“Pagtinda nin Asin” sa Mozambique

SI Francisco Coana, sarong miembro kan komite kan nasyon sa Mozambique, nagsampulong taon sa “mga kampo sa pag-edukar liwat.” Isinasaysay nia an saiyang eksperyensia: “Aram ko na mahahaloyhaloy kami digdi, kaya hinapot ko an paraataman sa sirkito kun puwede akong magpadagos bilang regular payunir. Pero paano ako makakapagdusay nin igong panahon sa ministeryo sa publiko, mantang an haros gabos sa mga kampo saro sa mga Saksi ni Jehova? Sinabi ko na maduman ako sa Milange, sarong banwaan na 47 kilometros an rayo, tanganing humanap nin mga tawong huhulitan.

“Minsan ngani dai kami opisyal na tinogotan na humale sa kampo, an susundon na ini dai estriktong ipinaootob. Nagigirumdoman ko an pagduman sa kadlagan, paghuruhod, asin pamimibi na makakua ako nin paagi na makapaghulit sa mga tagaduman. Dai nahaloy nagsimbag si Jehova.

“May nakaolay akong sarong lalaki na may sadiring bisekleta, asin nakipagkondisyon ako sa saiya. Uminoyon sia na kun kukultibaron ko an saiyang haros sarong ektaryang daga bago mag-abot an tig-oran, ibabayad nia sako an saiyang bisekleta. Kaya ginamit ko an kada aga sa pagkultibar sa saiyang mga oma. Binendisyonan ni Jehova an areglong ini, huli ta sa katapustapusi nagkaigwa ako nin sakong bisekleta.

“An resulta iyo na nahimo kong makaduman sa dakulang banwaan nin Milange asin epektibong ipagpadagos an sakong pagpapayunir sa mabungang omang ini. Huling ipinangangalad an samong gibohon, kaipuhan kong umimbento nin plano tanganing ikaintrodusir sa mga tawo an katotoohan. Nakasusu an mga libro asin magasin sa irarom kan sakong polo, nagdara ako nin asin sa bag asin naglibot na nagtitinda nin asin. Imbes na ipabakal iyan sa kantidad na 5 meticais, 15 meticais an presyo ko. (Kun iyan baratohon, babakalon iyan gabos kan mga tawo, asin mawawaran na ako nin asin na gagamiton sa paghuhulit!) An sakong mga pakikipag-olay arog kaini:

“‘Marahay na aldaw! Nagtitinda ako nin asin ngonyan.’

“‘Gurano?’

“‘Kinse meticais.’

“‘Habo ko, habo ko. Mahalon man iyan na marhay!’

“‘Iyo, oyon ako na mahalon iyan. Pero kun sa paghona nindo mahalon ini ngonyan, maghalat sana kamo nin kadikit huli ta iyan orog pang magigin mahal sa maabot. Aram daw nindo na ihinula ini sa Biblia?’

“‘Nungka kong nabasa iyan sa sakong Biblia.’

“‘Iyo, yaon iyan dian. Kuana an Biblia nindo, ipapaheling ko sa saindo.’

“Paagi kaiyan magpapadagos an orolay na ginagamit an saiyang Biblia, kaya an Biblia ko nakasusu pa giraray sa irarom kan sakong polo. Sasambiton ko an Kapahayagan kapitulo 6, na mapadapit sa delikadong mga kamugtakan asin kakulangan nin kakanon. Kun marisa kong marahay an pag-ako, iluluwas ko An Katotoohan na Minagiya Pasiring sa Buhay na Daing Sagkod o an Good News to Make You Happy asin poponan an pormal na pag-adal sa Biblia.

“An resulta iyo na nakapoon ako nin sarong grupo na may 15 interesado sa Milange. Pero dai nahaloy naaraman kan mga autoridad an samong aktibidad. Sarong aldaw mantang nagkokondukta ako nin pag-adal sa Biblia, biglang luminaog an mga pulis asin inaresto kami. Kami gabos, kabale an saradit na aki kan pamilya, dinara sa lokal na bilanggoan. Pakalihis nin sarong bulan duman, kami gabos ibinalik giraray sa kampo.”

An mga eksperyensiang ini dai nakapaluya sa kaigotan kan satong mga tugang. Sa kabaliktaran, si Francisco asin an saiyang pamilya, kaiba an rinibo nindang tugang na nasa mga kampo, ngonyan nagsasamba asin naghuhulit sa irarom nin mga kamugtakan na may katalingkasan sa Mozambique.