An Pinakadakulang Tawo na Nabuhay Kasuarin Pa Man

Kapitulo 128: Buhay Na si Jesus!

Kan manompongan kan mga babae na dai nang laog an lolobngan ni Jesus, si Maria Magdalena naghuhumaring naghale tanganing sabihan si Pedro asin Juan. Alagad, malinaw na an ibang babae nagpawalat sa may lolobngan. Dai nahaloy, nagtunga an sarong anghel asin inagda sindang lumaog.

Digdi an mga babae nakaheling nin saro pang anghel, asin an saro sa mga anghel nagsabi sa sainda: “Dai kamo matakot, huli ta aram kong hinahanap nindo si Jesus na ipinako. Mayo sia digdi, huli ta sia binuhay na liwat, siring sa isinabi nia. Madia, helinga nindo an lugar na hinigdaan nia. Asin paduman tolos kamo asin sabihan nindo an saiyang mga disipulo na binuhay sia hale sa mga gadan.” Kaya may takot asin dakulang kagayagayahan, an mga babaeng ini naghuhumari man na naghale.

Sa oras na ini, nanompongan na ni Maria si Pedro asin Juan, asin sia nagbareta sa sainda: “Kinua ninda an Kagurangnan sa lolobngan nin girumdoman, asin dai mi aram kun saen sia ninda ibinugtak.” Tolos-tolos na an duwang apostol naghale na nagdadalagan. Si Juan mas marikas dumalagan​—malinaw na huling mas hoben—​asin sia an enot na nakaabot sa lolobngan. Sa oras na ini nagharale na an mga babae, kaya mayo na ni saro duman. Duminoko, si Juan nagsirip sa lolobngan asin naheling an mga benda, pero nagdanay sia sa luwas.

Pag-abot ni Pedro, dai sia nag-alangan kundi dirediretso nang luminaog. Naheling nia an mga benda na namumugtak duman asin man an henero na ipinatos sa payo ni Jesus. Nalululon iyan sa sarong lugar. Si Juan luminaog na man ngonyan sa lolobngan, asin nagtubod sia sa bareta ni Maria. Alagad dai nasabotan ni Pedro minsan ni Juan na si Jesus binuhay na liwat, minsan ngani parate Niang sinasabi sa sainda na Sia bubuhayon liwat. Natataranta, an duwa nagbalik sa harong, pero si Maria, na nagbuwelta sa lolobngan, nagpawalat.

Mientras tanto, an ibang babae naghuhumari tanganing sabihan an mga disipulo na si Jesus binuhay na liwat, siring sa ipinagboot kan mga anghel na gibohon ninda. Mantang nagdadaralagan sinda sa pinakamarikas na magigibo ninda, sinabat sinda ni Jesus asin nagsabi: “Marahay na aldaw!” Nagralaob sa saiyang pamitisan, sinda nagdoroko sa saiya. Dangan si Jesus nagsabi: “Dai kamo matakot! Paduman kamo, baretaan nindo an sakong mga tugang, tanganing sinda magduruman sa Galilea; asin duman maheheling ninda ako.”

Bago kaini, kan mangyari an linog asin magtunga an mga anghel, an mga soldados na nagbabantay nagkatirikbahan asin nagin garo mga tawong gadan. Kan maulian, sinda tolos-tolos na nagduman sa siudad asin isinabi sa mga poon na saserdote an nangyari. Pakatapos na hapoton an “kamagurangan na lalaki” kan mga Judio, ginibo an desisyon na hingoahon na hilomon an bagay paagi sa pagsuhol sa mga soldados. Sinda pinagbotan: “Magsabi kamo, ‘An saiyang mga disipulo nag-arabot na banggi asin hinabon sia mantang kami natotorog.’”

Mantang puwedeng mapadusahan nin kagadanan an Romanong mga soldados huli sa pagtorog sa saindang pagbabantay, an mga saserdote nanuga: “Kun ini [na bareta dapit sa saindong pagtorog] makaabot sa talinga kan gobernador, kokombensiron mi sia asin hahaleon mi kamo sa kahaditan.” Huling bastante an suhol, ginibo kan mga soldados an sono sa ipinagboot sa sainda. Bilang resulta, an falsong bareta manongod sa paghabon sa bangkay ni Jesus nakalakop na marhay sa tahaw kan mga Judio.

Si Maria Magdalena, na nagpawalat sa may lolobngan, labi-labi an pagmondo. Haen na daw si Jesus? Minadoko tanganing sumirip sa lolobngan, naheling nia an duwang anghel na nakaputi, na nagtunga liwat! An saro nagtutukaw sa may pamayohan asin an saro sa may pamitisan kan pinaghutadan kan bangkay ni Jesus. “Babae, tadaw ta nagtatangis ka?” an hapot ninda.

“Kinua ninda an sakong Kagurangnan,” an simbag ni Maria, “asin dai ko aram kun saen sia ninda ibinugtak.” Dangan suminalingoy sia asin nakaheling sia nin saro na inotro an hapot: “Babae, tadaw ta nagtatangis ka?” Asin an sarong ini naghapot man: “Siisay an hinahanap mo?”

Naghohona na an tawong ini iyo an nag-aataman kan tatamnan na namumugtakan kan lolobngan, sia nagsabi sa saiya: “Ginoo, kun kinua mo sia, sabihi ako kun saen mo sia ibinugtak, asin kukuanon ko sia.”

“Maria!” an sabi kan tawo. Asin tolos-tolos na naaraman nia, paagi sa pamilyar na paagi nin pagtaram nia sa saiya, na sia si Jesus. “Rab·boʹni!” (an boot sabihon “Paratokdo!”) an ikinagsing nia. Asin may dai mapogolan na kagayagayahan, kinapotan nia sia. Alagad si Jesus nagsabi: “Dai mo ako pagkugoson. Huli ta dai pa ako nasakat sa Ama. Alagad paduman ka sa sakong mga tugang asin sabihon mo sa sainda, ‘Ako masakat sa sakong Ama asin saindong Ama saka sa sakong Dios asin saindong Dios.’”

Si Maria nagdalagan ngonyan pasiring sa pinagtitiriponan kan mga apostol asin mga kapwa disipulo. Idinagdag nia an saiyang estorya sa baretang itinao na kan ibang babae manongod sa pakaheling sa binuhay liwat na si Jesus. Minsan siring, an mga lalaking ini, na dai nagtubod sa naenot na mga babae, minalataw na dai man nagtubod ki Maria. Mateo 28:​3-15; Marcos 16:​5-8; Lucas 24:​4-12; Juan 20:​2-18.

▪ Pakatapos na manompongan na daing laog an lolobngan, ano an ginibo ni Maria Magdalena, asin ano an naeksperyensiahan kan ibang babae?

▪ Ano an nagin reaksion ni Pedro asin Juan kan manompongan na daing laog an lolobngan?

▪ Ano an nasabatan kan ibang babae mantang paduman sinda tanganing ibareta sa mga disipulo an pagkabuhay liwat ni Jesus?

▪ Ano an nangyari sa bantay na mga soldados, asin ano an reaksion sa ibinareta ninda sa mga saserdote?

▪ Ano an nangyari kan si Maria Magdalena nagsosolo sa may lolobngan, asin ano an reaksion kan mga disipulo sa mga ibinareta kan mga babae?