An Pinakadakulang Tawo na Nabuhay Kasuarin Pa Man
Kapitulo 122: Hale ki Pilato Pasiring ki Herodes Dangan Balik na Naman
Minsan ngani dai prinobaran ni Jesus na itago ki Pilato na sia hade, ipinaliwanag nia na an saiyang Kahadean bakong huma sa Roma. “An sakong kahadean bakong kabtang kan kinaban na ini,” an sabi ni Jesus. “Kun an sakong kahadean kabtang kan kinaban na ini, nakipaglaban kutana an sakuyang mga lingkod tanganing dai ako ikatao sa mga Judio. Kundi, sa katotoohan, an sakong kahadean bakong gikan digdi.” Kaya tolong beses na inako ni Jesus na igwa sia nin Kahadean, minsan ngani bako iyan hale sa kinaban.
Minsan siring, ginipit pa sia ni Pilato: “Bueno, kun siring, ano hade ka?” An boot sabihon, ano hade ka minsan ngani an saimong Kahadean bakong kabtang kan kinaban na ini?
Ipinaaram ni Jesus ki Pilato na nakua nia an tamang konklusyon, na an simbag: “Ika mismo an nagsasabi na ako hade. Ako namundag dahel kaini, asin dahel kaini ako napadigdi sa kinaban, tanganing ako magpatotoo sa katotoohan. An siisay man na nasa katotoohan naghihinanyog sa sakong tingog.”
Iyo, an mismong katuyohan kan pag-eksister ni Jesus digdi sa daga iyo na magpatotoo sa “katotoohan,” sa espisipikong pagtaram an katotoohan manongod sa saiyang Kahadean. Andam si Jesus na magin maimbod sa katotoohan na iyan dawa mangahulogan iyan kan saiyang buhay. Minsan ngani si Pilato naghapot: “Ano an katotoohan?” dai na sia naghalat nin dugang pang paliwanag. Igo na an saiyang nadangog tanganing tumao nin sentensia.
Buminuwelta si Pilato sa kadaklan na naghahalat sa luwas kan palasyo. Malinaw na nasa kataed nia si Jesus, sinabihan nia an mga poon na saserdote asin an mga kaibahan ninda: “Mayo akong nakuang krimen sa tawong ini.”
Ikinaaanggot an desisyon, an mga kadaklan nagpoon na magpumirit: “Riniribok nia an banwaan paagi sa pagtokdo sa bilog na Judea, na nagpoon ngani sa Galilea sagkod digdi.”
An bakong makatanosan na panatisismo kan mga Judio siertong ipinagngalas ni Pilato. Kaya, mantang padagos na nagkukurahaw an mga poon na saserdote asin an kamagurangan na lalaki, inatubang ni Pilato si Jesus asin hinapot: “Dai mo nadadangog kun gurano kadakol kan pinatototoohan ninda tumang sa saimo?” Pero, dai nagprobar si Jesus na sumimbag. An saiyang pagkakalmado sa atubangan nin daing binabasaran na mga sahot ipinagngalas ni Pilato.
Kan maaraman na si Jesus taga-Galilea, nakaheling si Pilato nin paagi na makalibre sa paninimbagan sa saiya. An namomoon sa Galilea, si Herodes Antipas (aki ni Herodes na Dakula), yaon sa Jerusalem para sa Paskua, kaya ipinadara ni Pilato sa saiya si Jesus. Bago kaini, pinapugotan ni Herodes Antipas si Juan na Bautisador, dangan natakot si Herodes kan mabaretaan nia an manongod sa mga milagrong ginigibo ni Jesus, na natatakot na si Jesus sa totoo iyo si Juan na binuhay liwat hale sa mga gadan.
Ngonyan, labi-labi an paggayagaya ni Herodes huli kan paglaom na maheheling si Jesus. Bakong huli ta nagmamakolog sia sa ikararahay ni Jesus o na boot niang gumibo nin ano man na tunay na pagprobar na maaraman kun baga an mga sahot tumang sa saiya totoo o bako. Imbes, nag-uusyoso sana sia asin naglalaom na maheling si Jesus na magmilagro.
Alagad, nagsayuma si Jesus na panigoan an pag-usyoso ni Herodes. An totoo, kan hinahapot sia ni Herodes, mayo siang itinaram. Huli ta nahayo, si Herodes asin an saiyang mga bantay na soldados pinagtuya si Jesus. Sia binulosan ninda nin makintab na gubing asin pinag-olog-olog sia. Dangan ibinalik sia ninda ki Pilato. Bilang resulta, si Herodes asin Pilato, na dating magkaiwal, nagin marahay na magkatood.
Pagbuwelta ni Jesus, tinipon ni Pilato an mga poon na saserdote, an mga namomoon na Judio, asin an banwaan asin nagsabi: “Dinara nindo sa sako an tawong ini bilang saro na nag-aagyat sa banwaan na magrebelde, asin, uya! siniyasat ko sia sa atubangan nindo alagad dai ako nakakua sa tawong ini nin dahelan para sa mga sahot na dinara nindo tumang sa saiya. An totoo, pati si Herodes, huli ta ibinalik nia sia sa sato; asin, uya! mayo siang nagibong ano man na maninigo sa kagadanan. Kaya papadusahan ko sia asin bubutasan sia.”
Kaya makaduwang ipinahayag ni Pilato na si Jesus daing sala. Gustong-gusto na niang butasan sia, huli ta narerealisar nia na huli man sana sa pagkauri na dinara sia sa saiya kan mga saserdote. Mantang padagos na hinihingoa ni Pilato na butasan si Jesus, nakaresibi sia nin mas makosog pa nganing pagdagka na gibohon iyan. Mantang nakatukaw sa saiyang tukawan sa paghokom, an saiyang agom nagpadara nin mensahe, na nagsasadol sa saiya: “Dai ka makilabot sa matanos na tawong iyan, huli ta nagsakit akong marhay ngonyan sa sarong pangatorogan [na malinaw na hale sa Dios] huli sa saiya.”
Minsan siring, paano mabubutasan ni Pilato an tawong ini na daing sala, na aram nia na iyo an maninigo niang gibohon? Juan 18:36-38; Lucas 23:4-16; Mateo 27:12-14, 18, 19; 14:1, 2; Marcos 15:2-5.
▪ Paano sinimbag ni Jesus an hapot mapadapit sa saiyang pagigin hade?
▪ Ano an “katotoohan” na manongod dian ginamit ni Jesus an saiyang daganon na buhay sa pagpapatotoo?
▪ Ano an sentensia ni Pilato, ano an reaksion kan banwaan, asin ano an ginibo ni Pilato ki Jesus?
▪ Siisay si Herodes Antipas, taano ta labi-labi an paggayagaya nia na maheling si Jesus, asin ano an ginibo nia sa saiya?
▪ Taano ta gustong-gusto ni Pilato na butasan si Jesus?
(Ipagpapadagos sa masunod na luwas.)