An Pinakadakulang Tawo na Nabuhay Kasuarin Pa Man

Kapitulo 102: An Mapangganang Paglaog ni Cristo sa Jerusalem

Pagkaaga, Domingo, Nisan 9, naghale si Jesus sa Betania kaiba an saiyang mga disipulo asin nagtukad sa Bukid nin mga Olibo pasiring sa Jerusalem. Dai nahaloy, harani na sinda sa Betfage, na yaon sa Bukid nin mga Olibo. Pinagbotan ni Jesus an duwa sa saiyang mga disipulo:

“Paduman kamo sa baryo na natatanaw nindo, asin tolos na manonompongan nindo an sarong asna na nagagakod, asin an ogbon na kaiba nia; hubadan nindo sinda asin darahon nindo sako. Asin kun may magsabi nin ano man sa saindo, magsabi kamo, ‘Kaipuhan sinda kan Kagurangnan.’ Asin sa siring ipapadara nia tolos sinda.”

Minsan ngani sa primero dai nasabotan kan mga disipulo na an mga pagboot na ini igwang koneksion sa kaotoban kan hula sa Biblia, kan huri nasabotan ninda iyan. An propetang si Zacarias naghula na an ipinanuga nin Dios na Hade mangangabayo sa sarong asno pasiring sa Jerusalem, iyo, “sa ogbon nin sarong babaeng asno.” Si Hadeng Salomon nangabayo man sa sarong ogbon nin asno kan sia lahidan.

Paglaog kan mga disipulo sa Betfage asin kuanon an ogbon na asno asin an ina kaiyan, an ibang nagtitindog duman nagsabi: “Ano an ginigibo nindo?” Alagad kan sabihan na an mga hayop para sa Kagurangnan, tinogotan kan mga tawo an mga disipulo na darahon iyan ki Jesus. Ibinugtak kan mga disipulo sa inang asna asin sa ogbon kaini an saindang pan-ibabaw na mga gubing, alagad si Jesus suminakay sa ogbon na asno.

Mantang nangangabayo si Jesus pasiring sa Jerusalem, orog na nagdadakol an kadaklan. An kadaklan kan mga tawo nagbiriklad sa dalan kan saindang pan-ibabaw na mga gubing, mantang an iba nagputol nin mga sanga nin kahoy asin ibinurugtak iyan sa dalan. “Omawon an Saro na minadatong bilang Hade sa ngaran ni Jehova!” an kurahaw ninda. “Katoninongan sa langit, asin kamurawayan sa pinakaharalangkaw na lugar!”

An ibang Fariseo na nasa tahaw kan kadaklan nauyam sa mga pahayag na ini asin nagreklamo ki Jesus: “Paratokdo, sawaya an saimong mga disipulo.” Alagad nagsimbag si Jesus: “Sinasabi ko sa saindo, Kun an mga ini dai maggirong, an mga gapo makururahaw.”

Mantang parani na si Jesus sa Jerusalem, tinanaw nia an siudad asin nagpoon na tangisan iyan, na nagsasabi: “Kun ika, minsan ika, kutana nakamansay sa aldaw na ini kan mga bagay na manongod sa katoninongan​—alagad ngonyan an mga iyan tinago sa saimong mga mata.” Huli sa saiyang tuyong pagmasumbikal, kaipuhan na magbayad an Jerusalem, siring kan ihinula ni Jesus:

“An saimong mga kaiwal [an mga Romano sa pangengenot ni Heneral Tito] matogdok sa palibot mo nin kuta na may matarom na mga taldok asin lalaomon ka patin pipioton ka sa gabos na gilid, asin ika asin an saimong mga aki dian sa saimo papasubsobon ninda sa daga, asin dai ka ninda tatadaan nin gapo sa ibabaw nin gapo.” An kalaglagan na ini kan Jerusalem na ihinula ni Jesus aktuwal na nangyari pakalihis nin 37 taon, kan taon 70 C.E.

Pirang semana sana bago kaini, an dakol sa kadaklan naheling si Jesus na binuhay liwat si Lazaro. Ngonyan an mga ini padagos na nagtataram sa iba manongod sa milagrong iyan. Kaya paglaog ni Jesus sa Jerusalem, naribok an bilog na siudad. “Siisay ini?” an boot maaraman kan mga tawo. Asin an kadaklan padagos na nagsasabi: “Ini an propetang si Jesus, na taga-Nazaret nin Galilea!” Naheheling an nangyayari, nanambitan an mga Fariseo na talagang mayo sindang nagiginibong ano man, huli ta, arog kan sabi ninda: “An kinaban nagsusunod na sa saiya.”

Siring kan saiyang nakaugalean sa mga pagsongko sa Jerusalem, si Jesus nagduman sa templo tanganing magtokdo. Nagdorolok sa saiya duman an mga buta asin pilay, asin pinaomayan nia sinda! Kan maheling kan mga poon na saserdote asin kan mga eskriba an makangangalas na mga bagay na ginigibo ni Jesus asin kan madangog ninda an mga aking lalaki sa templo na nagkukururahaw, “Magligtas ka, ipinamimibi niamo, Aki ni David!” sinda naanggot. “Nadadangog mo an sinasabi kan mga ini?” an reklamo ninda.

“Iyo,” an simbag ni Jesus. “Ano dai nindo noarin man nabasa ini, ‘Gikan sa ngoso nin mga omboy asin pasusohon ika nagkamit nin pag-omaw’?”

Nagpadagos si Jesus sa pagtotokdo, asin kinalagkalag nia an gabos na bagay sa templo. Dai nahaloy hapon na. Kaya naghale sia, kaiba an 12, asin nagbiyahe pabalik nin mga tolong kilometro pasiring sa Betania. Duman sia nagtorog kan Domingong banggi, na posibleng sa harong kan saiyang katood na si Lazaro. Mateo 21:​1-11, 14-17; Marcos 11:​1-11; Lucas 19:​29-44; Juan 12:​12-19; Zacarias 9:9.

▪ Kasuarin asin sa anong paagi naglaog si Jesus sa Jerusalem bilang Hade?

▪ Gurano kahalaga na an mga kadaklan mag-oromaw ki Jesus?

▪ Ano an namatean ni Jesus kan tinanaw nia an Jerusalem, asin anong hula an itinaram nia?

▪ Ano an nangyari pagduman ni Jesus sa templo?