bukid nin mga Olibo.

Dakol na an nag-abot sa Jerusalem para sa Paskua. Amay sindang nag-abot tanganing maglinig kan saindang sadiri sa seremonyal na paagi. Puwedeng nakaduta sinda sa sarong bangkay o nakagibo nin iba pa na nagparamog sa sainda. Kaya sinunod ninda an mga prosedimiento na maglinig tanganing akoon sa pagselebrar kan Paskua. Mantang nagkakatiripon sa templo an amay na nag-arabot na ini, dakol an nag-iisip kun baga maatender si Jesus sa Paskua.

An Jerusalem sentro nin pasuruhay manongod ki Jesus. Aram kan kadaklan na boot siang dakopon kan mga poon nin relihiyon tanganing ipagadan. An totoo, nagboot na sinda na kun an siisay man makaaram kun haen sia, dapat nindang ipaaram iyan sa sainda. Tolong beses kan nakaagi pa sanang mga bulan​—sa Kapiyestahan kan mga Tabernakulo, sa Kapiyestahan nin Pagdusay, asin pakatapos na buhayon nia liwat si Lazaro—​an mga namomoon na ini naghingoang gadanon sia. Kaya, an mga tawo nag-iisip, mapaheling pa daw giraray si Jesus sa publiko? “Ano an paghona nindo?” an paharapothapot ninda.

Mientras tanto, si Jesus nag-abot sa Betania anom na aldaw pa bago kan Paskua, na sa petsang Nisan 14 sono sa Judiong kalendaryo. Nag-abot si Jesus sa Betania kan mga Biyernes na banggi, na nasa pagpoon kan Nisan 8. Dai sia puwedeng magbiyahe nin Sabado pasiring sa Betania huli ta an pagbiyahe kun Sabbath​—na poon sa pagsolnop kan aldaw sa Biyernes sagkod sa pagsolnop kan aldaw sa Sabado—​ipinagbabawal kan Judiong pagboot. Si Jesus posibleng nagdagos sa harong ni Lazaro, siring kan dati niang ginigibo, asin duman nagtorog kan Biyernes na banggi.

Alagad, saro pang taga-Betania an nag-imbitar ki Jesus asin sa saiyang kairiba na duman na magkakan kan Sabadong banggi. An lalaki iyo si Simon, sarong dating daoton, na puwedeng pinaomayan kaidto ni Jesus. Huli sa saiyang kahigosan, si Marta naglingkod sa mga bisita. Alagad, siring kan kinaugalean na, maasikaso si Maria ki Jesus, ngonyan sa paaging pinonan nin pasuruhay.

Nagbukas si Maria nin sarong alabastro, o sadit na prasko, na may laog na mga kabangang kilo nin ungguento, na “tunay na nardo.” Mahalon ini. An totoo, an kantidad kaiyan katimbang nin mga sarong taon na suweldo! Kan an ungguento ibubo ni Maria sa payo ni Jesus asin sa saiyang mga bitis asin pinunasan an mga bitis ni Jesus kan saiyang buhok, an mahamot na parong nakapano sa bilog na harong.

An mga disipulo naanggot asin naghapot: “Tadaw ta sinasayang ini?” Dangan si Judas Iscariote nagsabi: “Taano ta dai ipinabakal an ungguentong ini nin tolong gatos na denario asin itinao sa mga dukha?” Alagad si Judas mayo man talaga nin pagmakolog sa mga dukha, huli ta sia naghahabon sa kahon nin kuwarta na nasa pag-iingat kan mga disipulo.

Sinurog ni Jesus si Maria. “Pabayae sia nindo,” an ipinagboot nia. “Taano ta hinihingoa nindong ribokon sia? Ginibohan nia ako nin marahay na gibo. Huli ta perming nasa kaibanan nindo an mga dukha, asin noarin man na boot nindo permi nindo sindang magigibohan nin karahayan, alagad ako bakong perming nasa saindo. Ginibo nia an saiyang makakaya; patienot niang hiningoa na magbugtak nin ungguento sa sakong hawak para sa lobong. Sa katotoohan ako nagsasabi sa saindo, Saen man ipaghulit an maogmang bareta sa bilog na kinaban, an ginibo kan babaeng ini isasaysay man bilang paggirumdom sa saiya.”

Si Jesus labi nang 24 oras ngonyan sa Betania, asin napabareta nang yaon sia duman. Kaya, dakol an nagduruman sa harong ni Simon tanganing maheling si Jesus, pero nagduruman man sinda tanganing maheling si Lazaro, na yaon man duman. Kaya an mga poon na saserdote nagpaharatolhatol na ipagadan bako sanang si Jesus kundi pati si Lazaro. Ini huli ta dakol na tawo an nagtutubod ki Jesus huli ta naheling nindang buhay an saro na saiyang ibinangon hale sa mga gadan! Tunay nanggad, kanigoan karaot kan mga namomoon na ini sa relihiyon! Juan 11:55–12:11; Mateo 26:​6-13; Marcos 14:​3-9; Gibo 1:12.

▪ Anong pasuruhay an nangyayari sa templo sa Jerusalem, asin taano?

▪ Taano si Jesus ta siertong nag-abot sa Betania kan Biyernes imbes na kan Sabado?

▪ Pag-abot ni Jesus sa Betania, saen nia posibleng pinaagi an Sabbath?

▪ Anong akto ni Maria an pinonan nin pasuruhay, asin paano sia sinurog ni Jesus?

▪ Ano an nag-iilustrar kan dakulang karatan kan mga poon na saserdote?