An Pinakadakulang Tawo na Nabuhay Kasuarin Pa Man

Kapitulo 129: Dugang Pang mga Pagpaheling

An mga disipulo nagmomondo pa. Dai ninda nasasabotan an kahulogan kan daing laog na lolobngan, ni nagtutubod man sinda sa mga ibinareta kan mga babae. Kaya paghaloyhaloy kan Domingo, si Cleopas asin an saro pang disipulo naghale sa Jerusalem pasiring sa Emaus, na mga onseng kilometro an rayo.

Kan paduman sinda, mantang pinag-oolayan ninda an mga nangyari kan aldaw, sarong estranyo an nakidungan sa sainda. “Ano an mga bagay na ini na pinagpaparadiskutiran nindo mantang kamo naglalakaw?” an hapot nia.

Uminontok an mga disipulo, na mamondo an saindang mga lalauogon, asin si Cleopas nagsimbag: “Ano solo kang nag-eerok bilang estranyo sa Jerusalem asin sa siring dai nakakaaram kan mga bagay na nangyari sa saiya sa mga aldaw na ini?” Naghapot sia: “Anong mga bagay?”

“An mga bagay manongod ki Jesus na Nazareno,” an simbag ninda. “Itinao sia kan samong mga poon na saserdote asin mga namomoon sa sentensiang kagadanan asin ipinako sia. Alagad naglalaom kami na an tawong ini iyo an nakatalagang magligtas sa Israel.”

Si Cleopas asin an saiyang kaiba ipinaliwanag an makangangalas na mga nangyari kan aldaw​—an bareta manongod sa makangangalas na marhay na pakaheling sa mga anghel asin sa daing laog na lolobngan—​pero itinuga man ninda an saindang pagkaribaraw manongod sa kahulogan kan mga bagay na ini. Sinagwe sinda kan estranyo: “O mga kablas asin maluway an puso sa pagtubod sa gabos na bagay na itinaram kan mga propeta! Bako daw na ini asin lumaog sa saiyang kamurawayan?” Dangan ipinaliwanag nia sa sainda an mga tataramon hale sa banal na teksto na nanonongod sa Cristo.

Sa katapustapusi uminabot sinda sa may harani sa Emaus, asin an estranyo garo baga magpapadagos pa. Nagmamawot na makadangog nin dakol pa, an mga disipulo nagsadol: “Mag-ontok ka sa samuya, huli ta mabanggi na.” Kaya nag-ontok sia para sa pagkakan. Mantang sia namimibi asin binabaraak an tinapay asin iinaabot iyan sa sainda, namidbid ninda na sia talaga si Jesus sa nagmateryalisar na hawak nin tawo. Pero nawara na sia.

Ngonyan nasabotan na ninda kun paanong kadakol kan aram kan estranyo! “Bakong naglalaad an satong puso,” an hapot ninda, “mantang sia nagtataram sa sato duman sa dalan, mantang lubos niang binubukas sa sato an Kasuratan?” Daing pag-atraso, buminuhat sinda asin naghuhumari pabuwelta sa Jerusalem, kun saen ninda nanompongan an mga apostol asin an mga nagtitiripon kaiba ninda. Bago nakataram si Cleopas asin an saiyang kaiba, an iba maogmang nagbareta: “Totoo man nanggad na an Kagurangnan binuhay liwat asin nagpaheling sia ki Simon!” Dangan isinaysay kan duwa kun paano man nagpaheling sa sainda si Jesus. Kaya apat na beses na durante kan aldaw na sia nagpaheling sa manlaenlaen sa saiyang mga disipulo.

Si Jesus biglang nagpaheling sa ikalimang beses. Minsan ngani barat an mga pinto huli ta an mga disipulo natatakot sa mga Judio, sia luminaog, na nagtitindog sa mismong tanga ninda, asin nagsabi: “Magkaigwa logod kamo nin katoninongan.” Natikbahan sinda, na naghohona na sarong espiritu an saindang naheheling. Kaya, ipinaliliwanag na bako siang aparisyon, si Jesus nagsabi: “Tadaw ta nariribok kamo, asin tadaw ta may mga pagduwaduwa sa saindong puso? Helinga an sakong mga kamot asin an sakong bitis, na ako mismo ini; duoti ako asin helinga, huli ta an espiritu mayo nin laman asin tolang arog kan naheheling nindong igwa ako.” Sa giraray, sinda nagduwaduwang tumubod.

Tanganing tabangan sinda na makasabot na sia talaga si Jesus, sia naghapot: “Ano igwa kamo dian nin makakakan?” Pakaako nin sinugbang sira asin pakakakan kaiyan, sia nagsabi: “Ini an sakong mga tataramon na isinabi ko sa saindo kan ako nasa kaibanan pa nindo [bago kan sakong kagadanan], na an gabos na isinurat sa pagboot ni Moises asin sa Mga Propeta asin Mga Salmo manongod sa sako kaipuhan na maotob.”

Ipinagpapadagos an garo man sana pag-adal sa Biblia kaiba ninda, si Jesus nagtokdo: “Sa paaging ini nasusurat na an Cristo magtitios asin bubuhayon hale sa mga gadan sa ikatolong aldaw, asin huli sa saiyang ngaran an pagsolsol para sa kapatawadan nin mga kasalan ihuhulit sa gabos na nasyon​—na mapoon sa Jerusalem, kamo magigin mga saksi sa mga bagay na ini.”

Huli sa dai maaraman na dahelan si Tomas mayo sa mahalagang pagtiripon na ini kan Domingong banggi. Kaya durante kan suminunod na mga aldaw, an iba magayagayang nagsabi sa saiya: “Naheling mi an Kagurangnan!”

“Kun dai ko maheling sa saiyang mga kamot an marka kan mga pako,” an pagprotesta ni Tomas, “asin ikalaog an sakong moro sa marka kan mga pako asin ikalaog an sakong kamot sa saiyang hirog, dai nanggad ako matubod.”

Bueno, pakalihis nin walong aldaw an mga disipulo nagtitiripon liwat sa laog nin harong. Sa oras na ini kaibahan ninda si Tomas. Minsan ngani barat an mga pinto, si Jesus sa giraray tuminindog sa tanga ninda asin nagsabi: “Magkaigwa logod kamo nin katoninongan.” Dangan, kinakaolay si Tomas, nag-agda sia: “Ikaag mo digdi an saimong moro, asin helinga an sakong mga kamot, asin kuana an saimong kamot asin laogan iyan sa sakong hirog, asin ontok na sa dai pagtubod.”

“Kagurangnan ko asin Dios ko!” an kagsing ni Tomas.

“Huli daw ta naheling mo ako nagtutubod ka?” an hapot ni Jesus. “Maogma an mga dai nakakaheling alagad nagtutubod.” Lucas 24:​11, 13-48; Juan 20:​19-29.

▪ Ano an mga ihinapot nin sarong estranyo sa duwang disipulo sa dalan pasiring sa Emaus?

▪ Ano an sinabi kan estranyo na nagpangyari sa puso kan mga disipulo na maglaad sa sainda?

▪ Paano namansayan kan mga disipulo kun siisay an estranyo?

▪ Kan si Cleopas asin an saiyang kaiba bumalik sa Jerusalem, anong maogmang bareta an nadangog ninda?

▪ Ano an ikalimang pagpaheling ni Jesus sa saiyang mga disipulo, asin ano an nangyari durante kaiyan?

▪ Ano an nangyari walong aldaw pakalihis kan ikalimang pagpaheling ni Jesus, asin paano si Tomas sa katapustapusi nakombensir na si Jesus buhay na?