Kagayagayahan na Natatagama Para sa mga Nakakanompong kan Katotoohan

SA SAIYANG kuwarto sa ibabaw kan kisame, nakua nin sarong Finlandes an librong The Divine Plan of the Ages. Pinonan nia tolos na basahon iyan, asin dai nahaloy sia nagsabi sa saiyang sadiri, ‘Iyo ini an katotoohan; iyo ini an katotoohan.’ Paghilig nia hale sa kuwarto sa ibabaw kan kisame, sinabihan nia an saiyang agom, “Nanompongan ko na an tunay na relihiyon.”

An eksperyensiang ini pambihira sa paagi na nanompongan kan lalaking ini an katotoohan, pero dakol sa mga Saksi ni Jehova an makakasaysay nin kaagid na reaksion. Sinda gabos makakaestorya sa saindo kan kagayagayahan na nakakamtan sa pakanompong kan katotoohan. Itinatampok ini kan minasunod na eksperyensia.

An Tunay na mga Katokdoan sa Biblia Nagtatao nin Kagayagayahan

Si Margarita Königer nagdakula sa Munich, Alemania, durante kan Guerra Mundial II. Parateng maheheling an binomba asin nasosolong mga harong. An matua niang tugang na lalaki nagadan sa guerra. Mantang nagsisimba sia sa simbahan na Katoliko, nakadangog sia nin mga pamibi para sa mga soldados na Aleman asin sa führer, si Hitler. Pakatapos kan guerra, nakaresibi sia nin tabang para sa libreng pag-eskuwela sa sarong kolehiyo sa Estados Unidos bilang kabtang kan programa sa pagbinalyohan nin mga estudyante. Nanompongan nia na an mga tawo makikatood sa saiya, kaya inisip-isip nia kun ano an garo nagtutulod sa mga tawo, na an natural na pagmawot mabuhay sa katoninongan, na dai magtiwala asin kaongisan an lambang saro sa panahon nin guerra. Pagbalik sa Munich, nanompongan sia kan mga Saksi ni Jehova, asin paagi sa pag-adal sa Biblia kaiba ninda, nanompongan nia an mga simbag sa saiyang mga hapot. Sia nagsabi: “Ipinaheling sa sako hale sa Biblia na kalabot an mga puwersa nin maraot na espiritu . . . Inaapod sinda kan Biblia na ‘mga poon sa kinaban,’ asin, an totoo, sinasabi kaiyan na si Satanas ‘nandadaya sa bilog na ineerokan na daga.’ . . . Kun hehelingon an maraot, sa diablong mga gawe nin mga nasyon asin banwaan, kanigoan kamakatanosan asin kanakakokontento kan simbag na ini!”​—Efeso 6:12; Kapahayagan 12:9.

Si Margarita nagpapadagos: “Nagtao sako nin dakulang kagayagayahan na manodan an dapit sa probisyon nin Dios sa pagresolber sa mga problema sa daga. Dai, bako iyan paagi sa ideolohiya o administrasyon nin tawo, siring sa ipinoproponer nin mga edukador sa kinaban. Imbes, ipinaheheling kan Biblia na sarong bagong langitnon na gobyerno an madirehir sa mga aktibidad sa daga. . . . Tinokdoan ni Jesu-Cristo an saiyang mga parasunod na mamibi: ‘Dumatong logod an kahadean mo.’ . . . Nagpoon akong makasabot na an kahadean na ini sarong tunay na gobyerno asin na solamente paagi kaiyan na makakamit an tunay, pambilog na kinaban na katoninongan.” Durante nin haros 30 taon, si Margarita naglilingkod bilang misyonera sa mga limang nasyon sa Aprika​—na an huring 19 taon ginamit sa pagbalangibog kan katotoohan sa mapakumbabang mga taga-Ouagadougou, Burkina Faso.

An eksperyensia ni Margarita dai nasosolo. Dakol an arog man kaiyan kapositibo an reaksion kan saindang madiskobre na an klero nin Kakristianohan sa man-ibong-ibong na lado kan ralaban namimibi sa Dios para sa kapangganahan. Naheheling kan mga sadiosan an puso an pagigin makatanosan kan paliwanag kan Biblia na an Dios mayo nin kabtang sa mga guerra nin tawo kundi na an mga ini nangyayari huli ta “an bilog na kinaban namumugtak sa kapangyarihan kan maraot.” Nanonodan kan mga naghahanap na ini sa katotoohan na an tunay na mga Kristiano dapat na “bakong kabtang kan kinaban” kundi dapat na magdanay na neutral sa mga gibo-gibo kaiyan. Huling namimidbid na iyan an nagin paninindogan kan mga Saksi ni Jehova, an bagong mga interesadong ini nagin kombensido na nanompongan na ninda an katotoohan. An mga iyan nagtatalubo sa paglaom asin kagayagayahan mantang nagkakamit sinda nin nadugangan na kaaraman mapadapit sa kun taano ta tinotogotan nin Dios an karatan asin kun paano na sa dai na mahahaloy papangyayarihon nia an katoninongan asin matanos na mga kamugtakan digdi sa daga paagi sa saiyang Kahadean.​—1 Juan 5:19; Juan 17:16; Mateo 6:​9, 10.

An Tunay na mga Prinsipyo sa Biblia Nagtatao nin Kagayagayahan

Si Daniel Rosero na taga-Ecuador naghona na an buhay daing kahulogan, kaya nagpoon siang magburat. An iglesya na saiyang sinisimbahan tinokdoan sia na an solamenteng bagay na malalaoman nia iyo an kagadanan asin nagkakalayong impierno. Sia nagsimbag, “Masosolo ako, kaya pabayae nindo akong magburat!” May pamilya sia na walo an miembro na dai nia sinusustentohan kan pangangaipo, asin parate siang nakikipag-iwal sa saiyang agom, si Delia. An pangyayari na nagbunga nin dakulang pagkaliwat nag-abot sarong Domingong aga kan sinda songkoon kan mga Saksi ni Jehova asin nagpoon na mag-adal sa Biblia. Kan primero na si Daniel nag-atender sa sarong pansirkitong asamblea kan mga Saksi ni Jehova, narealisar nia na saiya nang nanompongan an katotoohan. Sia nagsabi: “Biyo akong nagngalas sa organisasyon. An mga tawo maogmang nag-iiribaiba, kadakol sinda. Mamamatean mo an pagkamoot sa tahaw kan kadaklan. Mayo ni saro na nagsisigarilyo. Mayo nin usmak na tataramon. . . . Nagirumdoman ko na an naisipan ko, ‘Iyo ini an katotoohan!’ Bakong an pagkatakot sa kagadanan o pagkatakot sa katapusan kan kinaban an nagpahiro sako. Iyan an kalinigan kan organisasyon.”

An bilog na pamilya nin Rosero nagin mga Saksi ni Jehova. An saindang buhay pampamilya asin an saindang situwasyon sa pagbuhay nagrahay mantang iinaaplikar ninda an mga prinsipyo sa Biblia. Si Delia Rosero nagsabi: “Aram nindo utang ko iyan gabos sa katotoohan kan Biblia. Siisay an nakakaaram kun napasaen na an sakong mga aki kun mayo an Tataramon nin Dios? Sinda gabos na pito bautisado na asin marigon. An katotoohan nangahulogan nin sarong biyong bagong buhay, bagong kaogmahan, para sa sako.”

An eksperyensia kan pamilya nin Rosero dai nasosolo. Dakol sa satong kaaldawan an riniribok nin mga problema. An sarong dahelan iyo na an moral na mga pamantayan na itinatao kan Biblia sa pankagabsan dai na iginagalang, arog kan paggalang nin nakaaging mga kapag-arakian. An kadaklan na relihiyon sinunod an usong ini, magsalang huli sa pagkonsinte o huli ta naghohona sinda na sa pagbago nin panahon an dating mga gawe sa moral bako nang uso. Kaya, arog kan iba, an mga Rosero pinabayaan na magkapkap na mayo kan paggiya kan Biblia. Alagad, kun an siring na mapakumbabang mga tawo makasabot kan punto-de-vista nin Dios dapit sa moral asin buhay pampamilya, mayong pag-atraso na iinaaplikar ninda an saindang nanonodan. Sa saindang mga estorya maheheling niato an marahay na mga resulta kan paggibo kaiyan.

An Kagayagayahan Dapat na Pataluboon

Alagad dai boot sabihon kaini na an sarong Kristiano danay na marahay an pagmate. Malinaw nanggad, an mga kasakitan na sa pankagabsan inaatubang nin mga tawo, arog baga kan kadaihan nin trabaho, helang, asin kagadanan, nakakaapektar man sa mga Kristiano. An mga Kristiano kaipuhan man na padagos na makilaban tumang sa sainda mismong mga pagkabakong sangkap asin kaluyahan. An tala sa Biblia nagsasabi na si Lot “napupurisaw na gayo kan pagpangana sa kalaswaan kan mga parakasala” sa siudad nin Sodoma. Dai malilikayan kan maimbod na mga Kristiano an kaagid na mga saboot kun naheheling ninda na nagpapadagos an maraot na mga kamugtakan.​—2 Pedro 2:​7, 8.

Alagad, an mga nakanompong kan katotoohan igwa nin bentaha. Halimbawa, an sarong may pagtubod na ipinagmomondo an saro na nagadan dai kaipuhan na “magmondo siring kan iba na dai nin paglaom.” An saiyang pagmondo bakong daing katapusan. Totoo man ini mapadapit sa iba pang problema. An saro na nakanompong kan katotoohan nakakaaram na an mga kasakitan sa presente temporaryo sana. Pinapapasil kan paglaom na magtagal kun nasa kasakitan. An timbang na estilo nin buhay nakakatabang man.​—1 Tesalonica 4:13.

Itinao ni Pablo an sadol na ini sa mga Kristiano: “Danay kamong maggayagaya dian sa Kagurangnan. Sa giraray sasabihon ko, Maggayagaya kamo!” (Filipos 4:4) Ipinaheheling kaini na mantang an kagayagayahan puwedeng makamtan niato gabos, posible man na dai kita magkaigwa kaiyan. An mga kahaditan sa daan na palakaw na ini nin mga bagay puwedeng magin olang. Dugang pa, an Biblia nagsasabi sato na kaipuhan niatong pataluboon an kagayagayahan, na saro sa mga bunga kan espiritu nin Dios. (Galacia 5:22) Kun kamo padagos na magkua nin kaaraman dapit sa katotoohan asin pagirumdomon an saindong sadiri dapit sa espirituwal na mga kayamanan na itinao kaiyan asin padagos pang itinatao, an saindong kagayagayahan dai mawawara. Iyan magigin mas makosog mantang kita nagdadangadang sa panahon na “papahidon [nin Dios] an gabos na luha” sa mga mata kan mga tawo asin na ni an “pagmondo ni an pagtangis ni kolog” yaon pa.​—Kapahayagan 21:4.

[Mga retrato sa pahina 8]

Dakol an naghahanga sa kagayagayahan asin marahay na pagkaorganisar sa mga asamblea kan mga Saksi ni Jehova