An Pinakadakulang Tawo na Nabuhay Kasuarin Pa Man

Kapitulo 123: “Uya! An Tawo!”

Naghanga sa iginawe ni Jesus asin nakakaaram na dai sia nin sala, si Pilato naghanap nin saro pang paagi tanganing butasan sia. “Igwa kamo nin kaugalean,” an sabi nia sa mga kadaklan, “na ako maninigong magbutas sa saindo nin sarong tawo sa paskua.”

Si Barrabas, sarong bantog na paragadan, nabibilanggo man, kaya si Pilato naghapot: “Siisay an boot nindong butasan ko sa saindo, si Barrabas o si Jesus na iyo daa an Cristo?”

Nakombensir kan mga poon na saserdote na nag-agyat sa sainda, hinagad kan banwaan na butasan si Barrabas alagad gadanon si Jesus. Dai minaontok, si Pilato nagsimbag, na naghahapot liwat: “Arin sa duwa an boot nindong butasan ko sa saindo?”

“Si Barrabas,” an ikinurahaw ninda.

“Ano, kun siring, an gigibohon ko ki Jesus na iyo daa an Cristo?” an hapot ni Pilato na pinanluluyahan nin boot.

Paagi sa sarong makosogon na kurahaw, sinda nagsimbag: “Ipako sia!” “Ipako! Ipako sia!”

Nakakaaram na hinahagad ninda an kagadanan nin sarong tawong daing sala, si Pilato nakiolay: “Tadaw, anong maraot an ginibo kan tawong ini? Dai akong nakuang ano man sa saiya na maninigo sa kagadanan; kaya papadusahan ko sia asin bubutasan sia.”

Sa ibong kan saiyang mga pagprobar, an anggot na kadaklan, na sinutsutan kan saindang mga namomoon sa relihiyon, padagos na nagkukurahaw: “Ipako sia!” Huling rinungaw kan mga saserdote, dugo an gusto kan kadaklan. Asin kun iisipon, limang aldaw sana bago kaini, an iba sa sainda posibleng kabale sa mga nagsabat ki Jesus palaog sa Jerusalem bilang Hade! Mientras tanto, an mga disipulo ni Jesus, kun yaon sinda, nagdadanay na daing girong asin dai nagpaparisa.

Si Pilato, kan maheling na an saiyang mga pakiolay dai nag-aaser kundi, imbes, nagbabangon an pagkariribok, nagkua nin tubig asin naghanaw kan saiyang kamot sa atubangan kan kadaklan, asin nagsabi: “Dai ako nin kasalan sa dugo kan tawong ini. Kamo na mismo an bahala kaiyan.” Huli kaiyan, an banwaan nagsimbag: “An saiyang dugo mapasamuya asin sa samong mga aki.”

Kaya, sono sa mga kahagadan ninda​—asin nagmamawot na mas panigoan an kadaklan imbes na gibohon an aram niang tama—​binutasan ni Pilato sa sainda si Barrabas. Kinua nia si Jesus asin pinahubaan dangan ipinahampak. Bako ining ordinaryong paglatigo. An The Journal of the American Medical Association ilinaladawan an ugale nin paghampak sa Roma:

“An parateng instrumento sarong halipot na latigo (flagrum o flagellum) na may nagkapirang nagsosolo o sinalapid na haralabang pidaso nin anit na manlaenlaen an laba, na orooltan na nabubugkos an saradit na bilog na batbat o matarom na mga pidaso nin tolang nin karnero. . . . Mantang an mga soldados na Romano paorootrong pinaghahampak an likod kan biktima na may biyong puwersa, an birilog na batbat nagkacausa nin hararom na mga lanog, asin an haralabang pidaso nin anit asin mga tolang nin karnero nakakalugad sa kublit asin laman sa irarom kaiyan. Dangan, mantang nagpapadagos an paghampak, an mga lugad minataros sagkod sa irarom na mga kalamnan kan tolang asin nagkacausa nin nagkukubogkubog na rulugad nang nagdudugong laman.”

Pakatapos kan makologon na paghampak na ini, si Jesus dinara sa palasyo kan gobernador, asin tiniripon an gabos na tropa nin mga soldados. Duman padagos siang inabuso kan mga soldados paagi sa pagsalapid nin sarong koronang tonok asin pagsulot kaiyan sa saiyang payo. Binugtakan ninda nin gaho an saiyang toong kamot, asin sinulotan sia ninda nin gubing na purpura, an klase na isinusulot nin mahal na mga tawo. Dangan mapan-olog-olog sindang nagsabi sa saiya: “Marahay na aldaw, Hade nin mga Judio!” Siring man, linutaban sia ninda asin tinaplong sia. Kinukua an masarig na gaho sa saiyang kamot, ginagamit ninda iyan sa pagpakol sa saiyang payo, na orog pang itinatadom sa kublit kan saiyang payo an matarom na mga tonok kan saiyang nakaiinsultong “korona.”

An pambihirang dignidad asin karigonan ni Jesus sa atubangan kan pagmaltratong ini hinangaan na marhay ni Pilato kaya napahiro siang gumibo nin saro pang pagprobar na kaldahon sia. “Uya! ilinuluwas ko sia saindo tanganing maisihan nindo na mayo akong nakukuang sala sa saiya,” an sabi nia sa mga kadaklan. Posibleng naghohona sia na an pagheling sa pinasakitan na kamugtakan ni Jesus mapalomoy kan saindang puso. Mantang nagtitindog si Jesus sa atubangan kan daing pusong sururog, na sulot an koronang tonok asin an pan-ibabaw na gubing na purpura asin risa an kolog sa nagdudugo niang lalauogon, si Pilato nagpahayag: “Uya! An tawo!”

Minsan ngani may mga lugad asin lanog, nagtitindog digdi an pinakapambihirang persona sa bilog na kasaysayan, tunay nanggad na an pinakadakulang tawo na nabuhay kasuarin pa man! Iyo, si Jesus nagpaheling nin toninong na dignidad asin pagkakalmado na nagpaparisa nin kadakulaan na pati si Pilato dapat na magmidbid, huli ta an saiyang mga tataramon malinaw na magkasalak na paggalang asin pagkaherak. Juan 18:39–19:5; Mateo 27:​15-17, 20-30; Marcos 15:​6-19; Lucas 23:​18-25.

▪ Sa anong paagi prinobaran ni Pilato na mabutasan si Jesus?

▪ Paano hiningoa ni Pilato na maabsuwelto sia sa paninimbagan?

▪ Ano an kalabot sa paghampak?

▪ Paano pinagtuya si Jesus pakatapos na hampakon?

▪ Ano pang pagprobar an ginibo ni Pilato tanganing butasan si Jesus?