An Pinakadakulang Tawo na Nabuhay Kasuarin Pa Man

Kapitulo 111: Tanda kan Huring mga Aldaw

Martes na nin hapon ngonyan. Mantang si Jesus nakatukaw sa Bukid nin mga Olibo, na tinatanaw an templo sa ibaba, si Pedro, Andres, Santiago, asin Juan nagdolok sa saiya na sinda sana. Nahahadit sinda manongod sa templo, huling ihinula pa sana ni Jesus na daing matatada dian na gapo sa ibabaw nin gapo.

Alagad malinaw na igwa pa sindang iniisip sa pagdolok ninda ki Jesus. Nagkapirang semana bago kaini, sia nagtaram dapit sa saiyang “presensia,” na durante kan panahon na iyan “ihahayag an Aki nin tawo.” Asin sa sarong naenot pang pangyayari, isinabi nia sainda an manongod sa “pagtatapos kan palakaw nin mga bagay.” Kaya gustong maghapot asin makaaram an mga apostol.

“Sabihi kami,” an sabi ninda, “noarin mangyayari an mga bagay na ini [na magbubunga kan pagkalaglag kan Jerusalem asin kan templo kaiyan], asin ano an magigin tanda kan saimong presensia asin kan pagtatapos kan palakaw nin mga bagay?” Garo man sana may tolong kabtang an saindang hapot. Enot, boot nindang maaraman an katapusan kan Jerusalem asin kan templo kaiyan, dangan an mapadapit sa presensia ni Jesus na may kapangyarihan sa Kahadean, asin sa katapustapusi an manongod sa katapusan kan bilog na palakaw nin mga bagay.

Sa saiyang halawig na simbag, sinimbag ni Jesus an gabos na tolong kabtang kan hapot. Nagtao sia nin tanda na magpapamidbid kun noarin matatapos an Judiong palakaw nin mga bagay; alagad dakol pa an saiyang itinao. Nagtao man sia nin tanda na magpapatanid sa saiyang magigin mga disipulo tanganing sinda makaaram na sinda nabubuhay na sa panahon kan saiyang presensia asin harani na sa katapusan kan bilog na palakaw nin mga bagay.

Sa pag-agi nin mga taon, naheling kan mga apostol an kaotoban kan hula ni Jesus. Iyo, an mismong mga bagay na ihinula nia nagpoon na maotob sa saindang kaaldawan. Kaya, an mga Kristiano na buhay pa pakalihis nin 37 taon, kan 70 C.E., dai inabotan na dai nakakaaram kan pagkalaglag kan Judiong palakaw kaiba kan templo kaiyan.

Minsan siring, an presensia ni Cristo asin an pagtatapos kan palakaw nin mga bagay dai nangyari kan 70 C.E. An saiyang presensia na may kapangyarihan sa Kahadean haloy pang mangyayari. Alagad noarin? Ihinahayag ini kan paghorophorop sa hula ni Jesus.

Ihinula ni Jesus na magkakaigwa nin “mga ralaban asin mga bareta nin ralaban.” “An nasyon matindog tumang sa nasyon,” an sabi nia, asin magkakaigwa nin mga kakulangan nin kakanon, linog, asin peste. An saiyang mga disipulo ikakaongis asin gagadanon. Malataw an falsong mga propeta asin mandadaya sa dakol. Maorog an katampalasanan, asin malipot an pagkamoot nin dakol. Kadungan kaiyan, an maogmang bareta kan Kahadean nin Dios ihuhulit bilang patotoo sa gabos na nasyon.

Minsan ngani an hula ni Jesus may limitadong kaotoban bago kan pagkalaglag nin Jerusalem kan 70 C.E., an mayor na kaotoban kaiyan mangyayari sa panahon kan saiyang presensia asin kan pagtatapos kan palakaw nin mga bagay. An maingat na pagrepaso sa mga pangyayari sa kinaban poon kan 1914 naghahayag na an makahulogan na hula ni Jesus nagkakaigwa na nin mayor na kaotoban poon kan taon na iyan.

An saro pang kabtang kan tanda na itinao ni Jesus iyo an paglataw kan “makababaldeng bagay na nagpapangyari nin kagabaan.” Kan 66 C.E. an makababaldeng bagay na ini naglataw bilang an “nagkakampong mga hukbo” nin Roma na nagsalikop sa Jerusalem asin rinaot an lanob kan templo. An “makababaldeng bagay” nagtitindog sa lugar na dai maninigong mamugtakan kaiyan.

Sa mayor na kaotoban kan tanda, an makababaldeng bagay iyo an Liga de Naciones asin an kasalihid kaiyan, an Naciones Unidas. An organisasyon na ini para sa pankinaban na katoninongan ibinibilang kan Kakristianohan na kasalihid kan Kahadean nin Dios. Kanigoan kamakababalde! Kaya, pag-abot nin panahon an politikal na mga kapangyarihan na asosyado sa N.U. bibirikon an Kakristianohan (an antitipikong Jerusalem) asin gagabaon iyan.

Kaya ihinula ni Jesus: “Magkakaigwa nin dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.” Minsan ngani an kalaglagan kan Jerusalem kan 70 C.E. tunay na dakulang kahorasaan, na labing sarong milyon an sinasabing ginadan, bako iyan mas dakulang kahorasaan kisa kan panglobong Baha kan kaaldawan ni Noe. Kaya an mayor na kaotoban kan kabtang na ini kan hula ni Jesus maootob pa.

Pananarig Durante kan Huring mga Aldaw

Sa paghinanapos kan Martes, Nisan 11, ipinadagos ni Jesus an saiyang pakikipag-olay sa saiyang mga apostol mapadapit sa tanda kan saiyang presensia na may kapangyarihan sa Kahadean asin kan katapusan kan palakaw nin mga bagay. Pinatanidan nia sinda manongod sa pagsunod sa falsong mga Cristo. Gigibohon an mga pagprobar, an sabi nia, “tanganing mandaya, kun sukat, minsan sa mga pinili.” Alagad, siring sa harayo an pananaw na mga agila, an mga piniling ini magtitiripon kun saen makukua an tunay na espirituwal na kakanon, arin na baga, sa tunay na Cristo sa saiyang dai naheheling na presensia. Dai sinda madadaya asin magtitiripon sa sarong falsong Cristo.

An falsong mga Cristo makakapaheling sana. Sa kabaliktaran, an presensia ni Jesus dai maheheling. Mangyayari iyan durante nin makatatakot na panahon sa kasaysayan nin tawo, arog kan sabi ni Jesus: “An aldaw madiklom, asin an bulan dai matao kan liwanag kaiyan.” Iyo, ini an magigin pinakamadiklom na panahon sa pag-eksister nin katawohan. An mangyayari garo baga an aldaw nagdiklom mantang aldaw pa, asin garo baga an bulan dai nagtao kan liwanag kaiyan sa banggi.

“An mga kapangyarihan kan kalangitan magkakataranyog,” an pagpadagos ni Jesus. Sa siring ipinaririsa nia na may nakakukubhan na maheheling sa pisikal na kalangitan. An kalangitan bako sanang magigin lugar nin mga gamgam, kundi iyan mapapano nin mga eroplanong panguerra, raket, asin mga instrumentong pansiyasat sa espasyo. An takot asin kadahasan makakalabi sa ano man na naeksperyensiahan sa nakaaging kasaysayan nin tawo.

Bilang resulta, sabi ni Jesus, magkakaigwa nin “kahandalan nin mga nasyon, na dai naaaraman an gigibohon huli sa hagobohob kan dagat asin kan mga alon, mantang an mga tawo nalulunosan huli sa takot asin paghalat sa mga bagay na maabot sa ineerokan na daga.” Tunay nanggad, an pinakamadiklom na panahon na ini sa pag-eksister nin tawo masagkod sa panahon na, siring kan sabi ni Jesus, “an tanda kan Aki nin tawo malataw sa langit, dangan an gabos na tribo kan daga mananangis.”

Alagad bakong gabos mananangis ‘pagdatong kan Aki nin tawo na may kapangyarihan’ tanganing laglagon an maraot na palakaw na ini nin mga bagay. An “mga pinili,” an 144,000 na makakaiba ni Cristo sa saiyang langitnon na Kahadean, dai mananangis, ni an saindang kairiba, an mga inapod ni Jesus kaidto na “ibang karnero” nia. Minsan ngani nabubuhay sa pinakamadiklom na panahon sa kasaysayan nin tawo, an mga ini naghihimate sa pagpakosog ni Jesus: “Kun an mga bagay na ini magpoon nang mangyari, tindog kamo nin tanos asin tingagan an saindong mga payo, huli ta an saindong kaligtasan naghaharani na.”

Tanganing madeterminaran kan saiyang mga disipulo na mabubuhay sa panahon kan huring mga aldaw an kaharanihan kan katapusan, itinao ni Jesus an ilustrasyon na ini: “Helinga nindo an higuerra asin an gabos na ibang kahoy: Kun sinda nagsosoli na, sa pagheling kaiyan naaaraman nindo na harani na an tig-initan. Sa paaging ini kamo man, kun maheling na nindong nangyayari an mga bagay na ini, aramon nindo na an kahadean nin Dios harani na. Sa katotoohan ako nagsasabi saindo, An kapag-arakian na ini dai makalilihis sagkod na dai maotob an gabos na bagay.”

Kaya, kun maheling na kan saiyang mga disipulo na naootob an dakol na manlaenlaen na kabtang kan tanda, maninigo nindang saboton na harani na an katapusan kan palakaw nin mga bagay asin na sa dai na mahahaloy paparaon kan Kahadean nin Dios an gabos na karatan. Sa katunayan, an katapusan mangyayari mantang buhay pa an mga tawo na nakaheling sa kaotoban kan gabos na bagay na ihinula ni Jesus! Sinasadol an mga disipulo na mabubuhay sa panahon kan makahulogan na huring mga aldaw, si Jesus nagsabi:

“Mag-ingat kamo sa saindo man sana na an saindong mga puso dai manganaan nin kapasloan asin nin kaburatan asin mga paghadit sa buhay, asin sa panale an aldaw na iyan mag-abot sa saindo na siring sa sarong siod. Huli ta madatong iyan sa gabos na nag-eerok sa ibabaw kan bilog na daga. Kaya magpuka kamo, na sa gabos na panahon nagngangayongayo na magin kamong mapanggana sa pagdulag sa gabos na ining bagay na nakatalagang mangyari, asin sa pagtindog sa atubangan kan Aki nin tawo.”

An Madonong Asin Mangmang na mga Daraga

Sinimbag ni Jesus an pakiolay kan saiyang mga apostol na magtao nin tanda kan saiyang presensia na may kapangyarihan sa Kahadean. Ngonyan nagtao sia nin dugang pang kabtang kan tanda sa tolong parabola, o ilustrasyon.

An kaotoban kan kada ilustrasyon maheheling kan mga mabubuhay sa panahon kan saiyang presensia. Iinintrodusir nia an enot paagi sa mga tataramon na ini: “Sa panahon na iyan an kahadean kan kalangitan magigin kaagid nin sampulong daraga na nagkua kan saindang mga ilawan asin nagruluwas sa pagsabat sa nobyo. An lima sa sainda mangmang, asin an lima madonong.”

Sa ekspresyon na “an kahadean kan kalangitan magigin kaagid nin sampulong daraga,” dai boot sabihon ni Jesus na an kabanga kan mga magmamana kan langitnon na Kahadean mangmang na mga tawo asin an kabanga mga madonong! Dai, kundi boot niang sabihon na may koneksion sa Kahadean kan kalangitan, igwa nin sarong kabtang na arog kaini o arog kaiyan, o na an mga bagay may koneksion sa Kahadean magigin siring kaini o kaiyan.

An sampulong daraga nagsisimbolo sa gabos na Kristiano na nakalinya o naghihingako na nakalinya para sa langitnon na Kahadean. Kaidtong Pentecostes 33 C.E. na an Kristianong kongregasyon ipinanugang ikakasal sa binuhay liwat, pinamuraway na Nobyo, si Jesu-Cristo. Alagad an kasal gigibohon sa langit sa sarong dai isinabing panahon sa ngapit.

Sa ilustrasyon, an sampulong daraga nagluwas sa katuyohan na sabaton an nobyo asin umiba sa prosesyon sa kasal. Pag-abot nia, iilawan ninda kan saindang mga ilawan an aagihan kan prosesyon, sa siring tinatawan sia nin onra mantang dinadara nia an saiyang nobya sa harong na inandam para sa saiya. Alagad, si Jesus nagpaliwanag: “An mga mangmang nagkurua kan saindang mga ilawan alagad dai nagbalon nin lana, mantang an mga madonong nagbalon nin lana sa saindang mga lalagan kaiba kan saindang mga ilawan. Mantang nag-aatraso an nobyo, sinda gabos nagtungka asin natorog.”

An luminawig na pagkaatraso kan nobyo nagpaparisa na an presensia ni Cristo bilang namamahalang Hade sa haloy pang ngapit. Sa katapustapusi nagtukaw sia sa saiyang trono kan taon 1914. Durante kan halawig na banggi bago kaiyan, an gabos na daraga nakatorog. Alagad dai sinda kinondenar huli kaini. Kinondenar an mangmang na mga daraga dahelan sa dai ninda pagkaigwa nin lana para sa saindang mga lalagan. Ipinaliwanag ni Jesus kun paano nagmata an mga daraga bago nag-abot an nobyo: “Kaidtong matanga na an banggi may nagkurahaw, ‘Uya na an nobyo! Paduman na kamo sa pagsabat sa saiya.’ Dangan an gabos na daraga nagbuhat asin inandam an saindang mga ilawan. An mga mangmang nagsabi sa mga madonong, ‘Tawe man kami kan saindong lana, ta mapaparong na an samong ilawan.’ An mga madonong nagsimbag paagi sa mga tataramon na, ‘Tibaad magkulang para sa samo asin sa saindo. Marahay pang pumaduman kamo sa mga nagtitinda kaiyan asin bumakal kan para sa saindo.’”

An lana nagsisimbolo sa sarong bagay na nagpapadanay sa tunay na mga Kristiano na magliwanag bilang mga ilaw. Ini an ipinasabong na Tataramon nin Dios, na pinangangaptan nin marigon kan mga Kristiano, kaiba an banal na espiritu, na nagtatabang sainda na masabotan an Tataramon na iyan. An espirituwal na lana nagpapangyari sa madonong na mga daraga na magtao nin liwanag sa pagsabat sa nobyo durante kan prosesyon pasiring sa punsion sa kasal. Alagad an grupong mangmang na daraga mayo sa sainda man sana, sa saindang mga lalagan, kan kinakaipuhan na espirituwal na lana. Kaya ilinadawan ni Jesus an nangyari:

“Mantang paduman [an mangmang na mga daraga] sa pagbakal [nin lana], nagdatong an nobyo, asin an mga daragang andam naglaog kaiba nia sa punsion sa kasal; asin pininto an tata. Pagkatapos an ibang daraga nagdatong man, na an sabi, ‘Ginoo, ginoo, bukasi kami!’ Sa pagsimbag sia nagsabi, ‘Sinasabi ko saindo an katotoohan, Dai ko kamo midbid.’”

Pagdatong ni Cristo sa saiyang langitnon na Kahadean, an grupong madonong na daraga na kompuwesto nin tunay na linahidan na mga Kristiano nagmata sa saindang pribilehiyo na pagtao nin liwanag sa nagdiklom na kinaban na ini bilang pag-omaw sa nagbalik nang Nobyo. Alagad an mga ilinaladawan kan mangmang na mga daraga bakong andam sa pagtao kan pag-omaw na ini bilang pagsabat. Kaya pag-abot kan panahon, dai binuksan sa sainda ni Cristo an tata para sa punsion sa kasal sa langit. Binayaan nia sinda sa luwas sa kadikloman kan kamatangaan na banggi sa kinaban, tanganing mapara kaiba kan gabos na iba pang mga paragibo nin katampalasanan. “Kaya magpuka kamo,” an pagtapos ni Jesus, “huli ta dai nindo naaaraman an aldaw ni an oras.”

An Ilustrasyon Dapit sa mga Talento

Ipinagpadagos ni Jesus an pakikipag-olay nia sa saiyang mga apostol sa Bukid nin mga Olibo paagi sa pagsaysay sainda nin saro pang ilustrasyon, an ikaduwa sa serye na may tolong kabtang. Nagkapirang aldaw bago kaini, mantang sia nasa Jerico, itinao nia an ilustrasyon dapit sa mga mina tanganing ipaheling na haloy pa an Kahadean. An ilustrasyon na isinasaysay nia ngonyan, minsan ngani may nagkapirang magkaparehong kabtang, naglaladawan sa kaotoban kaiyan nin mga aktibidad sa panahon kan presensia ni Cristo na may kapangyarihan sa Kahadean. Iiniilustrar kaiyan na an saiyang mga disipulo dapat na magtrabaho mantang yaon pa digdi sa daga tanganing padakolon “an saiyang mga rogaring.”

Si Jesus nagpoon: “Huli ta iyan [an boot sabihon, mga kamugtakan na konektado sa Kahadean] garo man sana kun an sarong tawo, na mapaduman sa harayong daga, nag-apod kan saiyang mga oripon asin ipinaniwala sa sainda an saiyang mga rogaring.” Si Jesus iyo an tawo na, bago nagduman sa langit, ipinaniwala sa saiyang mga oripon​—mga disipulo na nakalinya para sa langitnon na Kahadean—​an saiyang mga rogaring. An mga rogaring na ini bakong literal na mga pagsasadiri, kundi iyan nagrerepresentar sa sarong kinultibar na oma na binugtakan nia nin potensial na magpaluwas nin dakol pang disipulo.

Ipinaniwala ni Jesus an saiyang mga rogaring sa saiyang mga oripon dai nahaloy bago nagsakat sa langit. Paano nia ginibo iyan? Paagi sa pagboot sa sainda na magpadagos sa pagtrabaho sa kinultibar na oma paagi sa paghuhulit kan mensahe kan Kahadean sagkod sa pinakaharayong mga parte kan daga. Siring kan sabi ni Jesus: “Sa saro sia nagtao nin limang talento, sa saro nin duwa, sa saro pa nin saro, sa lambang saro sono sa saiyang kakayahan, asin sia naghale.”

An walong talento​—an mga rogaring ni Cristo—​kun siring iwinaras sono sa mga abilidad, o espirituwal na mga kakayahan, kan mga oripon. An mga oripon nagrerepresentar sa mga grupo nin mga disipulo. Kan enot na siglo, an grupo na nag-ako kan limang talento malinaw na kabale an mga apostol. Si Jesus padagos sa pagsaysay na an mga oripon na nag-ako kan lima asin kan duwang talento pareho dinoble iyan paagi sa paghuhulit ninda kan Kahadean asin paggibo nin mga disipulo. Minsan siring, an oripon na nag-ako kan sarong talento itinago iyan sa daga.

“Pakalihis nin haloy na panahon,” an pagpadagos ni Jesus, “an kagurangnan kan mga oripon na idto nagdatong asin nakipagkuwenta sa sainda.” Pag-abot sana kan ika-20 siglo, pakalihis nin mga 1,900 na taon, na si Cristo nagbalik tanganing makipagkuwenta, kaya idto, sa totoo, “pakalihis nin haloy na panahon.” Dangan ipinaliwanag ni Jesus:

“An nag-ako nin limang talento uminatubang asin nagdara nin lima pang talento, na an sabi, ‘Kagurangnan, limang talento an ipinaniwala mo sa sako; uya, napatubuan ko nin lima pang talento.’ An saiyang kagurangnan nagsabi sa saiya, ‘Marahay na gibo, marahay asin maimbod na oripon! Nagin maimbod ka sa pira sanang bagay. Ipaniniwala ko sa saimo an dakol na bagay. Lumaog ka sa kagayagayahan kan saimong kagurangnan.’” An oripon na nag-ako nin duwang talento dinoble man an saiyang mga talento, asin nag-ako sia nin kaparehong komendasyon asin balos.

Minsan siring, paano an maimbod na mga oripon na ini minalaog sa kagayagayahan kan saindang Kagurangnan? Bueno, an kagayagayahan kan saindang Kagurangnan, si Jesu-Cristo, iyo an pag-ako na mapasaiya an Kahadean kan sia magduman sa saiyang Ama sa langit. Kun manongod sa maimbod na mga oripon sa modernong mga panahon, igwa sinda nin dakulang kagayagayahan sa pagigin pinaniwalaan nin dugang pang mga paninimbagan sa Kahadean, asin kun matapos na ninda an saindang daganon na buhay, mapapasainda an kulminasyon na kagayagayahan na buhayon liwat sa langitnon na Kahadean. Alagad kumusta an ikatolong oripon?

“Kagurangnan, midbid taka bilang tawong estrikto,” an reklamo kan oripon na ini. “Kaya ako natakot asin naghale patin itinago an saimong talento sa daga. Uya na an sadiri mo.” An oripon tuyong nagsayuma na magtrabaho sa kinultibar na oma paagi sa paghuhulit asin paggibo nin mga disipulo. Kaya inapod sia kan Kagurangnan na “maraot asin hugakon” asin ipinahayag an paghokom: “Kuana nindo sa saiya an talento . . . Asin tapokan nindo an oripon na daing kamanungdanan sa kadikloman sa luwas. Dian an saiyang pagtangis asin an pagragot nin saiyang mga ngipon.” An mga kabilang sa grupong maraot na oripon na ini, na iinaapon sa luwas, dai nagkakamit nin ano man na espirituwal na kagayagayahan.

Nagtatao ini nin solemneng leksion para sa gabos na naghihingakong parasunod ni Cristo. Kun boot nindang kamtan an saiyang komendasyon asin balos, asin makalikay na iapon sa kadikloman sa luwas asin sa kalaglagan sa katapustapusi, dapat sindang magtrabaho sa pagpaoswag kan mga rogaring kan saindang langitnon na Kagurangnan paagi sa pagkaigwa nin lubos na pakikikabtang sa paghuhulit. Mahigos daw kamo sa bagay na ini?

Kun si Cristo Dumatong Na na May Kapangyarihan sa Kahadean

Si Jesus nasa kaibanan pa kan saiyang mga apostol sa Bukid nin mga Olibo. Bilang simbag sa saindang hinahagad na tanda kan saiyang presensia asin kan pagtatapos kan palakaw nin mga bagay, isinaysay nia ngonyan sainda an ultimo sa serye nin tolong ilustrasyon. “Kun an Aki nin tawo dumatong na sa saiyang kamurawayan, asin an gabos na anghel kaibanan nia,” an pagpoon ni Jesus, “dangan sia matukaw sa saiyang mamurawayon na trono.”

Dai puwedeng maheling nin mga tawo an mga anghel sa saindang langitnon na kamurawayan. Kaya an pagdatong kan Aki nin tawo, si Jesu-Cristo, kaiba kan mga anghel siertong dai maheheling kan mga mata nin tawo. An pagdatong nangyari kan taon 1914. Alagad para sa anong katuyohan? Ipinaliwanag ni Jesus: “An gabos na nasyon titiponon sa atubangan nia, asin pagbubulagbulagon nia an mga tawo, kun paanong ibinubulag nin pastor an karnero hale sa mga kanding. Asin ibubugtak nia an mga karnero sa saiyang too, alagad an mga kanding sa saiyang wala.”

Ilinaladawan an mangyayari sa mga ibinulag pasiring sa inooyonan na kampi, si Jesus nagsabi: “Dangan an hade masabi sa mga yaon sa saiyang too, ‘Madia, kamong mga binendisyonan kan sakong Ama, manaha nindo an kahadean na inandam para sa saindo poon pa kan lalangon an kinaban.’” An mga karnero sa ilustrasyon na ini dai maghahade sa kaibanan ni Cristo sa langit kundi magmamana kan Kahadean sa sentido na pagigin daganon na mga sakop kaiyan. An ‘paglalang sa kinaban’ nangyari kan si Adan asin Eva nagpaluwas nin mga aki na puwedeng makinabang sa probisyon nin Dios na balukaton an katawohan.

Alagad taano an mga karnero ta ibinubulag pasiring sa may pag-oyon na too kan Hade? “Huli ta ako nagutom,” an simbag kan hade, “asin pinakakan nindo ako; napaha ako asin pinainom nindo ako. Estranghero ako asin inistimar nindo ako; huba, asin ginubingan nindo ako. Naghelang ako asin inataman nindo ako. Nabilanggo ako asin dinumanan nindo ako.”

Mantang an mga karnero yaon digdi sa daga, boot nindang maaraman kun paano ninda nagibo an marahay na mga gibong iyan para sa saindang langitnon na Hade. “Kagurangnan, kasuarin mi ika naheling na nagugutom asin pinakakan ka,” an hapot ninda, “o paha, asin pinainom ka? Kasuarin mi ika naheling na estranghero asin inistimar ka, o huba, asin ginubingan ka? Kasuarin mi ika naheling na naghehelang o nabibilanggo asin dinumanan ka?”

“Sa katotoohan sinasabi ko sa saindo,” an simbag kan Hade, “huli ta ginibo nindo iyan sa saro sa pinakasadangoton kan sakong mga tugang, ginibo nindo iyan sa sako.” An mga tugang ni Cristo iyo an mga nawawalat pa digdi sa daga kan 144,000 na maghahade sa kaibanan nia sa langit. Asin an paggibo nin karahayan sa sainda, sabi ni Jesus, pareho man sana kan paggibo nin karahayan sa saiya.

Sunod, kinaolay kan Hade an mga kanding. “Rumayo kamo sa sako, kamong mga isinumpa, pasiring sa daing katapusan na kalayo na inandam para sa Diablo asin sa saiyang mga anghel. Huli ta ako nagutom, alagad ta dai nindo ako pinakakan, asin ako napaha, alagad ta dai nindo ako pinainom. Estranghero ako, alagad ta dai nindo ako inistimar; huba, alagad ta dai nindo ako ginubingan; naghelang asin nabilanggo, alagad ta dai nindo ako inataman.”

Alagad, nagreklamo an mga kanding: “Kagurangnan, kasuarin mi ika naheling na nagugutom o napapaha o estranghero o huba o naghehelang o nabibilanggo asin dai mi ika pinaglingkodan?” An mga kanding sinilotan sa iyo man sanang basihan na an mga karnero inoyonan. “Mantang dai nindo iyan ginibo sa saro kan mga sadangoton na ini [kan sakong mga tugang],” an simbag ni Jesus, “dai nindo iyan ginibo sa sako.”

Kaya an presensia ni Cristo na may kapangyarihan sa Kahadean, bago kan katapusan kan maraot na palakaw na ini nin mga bagay sa dakulang kahorasaan, magigin panahon nin paghokom. An mga kanding “maduman sa pagkaparang daing katapusan, alagad an mga matanos [an mga karnero] sa buhay na daing katapusan.” Mateo 24:2–25:46; 13:​40, 49; Marcos 13:​3-37; Lucas 21:​7-36; 19:​43, 44; 17:​20-30; 2 Timoteo 3:​1-5; Juan 10:16; Kapahayagan 14:​1-3.

▪ Ano an dahelan kan paghapot kan mga apostol, alagad malinaw na ano pa an saindang iniisip?

▪ Anong kabtang kan hula ni Jesus an naotob kan 70 C.E., alagad ano an dai nangyari kan panahon na idto?

▪ Kasuarin nagkaigwa nin enot na kaotoban an hula ni Jesus, alagad noarin iyan magkakaigwa nin mayor na kaotoban?

▪ Ano an makababaldeng bagay sa enot asin ultimong kaotoban kaiyan?

▪ Taano an dakulang kahorasaan ta dai nagkaigwa kan pangultimong kaotoban kaiyan kan malaglag an Jerusalem?

▪ Anong mga kamugtakan sa kinaban an nagtatanda sa presensia ni Cristo?

▪ Noarin “an gabos na tribo kan daga mananangis,” alagad ano an gigibohon kan mga parasunod ni Cristo?

▪ Anong ilustrasyon an itinao ni Jesus tanganing tabangan an saiyang magigin mga disipulo na makamansay kun harani na an katapusan?

▪ Anong sadol an itinao ni Jesus para sa mga kabilang sa saiyang mga disipulo na mabubuhay sa panahon kan huring mga aldaw?

▪ Sairisay an isinisimbolo kan sampulong daraga?

▪ Kasuarin an Kristianong kongregasyon ipinanugang ikakasal sa nobyo, alagad noarin madatong an nobyo tanganing darahon an saiyang nobya sa punsion sa kasal?

▪ Ano an irinirepresentar kan lana, asin an pagkaigwa kaiyan pinapangyari an madonong na mga daraga na gibohon an ano?

▪ Saen mangyayari an punsion sa kasal?

▪ Anong mamuraway na balos an dai nakamtan kan mangmang na mga daraga, asin ano an kaaabtan ninda?

▪ Anong leksion an itinotokdo kan ilustrasyon dapit sa mga talento?

▪ Sairisay an mga oripon, asin ano an mga rogaring na ipinaniwala sa sainda?

▪ Kasuarin nagdatong an kagurangnan tanganing makipagkuwenta, asin ano an nanompongan nia?

▪ Ano an kagayagayahan na linaogan kan maimbod na mga oripon, asin ano an nangyari sa ikatolong oripon, an maraot na saro?

▪ Taano ta siertong dai maheheling an presensia ni Cristo, asin ano an gigibohon nia sa panahon na iyan?

▪ Sa anong sentido na an mga karnero magmamana kan Kahadean?

▪ Kasuarin nangyari an ‘paglalang sa kinaban’?

▪ Sa anong basihan hinohokoman an mga tawo magsalang bilang mga karnero o bilang mga kanding?

(Ipagpapadagos sa masunod na luwas.)