An Pinakadakulang Tawo na Nabuhay Kasuarin Pa Man

Kapitulo 121: Sa Atubangan kan Sanhedrin, Dangan ki Pilato

Naghihinanapos na an banggi. Ikatolong beses nang pinaindahan ni Pedro si Jesus, asin natapos na kan mga miembro kan Sanhedrin an saindang sagin pagbista asin nagharale na sinda. Alagad, pagsirang tolos kan aldaw kan Biyernes na aga, nagtiripon liwat sinda, ngonyan sa saindang tiriponan kan Sanhedrin. Posible na katuyohan ninda na sagin man ipaheling na legal an pagbista kasubanggi. Kan iatubang sa sainda si Jesus, sinda nagsabi, siring kan sinabi ninda durante kan banggi: “Kun ika an Cristo, sabihi kami.”

“Dawa kun sabihon ko sa saindo, dai man kamo matubod,” an simbag ni Jesus. “Saro pa, kun hapoton ko kamo, dai man kamo masimbag.” Minsan siring, mapusong idinoon ni Jesus kun siisay sia, na an sabi: “Poon ngonyan an Aki nin tawo magtutukaw sa makapangyarihan na too nin Dios.”

“Ika, kun siring, an Aki nin Dios?” an boot na maaraman ninda gabos.

“Kamo mismo an nagsasarabi na ako iyo,” an simbag ni Jesus.

Para sa mga tawong ini na desididong gumadan, igo na an simbag na ini. Ibinilang ninda iyan na paglanghad. “Taano ta kaipuhan ta pa nin saksi?” an hapot ninda. “Huli ta kita mismo an nakadangog kaiyan gikan saiyang sadiring ngoso.” Kaya ginapos ninda si Jesus, dinara sia, asin ihinatod sia sa Romanong gobernador na si Poncio Pilato.

Si Judas, an nagpasaloib ki Jesus, nagmamasid sa mga nangyayari. Kan maheling nia na kinondenar na si Jesus, nagbasol sia. Kaya nagduman sia sa mga poon na saserdote asin kamagurangan na lalaki tanganing iuli an 30 pidaso nin pirak, na ipinapaliwanag: “Ako nagkasala kan pasaloiban ko an matanos na dugo.”

“Anong labot mi kaiyan? Ika an bahala kaiyan!” an daing puso na simbag ninda. Kaya ibinatikal ni Judas an mga pidaso nin pirak sa templo asin naghale patin nagprobar na bitayon an saiyang sadiri. Alagad, an sanga na pinaggakodan ni Judas kan pisi malinaw na nabari, asin an saiyang hawak buminugsok sa mga gapo sa ibaba, kun saen nagkawararak an mga parte kaiyan.

Dai masierto kan mga poon na saserdote kun ano an gigibohon sa mga pidaso nin pirak. “Bakong sono sa katogonan na iholog iyan sa banal na kaha nin kayamanan,” an konklusyon ninda, “huli ta iyan bayad sa dugo.” Kaya, pakatapos na magpaharapothapot, ibinakal ninda an kuwarta kan oma kan paragibo nin koron tanganing paglobongan nin mga estranyo. Kaya an oma inapod na “Oma nin Dugo.”

Amay pa nin aga kan darahon si Jesus sa palasyo kan gobernador. Alagad an mga Judio na naghatod sa saiya nagsayumang lumaog huli ta nagtutubod sinda na an siring na pakikidayupot sa mga Hentil magpaparamog sa sainda. Kaya tanganing itao an gusto ninda, nagluwas si Pilato. “Anong sumbong an dara nindo tumang sa tawong ini?” an hapot nia.

“Kun an tawong ini bakong paragibo nin sala, dai mi kutana sia dinara sa saimo,” an simbag ninda.

Gustong makalikay na mapalabot, si Pilato nagsimbag: “Kamo na an magkua sa saiya asin hokoman sia nindo sono sa saindong pagboot.”

Ihinahayag an saindang intension na gumadan, an mga Judio nagsabi: “Bakong sono sa pagboot na kami gumadan sa siisay man.” Iyo nanggad, kun ginadan ninda si Jesus durante kan Kapiyestahan nin Paskua, posibleng nagin dahelan iyan nin pagkariribok kan publiko, huli ta an dakol halangkaw an paggalang ki Jesus. Pero kun makokombensir ninda an mga Romano na gadanon sia huli sa politikal na sahot, medyo maaabsuwelto sinda sa paninimbagan sa atubangan kan mga tawo.

Kaya an mga namomoon sa relihiyon, dai sinasambit an saindang naenot na pagbista na durante kaiyan kinondenar ninda si Jesus huli sa paglanghad, nag-imbento ngonyan nin ibang sahot. Naggibo sinda nin tolo an kabtang na akusasyon: “An tawong ini nakua niamong [1] naglalaglag kan samong nasyon asin [2] nangangalad kan pagbayad nin buhis ki Cesar asin [3] nagsasabi na sia mismo Cristo na hade.”

An sahot na si Jesus naghihingakong hade an ikinahadit ni Pilato. Kaya, luminaog giraray sia sa palasyo, pinaduman sa saiya si Jesus, asin naghapot: “Ano ika an hade nin mga Judio?” Sa ibang pagtaram, ano binalga mo an pagboot paagi sa pagpahayag kan saimong sadiri na hade tumang ki Cesar?

Boot na maaraman ni Jesus kun gurano na kadakol kan nabaretaan ni Pilato manongod sa saiya, kaya naghapot sia: “Ika man sana daw an nagsasabi kaini, o may ibang nagsabi sa saimo manongod sa sako?”

Nagtuga si Pilato na mayo siang aram manongod sa saiya asin gusto niang maaraman an katunayan. “Bako akong Judio, bako daw?” an simbag nia. “An saimong sadiring nasyon asin an mga poon na saserdote dinara ka sa sako. Ano an ginibo mo?”

Dai nanggad hiningoa ni Jesus na likayan an isyu, na manongod sa pagigin hade. An simbag na itinao ngonyan ni Jesus mayong duwa-duwa na ikinabigla ni Pilato. Lucas 22:​66–23:3; Mateo 27:​1-11; Marcos 15:1; Juan 18:​28-35; Gibo 1:​16-20.

▪ Sa anong katuyohan na an Sanhedrin nagtiripon giraray pagkaaga?

▪ Paano nagadan si Judas, asin ano an ginibo sa 30 pidaso nin pirak?

▪ Imbes na sinda mismo an gumadan sa saiya, taano ta boot kan mga Judio na an mga Romano an gumadan ki Jesus?

▪ Anong mga sahot an ginibo kan mga Judio tumang ki Jesus?