An Pinakadakulang Tawo na Nabuhay Kasuarin Pa Man
Kapitulo 105: Pagpoon nin Sarong Makahulogan na Aldaw
Paghale ni Jesus sa Jerusalem kan Lunes na banggi, nagbalik sia sa Betania sa sirangan na bakilid kan Bukid nin mga Olibo. Natapos na an duwang aldaw kan saiyang pangultimong ministeryo sa Jerusalem. Mayong duwa-duwa na nakitorog giraray si Jesus sa saiyang katood na si Lazaro. Poon kan pag-abot haleng Jerico kan Biyernes, ini an ikaapat na banggi nia sa Betania.
Ngonyan, amay nin Martes na aga, Nisan 11, sia asin an saiyang mga disipulo nasa dalan na naman. Ini makahulogan nanggad na aldaw sa ministeryo ni Jesus, an pinakasibot sagkod ngonyan. Ini an huring aldaw na nagpaheling sia sa templo. Asin ini an huring aldaw kan saiyang ministeryo sa publiko bago kan pagbista asin paggadan sa saiya.
Si Jesus asin an saiyang mga disipulo nag-agi sa dati nindang agihan sa Bukid nin mga Olibo pasiring sa Jerusalem. Sa dalan na iyan hale sa Betania, namangno ni Pedro an kahoy na isinumpa ni Jesus kasuodmang aga. “Rabi, uya!” an ikinagsing nia, “an higuerra na isinumpa mo naalang na.”
Alagad taano ta ginadan ni Jesus an kahoy? Sinabi ni Jesus kun taano kan padagos siang magsabi: “Sa katotoohan ako nagsasabi sa saindo, Kun igwa sana kamong pagtubod asin dai nagduduwaduwa, bako sanang magigibo nindo an ginibo ko sa higuerra, kundi siring man kun sasabihon nindo sa bukid na ini [an Bukid nin mga Olibo na tinitindogan ninda], ‘Mabuhat ka asin makatapok sa dagat,’ iyan mangyayari. Asin an gabos na bagay na hagadon nindo sa pamibi, na igwang pagtubod, aakoon nindo.”
Kaya paagi sa pagpangyari na maalang an kahoy, si Jesus nagtatao sa saiyang mga disipulo nin sarong praktikal na halimbawa manongod sa saindang pangangaipo na magkaigwa nin pagtubod sa Dios. Siring kan sabi nia: “An gabos na bagay na saindong ipinapamibi asin hinahagad tubodon nindo na haros naako na nindo, asin iyan makakamtan nindo.” Sarong importanteng leksion nanggad na dapat manodan ninda, nangorogna huli sa makangingirhat na mga pagbalo na madali nang dumatong! Pero, an pagkaalang kan higuerra may saro pang koneksion sa kuwalidad nin pagtubod.
An nasyon nin Israel, arog kan higuerrang ini, igwang nakadadayang itsura. Minsan ngani an nasyon nasa relasyon nin pakipagtipan sa Dios asin tibaad nagsasagin na nag-ootob sa saiyang mga regulasyon, iyan napatunayan na daing pagtubod, baog sa marahay na mga bunga. Huli sa kadaihan nin pagtubod, isinisikwal pa ngani kaiyan an mismong Aki nin Dios! Kaya, paagi sa pagpangyaring maalang an dai nagbubungang higuerra, klarong ipinaheheling ni Jesus an magigin kaaabtan kan daing bunga, daing pagtubod na nasyon na ini.
Dai nahaloy, si Jesus asin an saiyang mga disipulo naglaog sa Jerusalem, asin siring kan kinaugalean ninda, sinda nagduman sa templo, kun saen nagpoon na magtokdo si Jesus. An mga poon na saserdote asin kamagurangan na lalaki kan banwaan, na mayong duwa-duwang nasa isip an ginibo ni Jesus kasuodma tumang sa mga pararibay nin pirak, inangat sia: “Sa anong kapangyarihan mo ginigibo an mga bagay na ini? Asin siisay an nagtao sa saimo kan kapangyarihan na ini?”
Bilang simbag nagsabi si Jesus: “Ako man mahapot sa saindo nin sarong bagay. Kun iyan isabi nindo sa sako, isasabi ko man saindo kun sa anong kapangyarihan ko ginigibo an mga bagay na ini: An bautismo ni Juan, saen guminikan? Sa langit o sa mga tawo?”
An mga saserdote asin kamagurangan na lalaki nagpoon na magpaharapothapot kun paano sinda masimbag. “Kun kita magsabing, ‘Sa langit,’ sia masabi sa sato, ‘Kun siring, tadaw ta dai kamo nagturubod sa saiya?’ Alagad kun kita magsabing, ‘Sa mga tawo,’ nanganganib kita sa kadaklan, huli ta sinda gabos ibinibilang si Juan na propeta.”
Dai aram kan mga namomoon kun ano an isisimbag. Kaya suminimbag sinda ki Jesus: “Dai mi aram.”
Si Jesus nagsabi man: “Dai ko man isasabi sa saindo kun sa anong kapangyarihan ko ginigibo an mga bagay na ini.” Mateo 21:19-27; Marcos 11:19-33; Lucas 20:1-8.
▪ Ano an mahalagang maaraman manongod sa Martes, Nisan 11?
▪ Anong mga leksion an itinao ni Jesus kan papangyarihon niang maalang an higuerra?
▪ Paano sinimbag ni Jesus an mga naghahapot kun sa anong kapangyarihan ginigibo nia an mga bagay?
(Ipagpapadagos sa masunod na luwas.)