An Pinakadakulang Tawo na Nabuhay Kasuarin Pa Man

Kapitulo 103: Pagsongko Giraray sa Templo

Katotorog pa sana ni Jesus asin kan saiyang mga disipulo sa ikatolong banggi ninda sa Betania poon kan umabot haleng Jerico. Ngonyan na amay na aga nin Lunes, Nisan 10, sinda yaon na sa dalan pasiring sa Jerusalem. Nagugutom na si Jesus. Kaya kan maheling nia an sarong higuerra na may mga dahon, rinanihan nia iyan tanganing helingon kun baga iyan may mga bungang higos.

Amay na marhay an pagdahon kan kahoy, huli ta an panahon nin mga higos sa Hunyo pa, asin ngonyan mga katapusan pa sana nin Marso. Alagad, malinaw na naghona si Jesus na huling amay an pagdahon, puwedeng amay man an pagbunga nin mga higos. Pero nasudya sia. An mga dahon nagtao sa kahoy nin nakadadayang itsura. Kaya isinumpa ni Jesus an kahoy, na sinasabi: “Mayo na nin makakan nin bunga hale sa saimo sagkod lamang.” An ibinunga kan ginibo ni Jesus asin an kahulogan kaiyan nanodan pagkaaga.

Sa pagpapadagos, dai nahaloy si Jesus asin an saiyang mga disipulo uminabot sa Jerusalem. Nagduman sia sa templo, na saiyang siniyasat kasuodmang hapon. Alagad naghiro sia ngonyan, arog kan saiyang ginibo kaidtong tolong taon na an nakaagi kan umatender sia sa Paskua kan 30 C.E. Pinalayas ni Jesus an mga nagpapabakal asin namamakal sa templo asin tinuruwal an mga lamesa kan mga pararibay nin pirak asin an mga tukawan kan mga nagpapabakal nin salampati. Dai ngani nia tinogotan an siisay man na magdara nin mga gamit kun minaagi sa templo.

Kinokondenar an mga pararibay nin pirak asin nagpapabakal nin mga hayop sa templo, sia nagsabi: “Bakong nasusurat, ‘An sakong harong aapodon na harong nin pamibi para sa gabos na nasyon’? Alagad ginibo nindo iyan na lungib nin mga parahabon.” Sinda mga parahabon huli ta pinipresyohan ninda nin halangkawon an mga mayong gayong maginibo kundi bumakal sa sainda nin mga hayop na kaipuhan sa pag-atang. Kaya an pagheling ni Jesus sa pagnenegosyong ini sarong porma nin pangingikil o paghabon.

Kan mabaretaan kan mga poon na saserdote, eskriba, asin mga opisyal kan banwaan an ginibo ni Jesus, naghanap giraray sinda nin paagi na ikapagadan sia. Kaya pinatunayan ninda na sinda dai puwedeng magbago. Pero, dai ninda aram kun paano gagadanon si Jesus, huling an gabos na tawo padagos na nagsusunod sa saiya tanganing magdangog sa saiya.

Apuwera sa mga Judio sa laman, an mga Hentil nagdaratong man sa Paskua. An mga ini mga proselita, na an boot sabihon sinda nakombertir sa relihiyon kan mga Judio. May nagkapirang Griego, na malinaw na mga proselita, na nagdolok ngonyan ki Felipe asin nakikiolay na makaolay si Jesus. Nagdolok si Felipe ki Andres, tibaad tanganing maghapot kun baga angay an siring na pag-orolay. Malinaw na si Jesus yaon pa sa templo, kun saen nakaolay sia kan mga Griego.

Aram ni Jesus na pipira na sanang aldaw an natatada sa saiyang buhay, kaya magayon na iinilustrar nia an saiyang situwasyon: “An oras nagdatong na tanganing an Aki nin tawo pamurawayon. Sa katotoohan sinasabi ko saindo, Kun an tipasi nin trigo dai maholog sa daga asin magadan, iyan nagdadanay sanang sarong tipasi; alagad kun iyan magadan, iyan nagbubunga nin dakol.”

An sarong tipasi nin trigo mayong gayong halaga. Pero, kumusta kun iyan italbong sa daga asin “magadan,” na tinatapos an buhay kaiyan bilang banhi? Dangan iyan minatubo asin pag-abot nin panahon nagtatalubo na magin poon na nagpapaluwas nin kadakoldakol na tipasi nin trigo. Kaagid kaiyan, si Jesus saro sanang sangkap na tawo. Alagad kun sia magadan na maimbod sa Dios, sia an magigin instrumento sa pagtao nin buhay na daing katapusan sa mga maimbod na igwa kan kaparehong espiritu nin pagsasakripisyo sa sadiri na yaon sa saiya. Kaya, si Jesus nagsabi: “An namomoot sa saiyang kalag minalaglag kaiyan, alagad an naoongis sa saiyang kalag sa kinaban na ini mag-iingat kaiyan para sa buhay na daing katapusan.”

Malinaw na si Jesus dai nag-iisip manongod kan saiya sanang sadiri, huli ta sunod niang ipinaliwanag: “Kun an siisay man maglilingkod sako, sumunod sia sa sako, asin kun saen ako duman man an sakong lingkod. Kun an siisay man maglilingkod sako, tatawan sia nin onra kan Ama.” Kanigoan kamakangangalas na balos huli sa pagsunod ki Jesus asin sa paglilingkod sa saiya! Iyan an balos na matawan nin onra kan Ama na makaiba ni Cristo sa Kahadean.

Iniisip an grabeng pagsakit asin makolog na kagadanan na naghahalat sa saiya, si Jesus nagpadagos: “Ngonyan napupurisaw an sakong kalag, asin ano an sasabihon ko? Ama, iligtas mo ako sa oras na ini.” Kun puwede sana kutanang malikayan an naghahalat sa saiya! Alagad, dai, siring kan sabi nia: “Dahel kaini ako napadigdi sa oras na ini.” Oyon si Jesus sa bilog na areglo nin Dios, kabale an saiya mismong kagadanan bilang atang. Mateo 21:​12, 13, 18, 19; Marcos 11:​12-18; Lucas 19:​45-48; Juan 12:​20-27.

▪ Taano ta naglaom si Jesus na makakua nin higos minsan ngani bako pang panahon kaiyan?

▪ Taano ta inapod ni Jesus na “mga parahabon” an mga nagpapabakal sa templo?

▪ Sa anong paagi na si Jesus arog sa sarong tipasi nin trigo na nagadan?

▪ Ano an saboot ni Jesus manongod sa pagsakit asin kagadanan na naghahalat sa saiya?